ហោរាសាស្រ្ត ប្រចាំថ្ងៃ សៅរ៍ ទី ០៦ ខែ វិច្ឆិកា ឆ្នាំ ២០២១ ត្រូវនឹងថ្ងៃ ២កើត ខែកត្តិក ឆ្នាំឆ្លូវ ត្រីស័ក ពស២៥៦៥
ឆ្នាំជូត
រាសីល្អជាមធ្យម។លោកអ្នកកើតឆ្នាំកណ្តុរបើទោះបីដួងរាសីខែវិច្ឆិកានេះល្អប្រសើរក្តី ប៉ុន្តែអំឡុងពេលត្រូវរក្សាភាពស្ងប់ស្ងាត់ និង មិនត្រូវសង្ឃឹមទៅលើអ្វីពេកដែរពីព្រោះថាឧបសគ្គមួយចំនួននៅតែរារាំងនៅឡើយ។ការប្រកបការងារឃើញថាពុំមានអ្វីប្រែប្រួលប្តូរផ្លាស់គួរកត់សម្គាល់ទេគឺដូចសព្វមួយដង។អ្នកប្រកបរបររកស៊ីជួញដូរពុំផ្តល់ផលល្អក្នុងការបណ្តាក់ទុនធំប៉ុន្មានឡើយ គួរមានការគិតឱ្យបានគ្រប់ជ្រុងជ្រោយមុនធ្វើអ្វីមួយព្រោះ បើបោះទុនទៅហើយមិនងាយដកដើមមកវិញឡើយ ហើយស្រួលមិនស្រួលកប់ដើមសូន្យឈឹងតែម្តង។ គូគ្រងប្តីប្រពន្ធ ឬ គូស្នេហ៍ប្រុសស្រីប្រយ័ត្នអ្នកទី៣ចូលមកផ្លុំត្រចៀកបង្កជាទំនាស់កើតឡើង ៕
ឆ្នាំឆ្លូវ
រាសីស្រុតចុះ។នៅថ្ងៃនេះលោកអ្នកត្រូវចេះធ្វើគធ្វើថ្លង់ខ្លះ និងក៏មិនត្រូវចេះដឹងរឿងអ្នកដទៃច្រើនដែរពីព្រោះថាងាយកើតជារឿងរាវដោយសារមាត់ណាស់ ។ទាំងស្ត្រីបុរសលោកអ្នកជួបបញ្ហាមិនល្អយាយីច្រើន ដូចនេះទោះធ្វើអ្វីក៏ដោយតោងតែមានការប្រយ័ត្នប្រយែងបន្តិចទើបគ្មានបញ្ហាមិនល្អណាមួយឈានចូលកើត។អ្នកប្រកបរបររកស៊ីជួញដូរទោះការចេញធ្វើជំនួញទីជិតឆ្ងាយគប្បីត្រូវមានចិត្តត្រជាក់ ហើយមិនត្រូវយកភាពមោហៈទោសៈដាក់ខ្លួនឡើយព្រោះមានតែផ្តល់ផលអាក្រក់ជាងល្អ។ សម្ព័ន្ធស្នេហាកំលោះក្រមុំមិនសូវមានការជឿនលឿនទៅមុខ តែងាយថយក្រោយពិសេសការកើតជម្លោះវិវាទក៏ងាយកើតឡើងផង៕
ឆ្នាំខាល
រាសីខ្ពស់ត្រដែត។ថ្ងៃនេះដោយសារដួងរាសីល្អប្រសើរ ម្ល៉ោះហើយផ្តល់ផលល្អក្នុងការដែលលោកអ្នកសម្រុករឿងប្រាក់កាស ឬការងារអ្វីមួយពីព្រោះថាផលតែងឆ្លើយតបគ្រាន់កក់ក្តៅ ។ការប្រកបការងារប្រចាំថ្ងៃវិញឃើញថារឿងរាវអាក្រក់បានរត់ចេញឬហោះរំលង ហើយផលល្អនឹងចូលមកជំនួសវិញ។
អ្នកប្រកបរបររកស៊ីជួញដូរបើចង់ធ្វើទំនាក់ទំនងមុខរបរអ្វីមួយអាចហុចលទ្ធផលគ្រាន់បើជាងមុន ប៉ុន្តែយ៉ាងណាចំណូលកុំរំពឹងពេកព្រោះនៅតែចោទជាបញ្ហាដដែលទេ។ រីឯបញ្ហាសេចក្តីស្នេហាកំលោះក្រមុំមានការផ្អែមល្ហែមនិងកំពុងរីកលូតលាស់ទៅមុខប្រពៃ៕
ឆ្នាំថោះ
រាសីស្រុតចុះ។នៅថ្ងៃនេះដោយសារដួងរាសីស្រុតចុះ ម្ល៉ោះហើយគប្បីមានការប្រយ័ត្នប្រយែងបន្តិចពីព្រោះថាងាយកើតនូវបញ្ហាមិនល្អចូលយាយីជាងសព្វមួយដង។ការប្រកបការងារលោកអ្នកធ្វើអ្វីកុំសង្ឃឹមពេកពីព្រោះថាពុំឆ្លើយតបដូចគាប់បំណងនោះឡើយ និងអ្នកខ្លះទៀតតែងជួបស្ថានភាពលំបាករកស្រាយមិនចេញផង។សម្រាប់បើជាអ្នកប្រកបរបររកស៊ីជួញដូរមិនត្រូវបោះទុនអ្វីមួយដោយតក់ក្រហល់ឡើយប្រយ័ត្នជួបរឿងស៊យអស់ប្រាក់កាសពីខ្លួនត្រូវមកដេកសោកស្តាយ។ រីឯបញ្ហាស្នេហាកំលោះក្រមុំបើចង់ធ្វើការជ្រើសរើសគូស្រករពុំសូវល្អទេឱ្យប្រយ័ត្នជួបគូកម្មច្រើនជាងគូព្រេង៕
