បន្តគាំទ្រសកម្មភាពប្រយុទ្ធប្រឆាំងការរីករាលជំងឺកូវិដ១៩! សប្បុរសជនមួយក្រុមតចុះគាំទ្រដល់អាជ្ញាធរមានជ័យ
ភ្នំពេញ៖ បន្តលើកទឹកចិត្តនិងគាំទ្រសកម្មភាពប្រយុទ្ធប្រឆាំងការរីករាលជំងឺកូវិដ១៩ សប្បុរសជនមួយក្រុមស័្មគ្រចិត្តលះបង់ទាំងថវិកានិងកម្លាំងកាយចិត្តចុះគាំទ្រដល់អាជ្ញាធរមានជ័យដើម្បីឆាប់បញ្ចប់ការរីករាលជំងឺកូវិដ១៩ ។
មានក្រុមហ៊ុនទឹកកកអនាម័យធំជាងគេមួយនៅកម្ពុជាដែលមានឈ្មោះថា Chamatharn Co, Ltd. ផលិតទឹកកក EVA Premium Ice បានបន្តធ្វើរឿងល្អមួយរបស់ខ្លួនចុះជួយនិងផ្តល់អំណោយជាថ្នាំពេទ្យសម្រាប់ប្រជាជនក្នុងទឹកដីខណ្ឌមានជ័យ រាជធានីភ្នំពេញ ។
កាលពីព្រឹកថ្ងៃទី២៥ ខែមិថុនា ឆ្នាំ២០២១ ថ្នាក់ដឹកនាំក្រុមហ៊ុន Chamatharn Co, Ltd. ដែលមានផលិតទឹកកកអនាម័យ EVA Premium Ice អមដំណើរថ្នាក់ដឹកនាំជាច្រើនរូបនៃស្ថានីយទូរទស្សន៍លេខ៥ បានចុះជួបផ្ទាល់សុខទុក្ខទៅកាន់រដ្ឋបាលសាលាខណ្ឌមានជ័យ រាជធានីភ្នំពេញ ដោយបានជួបផ្ទាល់អភិបាលលោក ពេជ្រ កែវមុនី ក្នុងការប្រយុទ្ធប្រឆាំងនឹងការរីករាលដាលជំងឺកូវិដ១៩ ។
លោក Apichart Duang-Art អគ្គនាយកក្រុមហ៊ុន Chamatharn Co, Ltd. (EVA Premium Ice) បានដឹកនាំក្រុមការងារជាច្រើនរូប ដោយបាននាំយកអំណោយជាច្រើន ទៅជួបផ្ទាល់ ពេជ្រ កែវមុនី ដើម្បីធ្វើការថ្លែងអំណរគុណ ដែលអាជ្ញាធរគ្រប់លំដាប់ថ្នាក់ក្នុងតំបន់នេះបានខិតខំប្រឹងការងារកន្លងមក ជាពិសេសបានឈ្នះនឹងវិបត្តិកូវិដ១៩ ហើយក៏កំពុងបន្តព្យាបាលដល់ប្រជាពលរដ្ឋ បានឆ្លងកូវិដ១៩ ដើម្បីឈានដល់ការបញ្ចប់ព្រឹត្តិការណ៍២០កុម្ភៈបានផងដែរ។
លោក Apichart Duang-Art បានបញ្ជាក់ថា ថ្ងៃនេះលោកនេះរួមគ្នាជាមួយក្រុមហ៊ុន Chamatharn Co, Ltd. ទឹកកកអនាម័យ EVA Premium Ice បាននាំយកអំណោយថ្នាំពេទ្យជាច្រើនប្រអប់ ដោយសរុបប្រមាណ១០កេះធំ មាន៨០០កញ្ចប់តូចៗ ដែលជាថ្នាំពេទ្យកម្រិតបឋមមានដូចជា ថ្នាំទឹក CISTEINE សេរ៉ូព្យាបាលអាការៈក្អក, ថ្នាំលេប SARA បំបាតអាការៈគ្រុនក្តៅនិងភាពឈឺចាប់, និងគ្រីមលាប DERMAHEU បំបាត់រោគអាឡែកស៊ី រមាស ស្រែង តាអក ទឹកស៊ីជើងតាមស្បែក ដោយថ្នាំទាំងបីមុខដើម្បីជួយសម្រួលដល់អាជ្ញាធរ ឬ សម្រាប់ប្រជាពលរដ្ឋមានការខ្វះខាត ក្នុង ខណ្ឌមានជ័យ និងស្របពេលការពារការរីករាលដាលជំងឺកូវិដ១៩ ។
ជាមួយគ្នានោះ ក្រុមហ៊ុន Chamatharn Co, Ltd. (EVA Premium Ice) ក៏បាននាំយកអំណោយជាធុងទឹកកកសម្រាប់ទុកដាក់ភេសជ្ជៈ សម្រាប់ទុកជូនដល់រដ្ឋបាលសាលាខណ្ឌមានជ័យ ដើម្បីទុកប្រើប្រាស់ក្នុងបំពេញភារកិច្ចផងដែរ។ លោកក៏បានជូនពរដល់ លោក ពេជ្រ កែវមុនី អភិបាលខណ្ឌមានជ័យ ព្រមទាំងមន្ត្រីអាជ្ញាធរគ្រប់លំដាប់ថ្នាក់ ទាំងអស់ទទួលជោគជ័យគ្រប់ភារកិច្ច និងជាពិសេសយកឈ្នះជំងឺកូវិដ១៩ ដើម្បីប្រទេសកម្ពុជាមានសុខសន្តិភាព គ្មានជំងឺកូវិដ១៩ ។
អភិបាលខណ្ឌមានជ័យ លោក ពេជ្រ កែវមុនី ចេញមកជួបផ្ទាល់ដោយធ្វើថ្លែងអំណរគុណយ៉ាងជ្រាលជ្រៅ ដល់ក្រុមហ៊ុន Chamatharn Co, Ltd. (EVA Premium Ice) និងថ្នាក់ដឹកនាំស្ថានីយទូរទស្សន៍លេខ៥ ដែលបានចុះមកដោយផ្ទាល់ សួរសុខទុក្ខ និងជាពិសេសនាំយកអំំណោយថ្នាំពេទ្យយ៉ាងច្រើន ជូនដល់រដ្ឋបាលសាលាខណ្ឌមានជ័យ ដើម្បីធ្វើការចែកចាយទៅកាន់ប្រជាពលរដ្ឋនិងមន្ត្រីមូលដ្ឋាន កំពុងមានតម្រូវការចំបាច់ ហើយថ្នាំទាំងអស់នេះក៏អាចប្រើប្រាស់ ជូនដល់អ្នកកំពុងចត្តឡីស័កពីការរីករាលជំងឺកូវិដ១៩ផងដែរ៕
អត្ថបទដោយ TOP POST រូបភាពសហការី