សណ្ឋាគារមួយកំពុងតែក្ស័យធុនងើបមុខមិនរួច ត្រូវបានកញ្ញាស្រស់ស្អាតម្នាក់អាយុ២៣ឆ្នាំ បានធ្វើឲ្យរីកចម្រើនបំផុត
កញ្ញា វង្ស ម៉ី ម៉ី ជាម្ចាស់សណ្ឋាគារ OCC មានអាយុត្រឹមតែ២៣ឆ្នាំប៉ុណ្ណោះ បានកែប្រែវាសនាសណ្ឋាគារមួយនេះ ដែលបានជួប បញ្ហាច្រើន ស្ទើរតែដួលប៉ះជើង អាចងើបឈរ នៅលើទីផ្សារកំពុងប្រកួតប្រជែងឡើងវិញ។
កាលពីប៉ុន្មានឆ្នាំមុន មុនពេលកញ្ញា ម៉ី ម៉ី មកកាន់កាប់សណ្ឋាគារមួយនេះ ត្រូវបានម្តាយរបស់កញ្ញាជួលឲ្យអ្នកផ្សេងមកកាន់កាប់ ដោយម្តាយរបស់គាត់យកបានតែប្រាក់ឈ្នួលប៉ុណ្ណោះ ប៉ុន្តែអាជីវកម្មមួយនេះ បានកាន់តែដុនដាបទៅៗ ខាតស្ទើរតែរាល់ខែ រហូតធ្វើឲ្យអ្នកជួលសម្រេចចិត្តផ្តាច់កុងត្រា ឈប់ធ្វើអាជីវកម្មមួយនេះទៀត។ ដោយការស្រឡាញ់សណ្ឋាគារមួយនេះ កញ្ញា ម៉ី ម៉ី មិនបាននៅស្ងៀមឡើយ ដោយបានសុំសណ្ឋាគារនេះពីម្តាយរបស់គាត់ មកគ្រប់គ្រងដោយខ្លួនឯងផ្ទាល់ គិតមកពេលនេះ បានរយៈពេល១ឆ្នាំកន្លះហើយ។
CEO វ័យក្មេងរូបនេះបានប្រាប់ថា កត្តាដែលធ្វើឲ្យកញ្ញា អាចធ្វើឲ្យសណ្ឋាគារនេះដំណើរការបានយ៉ាងរលូនដោយសារកត្តា៣យ៉ាងនេះ៖
១.កំណត់អតិថិជនគោលដៅ
មុននឹងចាប់ផ្តើមមកគ្រប់គ្រងសណ្ឋាគារនេះ កញ្ញាបានសិក្សារួចមកហើយ ពីកំហុសរបស់អ្នកគ្រប់គ្រងពីមុន ដែលទី១នោះគឺ មិនបានកំណត់អតិថិជនគោលដៅរបស់ខ្លួនច្បាស់លាស់។ ដូចនេះសម្រាប់សណ្ឋាគារ OCC កញ្ញា នឹងក្រុមការងារ បានកំណត់អតិថិជនគោលដៅ នោះគឺជនជាតិចិន និងជនបរទេស ព្រោះទីតាំងសណ្ឋាគារ នៅក្បែរនឹងព្រលានយន្តហោះ អន្តរជាតិភ្នំពេញ នោះនៅពេលភ្ញៀវចុះពីយន្តហោះ គេមិនអាចធ្វើដំណើរទៅណាឆ្ងាយទេ គេត្រូវរកកន្លែងសម្រាកជិតៗ ព្រមទាំងមាន ភោជនីយដ្ឋាន នៅជុំវិញកន្លែងគេងផងដែរ។
២.ការធ្វើទីផ្សារ
សកម្មភាពនៃការធ្វើទីផ្សារដ៏សំខាន់មួយ គឺការផ្សព្វផ្សាយ។ កញ្ញាធ្វើការផ្សព្វផ្សាយពីសណ្ឋាគាររបស់គាត់តាមរយៈគេហទំព័រធំៗ ដែលជាគេហទំព័រសម្រាប់កក់បន្ទប់សណ្ឋាគារតាមអ៊ីនធឺណិត ដែលភ្ញៀវបរទេសនិយមប្រើប្រាស់។ លើសពីនេះ កញ្ញាជ្រើសរើស ការចូលរួមក្នុងសមាគម និងបណ្ដាញធុរជន ដែលជាវេទិកាផ្ដល់ឱកាសឲ្យកញ្ញាអាចពាំនាំនូវស្លាកសញ្ញានៃអាជីវកម្មរបស់ខ្លួនឲ្យម្ចាស់អាជីវកម្មក្នុងប្រទេសជាច្រើនទៀតបានស្គាល់។
