ទឹកស្អុយក្នុងរាជធានីភ្នំពេញនឹងត្រូវបានកែប្រែ ក្រោយក្រុមហ៊ុនជប៉ុនធ្វើរោងចក្រប្រព្រឹត្តិកម្មទឹកស្អុយតម្លៃ២៧លាន$
រដ្ឋាភិបាលជប៉ុន តាមរយៈទីភ្នាក់ងារកិច្ចសហប្រតិបត្តិការអន្តរជាតិ ហៅកាត់ថា (JICA) សហការជាមួយអាជ្ញាធរកម្ពុជា បាននិងកំពុងសិក្សាគម្រោងសាងសង់រោងចក្រប្រព្រឹត្តិកម្មទឹកស្អុយនៅរាជធានីភ្នំពេញ។
លោក សាំ ពិសិដ្ឋ ប្រធានមន្ទីរសាធារណៈការ និងដឹកជញ្ជូនរាជធានីភ្នំពេញ បានឲ្យដឹងថា គម្រោងសាងសង់រោងចក្រប្រព្រឹត្តិកម្មទឹកស្អុយនេះ ជាគម្រោងរបស់ទីភ្នាក់ងារកិច្ចសហប្រតិបត្តិការ អន្តរជាតិ ហៅកាត់ថា (JICA) ជាមួយក្រុមការងារបច្ចេកទេសមន្ទីរសាធារណការ និងដឹកជញ្ជូនរាជធានីភ្នំពេញ បាននិងកំពុងសិក្សាបច្ចេកក្នុងការសាងសង់រោងចក្រនេះ តែមិនទាន់សម្រេចជាផ្លូវការនៅឡើយទេ។
លោកបន្តថា “ការសិក្សារនេះ អាចនឹងប្រើប្រាស់ពេលប្រមាណមួយឆ្នាំទើបចប់ ហើយរាល់ការចំណាយលើការសិក្សា និងសាងសង់ទៅលើគម្រោងរោងចក្រនេះ ជាគម្រោងរបស់ អង្គការ JICA ជាអ្នកធានារាប់រង”។ ទោះជាយ៉ាងណាលោក សាំ ពិសិដ្ឋ មិនផ្តល់ព័ត៌មានពិស្តារជុំវិញគម្រោងសាងសង់រោងចក្រនេះថា អស់ថវិកាប៉ុន្មាននៅទី តាំងណា ឬផ្នែកណាមួយនៃរាជធានីភ្នំពេញនោះទេ នៅពេលគេទំព័រ propertyarea.asia បន្តសួរ។
តែយ៉ាងណាក៏ដោយ លោក ត្រូវបានសារព័ត៌មានក្នុងស្រុក បានដកស្រងសម្តីថាគម្រោងសាងសង់រោងចក្រប្រព្រឹត្តិកម្មទឹកស្អុយនេះ ជំហ៊ានទី១ គឺសាងសង់នៅតំបន់ជើងឯក ខណ្ឌដង្កោ។ គម្រោងនេះមានទំហំទឹកប្រាក់ចំនួន២៧លានដុល្លារ ជាជំនួយដែលផ្តល់ជូនពីទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា JICA។
ក្រុមការងារបច្ចេកទេសមន្ទីរសាធារណការ និងដឹកជញ្ជូនរាជធានីភ្នំពេញ ថ្ងៃទី១៧ខែឧសភាឆ្នាំ២០១៩កន្លងមកនេះ បានប្រជុំជាមួយក្រុមសិក្សាបច្ចេកទេសអង្គការ JICA ស្តីពីគម្រោងសាងសង់រោងចក្រប្រព្រឹត្តិកម្មទឹកស្អុយនៅរាជធានីភ្នំពេញ៕