គ្រាន់តែបើកមុខរបរលក់ចែកចៀនតាមចិញ្ចើមផ្លូវសោះ ធ្វើឲ្យម្ចាស់អាជីវកម្មរូបនេះរកចំណូលបានជិត១លានក្នុង១ថ្ងៃ
ការធ្វើអាជីវកម្ម តូចក្តីធំក្តី សុទ្ធតែមានឱកាសរីកធំធាត់បានដូចគ្នា គ្រាន់តែអាជីវកម្មខ្លះត្រូវការចំណាយពេលយូរ និងខ្លីតែប៉ុណ្ណោះ ទៅតាមតិចនិកដែលយើងប្រើរៀងៗខ្លួន។ ប៉ុន្តែការចាប់ផ្តើមអាជីវកម្មពីតូច ហើយនៅក្រោមកម្តៅថ្ងៃទៀតនោះ ប្រាកដណាស់ថាយើងមិនចង់ធ្វើវាឡើយ ពីព្រោះមនុស្សយើងតែងតែមានទម្លាប់ពីពិបាកជំនះមួយ គឺទម្លាប់ខ្មាសអៀនច្រើនជាប់នឹងខ្លួនជានិច្ច។
ក៏ប៉ុន្តែយើងទាំងអស់គ្នាមិនធ្លាប់គិតទេ ថាអ្នកធ្វើអាជីវកម្មខ្នាតតូច នៅក្រោមកម្តៅថ្ងៃ ពួកគាត់មានសេរីភាពខ្លាំងជាងអ្នកធ្វើការនៅក្នុងការិយាឆ្ងាយណាស់ ហើយអ្វីដែលគួរឱ្យស្ងើចសរសើរថែមទៀតនោះ គឺពួកគាត់អាចរកចំណូលក្នុងមួយខែៗ បានច្រើនជាងអ្នកធ្វើការ និងមិនចាញ់ហាងធំៗមួយចំនួនឡើយ។
បើតាមលោក សីហា អាជីវករលក់ចេកចៀន នៅតាមបណ្តោយផ្លូវ១០០៣ បានលើកឡើងថា “មូលហេតុដែលធ្វើឱ្យគាត់ចាប់ផ្តើមអាជីវកម្មមួយនេះឡើង ដោយសារគាត់មើលឃើញថា ចេកចៀនគឺជាគ្រឿងហូបមួយដែលលក់ដាច់ខ្លាំង ប្រសិនបើយើងបើកនៅតាមផ្លូវដែលមានចរចរណ៍ច្រើន ឬទីប្រជុំជន ជាពិសេស យើងអាចចាប់ផ្តើមជាមួយនឹងដើមទុនតិចបានថែមទៀតផង។
មួយវិញទៀត ចេកចៀន គឺជាអាហារសម្រន់ដែលខ្មែរយើង និយមចូលចិត្តញ៉ាំខ្លាំងជាទីបំផុត ហើយមិនងាយនឹងលក់សល់ឡើយ ប្រសិនបើយើងមានរូបមន្តផ្ទាល់ខ្លួន ដែលធ្វើឱ្យចេកចៀនរបស់យើងមានលក្ខណៈខុសប្លែកពីគេ ជាពិសេស យើងចេះច្នៃបន្ថែមនៅអាហារសម្រន់ផ្សេងៗបន្ថែមដូចជា៖ ដំឡូង ពោត នំប៉័ង និងត្រាវទៀតនោះ អាជីវកម្មរបស់យើងនឹងមានភ្ញៀវចូលទិញកាន់តែច្រើន។
អាជីវករលក់ចេកចៀនរូបនេះ បានបង្ហើបផងដែរថា អាជីវកម្មលក់ចេកចៀនរបស់គាត់បានដំណើរការជាង១០ឆ្នាំមកហើយ ហើយក្នុងមួយថ្ងៃគាត់អាចរកចំណូលបានប្រមាណជាង៨០ម៉ឺនរៀល។ ចំណែកឯភ្ញៀវដែលមកទិញកន្លែងគាត់ភាគច្រើន មិនត្រឹមតែអ្នកនៅជិត និងធ្វើដំណើរឆ្លងកាត់នោះទេ សូម្បីតែអ្នកនៅឆ្ងាយៗ ដែលគាត់ធ្លាប់ជិះកាត់ ហើយបានចូលទិញ ក៏ឧស្សាហរណ៍មកញឹកញ៉ាប់ផងដែរ៕