ខ្មែរ​ពិតជាអាចធ្វើបាន ស្ថាបនិក​ហាង​ ចង្កឹះមាស នឹង​យក​នំ​បញ្ចុក​សម្លខ្មែរ​ ទៅ​បង្ហាញ​ឲ្យ​អន្តរជាតិ​ស្គាល់ និង​បរិភោគ​

បើនិយាយអំពីពាក្យថា “នំបញ្ចុក” លោកអ្នកច្បាស់ជាធ្លាប់បានលឺ ឬស្គាល់រួចទៅហើយ! ព្រោះថា នំបញ្ចុកខ្មែរយើង មានតាំងពីសម័យបុរាណមកម្លេះ ហើយយើងក៏តែងតែឃើញការលក់នំបញ្ចុកជាលក្ខណៈរែកអំរែក និងតាមតូបតូចតែប៉ុណ្ណោះ។ តែបើងាកមកមើលទៅលើការហ៊ានចំណាយលើការរៀបចំ ការរចនាហាងនំបញ្ចុកខ្មែរឱ្យមានភាពប្រណិតដូចជាហាងបរទេសដទៃទៀតនោះ មុខរបរនំបញ្ចុកខ្មែរមួយនេះ ហាក់ដូចជាពុំសូវមានភាពទូលំទូលាយនៅឡើយទេ សម្រាប់ប្រជាជនខ្មែរយើង នាពេលបច្ចុប្បន្ន។

តែនៅពេលនេះ មុខរបរបញ្ចុកខ្មែរដែលម្ចាស់អាជីវកម្មមួយចំនួនធំច្រើនតែមើលរំលង បែរជាត្រូវបានស្រ្តីខ្មែរម្នាក់ មានឆន្ទះអភិរក្ស និងលើកស្ទួយមុខរបរមួយនេះ ឱ្យមានកេរ្តិ៍ឈ្មោះល្បីដល់ភ្ញៀវជាតិ និងអន្តរជាតិ រហូតដល់ហ៊ានចំណាយថវិកាលើការរៀបចំដេគ័រហាងនំបញ្ចុករបស់ខ្លួនមិនឱ្យចាញ់ហាងបរទេសមួយចំនួនទៀតផង។ លោកស្រី សោម សុវត្តិ ហៅដា ជាម្ចាស់ហាងនំបញ្ចុក “ចង្កឹះមាស”​ បានថ្លែងប្រាប់ថា “ជនជាតិបរទេសគេអាចនាំយករសជាតិអាហារគេមកឱ្យខ្មែរយើងស្គាល់បាន ដូច្នេះនំបញ្ចុកខ្មែររបស់លោកស្រីក៏ត្រូវតែនាំយកទៅបង្ហាញឱ្យបរទេសបានស្គាល់ដូចគ្នាដែរ” ។

លោកស្រីបន្តថា “នំបញ្ចុក” គឺជាអត្តសញ្ញាជាតិខ្មែរយើង តាំងពីសម័យបុរាណកាលមកម្លេះ ជាពិសេស ត្រូវបានធ្វើឡើងចេញពីសមត្ថភាពរបស់ស្រ្តីខ្មែរ ដូច្នេះស្រ្តីខ្មែរយើងពិតជាស្រ្តីខ្មែរដែលមានសមត្ថភាពខ្ពស់ និងមានភាពតស៊ូពុះពាររាល់ការលំបាកចំពោះក្រុមគ្រួសារ ដោយហ៊ានបង្ហាញសមត្ថភាពខ្លួនតាមរយៈការដាំស្ល រែកផងទូលផង ដើរលក់តាមស្រុកភូមិ ដើម្បីជីវភាពគ្រួសារ។ ហើយដោយសារតែវីរៈភាពមួយនេះ បានធ្វើឱ្យលោកស្រី មានបំណងចង់បើកហាងតូចមួយដោយខ្លួនឯងលក់នំបញ្ចុកខ្មែរ តាំងតែកំពុងរៀនថ្នាក់មហាវិទ្យាល័យ មកម្លេះ។ ហើយចៃដន្យថ្ងៃមួយ លោកស្រីក៏បានភ្លក់រសជាតិនំបញ្ចុកសម្លខ្មែរបូពឹក្ស ជាស្នាដៃរបស់អ៊ុំស្រីវ័យ ៧៥ឆ្នាំម្នាក់ ដែលសព្វថ្ងៃគាត់រស់នៅភូមត្រាំង ខេត្តសៀមរាប។

ព្រោះតែបេះដូងពោរពេញដោយក្តីស្រលាញ់ លោកស្រី ដា បានខិតខំរៀនដាំស្លរទឹកនំបញ្ចុកឱ្យដូចរសជាតិជំនាន់ដើម ដែលអ៊ុំស្រីជាគ្រូបង្រៀនដ៏ប៉ិនប្រសព្វ ហើយអ៊ុំស្រីបានបន្តប្រាប់ថា ទឹកនំបញ្ចុកនេះមានអាយុកាលជាង ១០០ឆ្នាំមកហើយ ហើយវាគឺជារូបមន្តប្រចាំខេត្តសៀមរាប និងប្រចាំត្រកូលរបស់គាត់ផងដែរ។

លោកស្រី ដា គឺជាបុគ្គលម្នាក់ ដែលបានយកចិត្តទុកដាក់យ៉ាងខ្លាំងលើអនាម័យ និងសុខភាពអតិថិជនរបស់ខ្លួនជាចម្បង ដោយលោកស្រី បានសំរិតសំរាងបន្លែស្រស់ៗ ចំរុះគ្រប់ពណ៌ គ្រប់រសជាតិ ហើយទឹកសម្លគឺឈ្ងុយឆ្ងាញ់គ្មានសារធាតុប៊ីចេង ដែលបង្កប់នូវអត្តសញ្ញាញជាតិខ្មែរពិតប្រាកដ៕

Loading...