អគ្គនាយកTwitter ៖ សូមកុំដេករងចាំទទួលភាពជោគជ័យ ព្រោះភាពជោគជ័យកើតឡើងមិនមែនចៃដន្យនោះទេ
ជាការពិតណាស់ មិនមែនមនុស្សគ្រប់គ្នាសុទ្ធតែទទួលបានភាពជោគជ័យក្នុងជីវិតនោះទេ ប្រសិនបើមនុស្សមិនមានការតស៊ូក្នុងជីវិតនោះទេ នោះកុំថាឡើយស្គាល់ភាពជោគជ័យ សូម្បីតែសេចក្តីសុខរបស់ខ្លួនជាប្រចាំថ្ងៃរកពុំបានផង ដូច្នេះក្នុងជីវិតរបស់យើងត្រូវតែទទួលយកនូវការពិតចំពោះអ្វីដែលខ្លួនបានធ្វើដើម្បីខ្លួនឯង។
ពេលខ្លះមានមនុស្សមួយចំនួនដេករងចាំភព្វ័សំណាងរបស់ខ្លួន មិនមែនគ្រាន់តែភ្ញាក់ឡើងស្រាប់តែឃើញប្រាក់មួយលានដុល្លារ ហើយបានស្រែកប្រកាសក្តែងៗថាខ្លួនបានទទួលភាពជោគជ័យ ហើយសប្បាយរីករាយនោះ។ តាមពិតវាមិនមែនដូច្នេះនោះទេ មនុស្សគ្រប់គ្នាអាចទទួលបានភាពជោគជ័យ កាលណាផ្តើមចេញពីគំនិតក្នុងខ្លួនយើង។
បើតាមលោក Jack Dorsey អគ្គនាយកក្រុមហ៊ុនTwitter ទស្សនៈរបស់លោកបានបញ្ជាក់ថា ជោគជ័យបានកើតឡើងមិនមែនដោយសារចៃដន្យនោះទេ។ លោកបានបញ្ជាក់បន្ថែមថា នៅពេលប្រកួត គូប្រកួតឈឺក្បាលសន្លប់ ហើយមិនបានឡើងមកប្រកួត មិនអាចចាត់ថា ជាភាពជោគជ័យនោះទេ វាគ្រាន់តែជាភាពចៃដន្យប៉ុណ្ណោះ។
លោកអគ្គនាយកTwitter បានបន្ថែមថា ភាពចៃដន្យ និងភាពជោគជ័យ គឺខុសគ្នា ភាពចៃដន្យកើតឡើងដោយមិនបានព្រាងទុក តែភាពជោគជ័យ គឺកើតឡើងដោយបានព្រាងទុកតែម្តង។ ដូច្នេះកម្រិតនៃការកើតឡើងក៏មានទៅតាមនោះដែរ ពោលភាពចៃដន្យកើតឡើងតែយូរៗម្តងប៉ុណ្ណោះ តែភាពជោគជ័យអាចកើតឡើងជាច្រើនដង បើយើងប្រឹងប្រែង៕