លោក អារីស្តូត ៖ ការអប់រំនឹងជួយមនុស្សឲ្យមានជំនាញ គំនិតខ្ពង់ខ្ពស់ និងពូកែដោះស្រាយបំផុត
“ឫសគល់នៃការអប់រំ គឺល្វីង ប៉ុន្តែផ្លែផ្កានៃការអប់រំវិញ គឺផ្អែម»”។ នេះជាការលើកឡើងរបស់លោក អារីស្តូត (Aristotle) ដែលមនុស្សភាគច្រើនស្គាល់ច្បាស់ថា ជាអ្នកប្រាជ្ញរបស់ក្រិក។ ក្នុងន័យដែលផ្ដល់តម្លៃយ៉ាងខ្លាំងលើការអប់រំនេះ លោកចង់បញ្ជាក់ថា គ្រប់ការអប់រំទាំងអស់ មិនមែនងាយស្រួលនោះឡើយ ប៉ុន្តែវាមនុស្សណាព្យាយាមតស៊ូដើម្បីទទួលបានការអប់រំល្អនោះ ពួកគេនឹងក្លាយជាមនុស្សដែលខ្ពង់ខ្ពស់ និងជោគជ័យក្នុងជីវិតមិនខាន។
គ្មានប្រទេសខ្លាំងណាមួយដែល មានប្រព័ន្ធអប់រំអន់នោះឡើយ តួយ៉ាងដូចជា សហរដ្ឋអាមេរិក អង់គ្លេស អាល្លឺម៉ង់ បារាំង និងសូម្បីតែប្រទេសសិង្ហបុរី ដែលជាកូនប្រទេសតូចមួយនៅអាស៊ី។ ការអប់រំ ជួយឲ្យមនុស្សមានជំនាញ គំនិតខ្ពង់ខ្ពស់ និងពូកែដោះស្រាយបញ្ហា ប៉ុន្តែទម្រាំឆ្លងកាត់ដំណាក់កាលដើម្បីក្លាយជាធនធានក៏កម្រនោះ គឺត្រូវហាត់ពត់លត់ដំជាច្រើន ជាពិសេសចំណាយពេលវេលា និងធនធានមិនតិចឡើយ។
អ៊ីចឹងហើយ បើអ្នកចង់ក្លាយជាមនុស្សដែលរួចផុតពីភាពល្ងង់ខ្លៅ ភាពក្រីក្រ និងការមើលងាយពីអ្នកដទៃនោះ អ្នកត្រូវតែរំដោះខ្លួនឲ្យផុតពីភាពអវិជ្ជា។ នៅពេលអ្នកក្លាយជាមនុស្សមានចំណេះដឹងខ្ពង់ខ្ពស់ហើយ មិនត្រឹមតែខ្លួនអ្នកទេដែលជោគជ័យ តែវាក៏ជួយឲ្យប្រទេសជាតិរបស់អ្នកអភិវឌ្ឍទៅមុខយ៉ាងរហ័សផងដែរ៕
