អ៊ឹម វីរះ ៖ ខ្ញុំបោះបង់ប្រាក់ខែរាប់ពាន់ដុល្លារ ដើម្បីប្រកបរបរតាមចិញ្ចើមផ្លូវ រហូតក្លាយខ្លួនជាម្ចាស់ក្រុមហ៊ុន
ដោយសារក្តីស្រមៃចង់ចេញរកស៊ី លោក អ៊ឹម វីរះ បានបោះប្រាក់ខែជិតពាន់ដុល្លារអាមេរិក រត់ទៅបើករកស៊ី លក់សាំងវ៉ិច តាមចញ្ចើមថ្នល់ អាចរកប្រាក់ចំណូល បានប្រមាណ៤០ម៉ឺនរៀលក្នុង១ថ្ងៃ ហើយអាចវិវត្តិខ្លួនក្លាយជាម្ចាស់ម្ចាស់គម្រោងផ្ទះលំហែបែបធម្មជាតិតម្លៃរាប់លានដុល្លារ រីឡេករីហ្ស នៅខេត្តកណ្តាល។
លោកបានរៀបរាប់ប្រាប់ Today Sharing ថា ការចេះរកស៊ីដំបូងរបស់លោក គឺការចេញលក់សាំងវ៉ិចនៅតាមចញ្ចើមថ្នល់ ដែរ របរនេះ បានបង្រៀនលោកឲ្យស្គាល់នូវមេរៀន នៃការរកស៊ីជាច្រើន ដែលលោកពុំដែលធ្លាប់បានជួប។ ការរកស៊ីនោះ បានធ្វើឲ្យលោកបោះបង់ភាពអៀនខ្មាស់ទាំងឡាយចេញពីខ្លួន ចេះពីរបៀបធ្វើម៉ាឃីតធីង ការលក់ ការរក្សាភ្ញៀវជាដើម ខណៈដែលពីមុនមកលោក ដែលធ្លាប់តែងខ្លួនស្អាតៗ ទៅធ្វើការបានប្រាក់ខែជិត១ពាន់ដុល្លារឯណោះ។
លោកបានបន្តថា របរលក់សាំងវ៉ិច អាចរកចំណូលបានប្រមាណ៤០ម៉ឺនរៀក្នុង១ថ្ងៃ ប៉ុន្តែលោកមិនបានរកស៊ីយូរនោះទេ ពោលត្រឹមតែ១ឆ្នាំប៉ុណ្ណោះ លោកអាចសន្សំលុយបានខ្លះ ក៏រត់ទៅលក់អីវ៉ាន់បោះដុំ ប៉ុន្តែវាក៏បានបរាជ័យ ដោយសារតែរបរនេះចំណេញតិចពេក ចំណាយកម្លាំង និងពេលវេលាច្រើន។
ដោយនៅតែស្រឡាញ់ការរកស៊ី លោកនឹងភរិយា បានខិតខំរកលុយសន្សំបានបន្ថែមទៀត ដើម្បីបានបើកហាងទូរស័ព្ទ មួយមានឈ្មោះថា PETER Phone Shop។ ដោយគ្មានដើមទុនច្រើនអាចទិញទូរស័ព្ទមកតាំងលក់បាន លោកទិញតែទូរដាក់ទូរសព្ទ១ និងទូរសព្ទ២ ៣គ្រឿងប៉ុណ្ណោះ ហើយដើម្បីបានទូរស័ព្ទដាក់ឲ្យពេញទូរ ដើម្បីទាក់ម៉ូយ លោកក៏បានទិញសំបកទូរសព្ទជាច្រើន មកដាក់តាំងលក់។ ដែលនេះ ជាទិចនិច្ចម៉ាឃីតធីងរបស់លោក។ រហូតដល់ជោគជ័យមកដល់សព្វថ្ងៃនេះ។
បន្ទាប់មកលោកបានបើកភោជនីយដ្ឋានមួយទៀតផងដែរ ឈ្មោះថា កាហ្វេដី ដែលមានឈ្មោះបោះសម្លេងរហូតមកដល់សព្វថ្ងៃនេះផងដែរ។ ដោយមានបទពិសោធន៍ខាងដីធ្លីស្រាប់ផង និងមើលឃើញឱកាស ព្រមទាំងសេចក្តីស្រឡាញ់ផង លោកនិងមិត្តភក្តិ បានចូលហ៊ុនគ្នា បង្កើតគម្រោង ផ្ទះលំហែបែបធម្មជាតិ Relax resort នៅខេត្តកណ្តាល លើផ្ទៃដីប្រមាណ៨ហិតតា នៅភូមិត្រាញ់ ឃុំរការ ស្រុកកណ្តាលស្ទឹង ខេត្តកណ្តាល ដែលគម្រោងស្ថិតនៅតាមបណ្តោយស្ទឹងតែម្តង៕