ការប្រើប្រាស់ទំនាក់ទំនងជាមួយម្ចាស់អាជីវកម្មទាំងឡាយ ដើម្បីបង្កើតជាឱកាសក្នុងការទទួលបានការណែនាំភ្ញៀវបន្ថែមមកកាន់សណ្ឋាគាររបស់ខ្លួន។ ជាក់ស្តែង សព្វថ្ងៃកញ្ញា គឺជាសមាជិកនៃបណ្ដាញធុរជនអន្តរជាតិ(BNI) ដែលស្ថិតនៅក្នុងជំពូកឈ្មោះ Eagles Chapter ផងដែរ។
៣. បុគ្គលិក
បុគ្គលិក គឺជាគ្រោងឆ្អឹង ជាសរសៃឈាម ជាគ្រឿងក្នុងនៃក្រុមហ៊ុន ដែលមិនអាចខ្វះបានឡើយ។ កញ្ញាបានបន្ថែមថា នៅពេលដែលបុគ្គលិកណាខ្វះជំនាញ ខ្វះការតាំងចិត្ត ខ្វះបេះដូង ក្នុងការបំពេញកិច្ចការងារនោះ អាជីវកម្មមួយមិនអាចជោគជ័យបាននោះទេ។ អ្វីដែលកញ្ញាធ្វើ គឺត្រូវបណ្តុះបណ្តាលបុគ្គលិក លើកទឹកចិត្តឲ្យគាត់សិក្សាបន្ថែម ព្រមទាំងលើកលែងឲ្យគាត់ជានិច្ច។
ចំពោះបុគ្គលិកមានខ្លះ ចាស់ជាងកញ្ញាតិចជាង តែកញ្ញាមិនបានចាត់ទុកគាត់ជាកូនចៅនោះទេ តែចាត់ទុកពួកគាត់ជាដៃគូររកស៊ី ហើយតែងផ្តល់តម្លៃឲ្យគាត់ក្នុងការបញ្ចេញមតិ រិះគន់ដើម្បីស្ថាបនា លើកពីផលលំបាករបស់គាត់ លើកពីគំនិតរបស់គាត់ក្នុងអាជីវកម្មសណ្ឋាគារ ដូចនេះហើយ ទើបធ្វើឲ្យគាត់មានអារម្មណ៍ថា មិនមែនធ្វើការឲ្យគេ តែដូចធ្វើការឲ្យខ្លួនឯង ពេលនោះអាជីវកម្មក៏រលូនទៅតាមនឹងផងដែរ។
៤.សេវាកម្ម
ម្ចាស់សណ្ឋាគារវ័យក្មេងរូបនេះ បានប្រាប់ថា សណ្ឋាគារ ជាប្រភេទអាជីវកម្មសេវាកម្ម ចុះបើសេវាកម្មយើងមិនល្អ សួរថាតើអ្នកណានឹងមកជួលយើង មកប្រើប្រាស់សេវាកម្មរបស់យើងទៅ។ អ្វីដែលកញ្ញា និងក្រុមការងារត្រូវធ្វើនោះ គឺយើងត្រូវរៀបចំប្រព័ន្ធសេវាកម្ម ឲ្យមានស្តង់ដារ ដើម្បីធ្វើឲ្យងាយស្រួលដល់អតិថិជន ទាំងពេលកក់ ពេលមកស្នាក់នៅ ព្រមទាំងពេលចាកចេញ គឺព្រមជាមួយស្នាមញញឹមរបស់ភ្ញៀវជានិច្ច។ កញ្ញាបានបញ្ជាក់ថា នៅពេលដែលសេវាកម្មយើងល្អ អតិថិជន និងណែនាំ ទៅកាន់អតិថិជនផ្សេងទៀត ដូចនេះអតិថិជនចាស់ក៏នៅ អតិថិជនថ្មីក៏មក ជាបន្តបន្ទាប់ មិនចេះដាច់សោះឡើយ។
គួរឲ្យដឹងផងដែរថា សណ្ឋាគា OCC HOTEL ជាសណ្ធាគារ នៅចំកណ្តាលក្រុង ជិតអាកាសយានដ្ឋានភំ្នពេញ ស្ថិតនៅ ខាងត្បូង ផ្សារទំនើប រតនាផ្លាហ្សា ផ្លូវណតប្រ៊ីជ៕