ឆ្នាំរោង
រាសីល្អជាមធ្យម។ថ្ងៃនេះបើលោកអ្នកប៉ងប្រាថ្នាអ្វីមួយធំគឺពុំសូវឆ្លើយតបដូចគាប់បំណងទេ ប៉ុន្តែបើជាការប៉ងធ្វើអ្វីដែលតិចតួចនោះលទ្ធផលត្រឡប់បែរជាទទួលបានគ្រាន់ស្រួលផ្លូវចិត្តវិញ ។ការប្រកបការងារនៅថ្ងៃនេះដែរកុំសូវឈោងចាប់កិច្ចការធំពេកពោលគឺយកល្អគប្បីធ្វើកម្រិតកិច្ចការប្រចាំថ្ងៃបានហើយ ។បើជាអ្នកប្រកបរបររកស៊ីជួញដូរវិញលោកអ្នកត្រូវរែកពន់ភាពលំបាកលំបិនមិនតិចដែរទេព្រោះតែចំណូលតិច ឯការចំណាយវិញគ្រប់សារពើ។ រីឯបញ្ហាស្នេហាប្រុសស្រីកុំគប្បីមានចិត្តស្រាលផ្ទុកកំហឹងក្នុងខ្លួននាំកើតតែរឿងរាវឥតមានធូរស្បើយ៕
ឆ្នាំម្សាញ់
រាសីស្រុតចុះ។ទាំងស្ត្រីបុរសការរស់នៅអ្វីដែលមិនទាន់មកដល់ ឬមិនទាន់ឃើញមិនត្រូវព្រួយបារម្ភឬអស់សង្ឃឹមពេកឡើយពីព្រោះថារឿងរាវខ្លះអាក្រក់ក៏អាចប្រែជាល្អវិញដែរ។ការប្រកបការងារ លោកអ្នកគប្បីមានការប្រយ័ត្នប្រយែងបន្តិចដែរព្រោះក្រុមមនុស្សអាក្រក់តាមយាយីនោះក៏មានច្រើន។អ្នកប្រកបរបររកស៊ីជួញដូរការជួញទីជិតឆ្ងាយក្តីជួបផលលំបាកក្នុងការរកផលចំណូលណាស់ដែរ ហើយក្រៅពីនេះលោកអ្នកគួរប្រយ័ត្នប្រយែងការមានជម្លោះវិវាទថែមទៀត។ រីឯបញ្ហាស្នេហាកំលោះក្រមុំកុំចង់សាកល្បងកាមគុណប្រយ័ត្នត្រូវមករែកពន់ភាពទុក្ខសោកនាពេលក្រោយ ហើយនាំជីវិតមិនភ្លឺស្វាងតាមអ្វីដែលជីវិតខ្លួនត្រូវមាន៕
ឆ្នាំមមី
រាសីខ្ពស់ត្រដែត។នៅថ្ងៃនេះរាល់ចង្រៃឧបទ្រពបានសាបរលាប ម្ល៉ោះហើយដំណើរជីវិតរបស់លោកអ្នកផ្លាស់ប្តូរមកល្អប្រសើរឡើងវិញ។អ្នកប្រកបការងាររាជការឬក្រុមហ៊ុនឯកជនក្តីបើមានកិច្ចការអ្វីថ្មីឬសូម្បីតែចាស់ក្តីលោកអ្នកត្រូវរួសរាន់បំពេញ និង មិនត្រូវធ្វេសប្រហែសឡើយមិនដូច្នេះនឹងទទួលរងការស្តីបន្ទោសពីសំណាក់ចៅហ្វាយនាយជាក់ជាពុំខាន។ការធ្វើជំនួញទីជិតឆ្ងាយពុំមានអ្វីប្រែប្រួលប្តូរផ្លាស់ទេ គឺដូចសព្វមួយដង។ រីឯបញ្ហាសេចក្តីស្នេហាកំលោះក្រមុំមានភាពជឿនលឿនទៅមុខនិងផ្អែមល្ហែមល្អណាស់៕
ឆ្នាំមមែ
រាសីខ្ពស់ត្រដែត។ទាំងស្ត្រីបុរសបើលោកអ្នក សម្រេចចិត្តអ្វីមួយគឺតែង តែងឆ្លើយតបផលល្អៗមកវិញនាពេលក្រោយគ្រាន់កក់ក្តៅជានិច្ច។ការប្រកបការងារពុំមានអ្វីចូលយាយីនាំពិបាកដោះស្រាយនោះដែរគឺមានសភាពរលូនល្អដូចសព្វមួយដង។អ្នកប្រកបរបររកស៊ីជួញដូរមានការទិញចូលលក់ចេញគ្រាន់បើតែយ៉ាងណាលោកអ្នកទាល់តែខិតខំខ្លាំងទើបទទួលជោគជ័យជំនួញធំៗទៅរួច។ សម្ព័ន្ធស្នេហាកំលោះក្រមុំមានការរីកលូតលាស់ទៅមុខនិងកំពុងផ្អែមល្ហែមប្រពៃប្រៀបដូចត្រីក្នុងទឹកនារដូវវស្សា៕
ឆ្នាំវក
រាសីល្អជាមធ្យម។ថ្ងៃនេះពុំផ្តល់ផលល្អក្នុងការធ្វើដំណើរឆ្ងាយឬក៏ជួបពិភាក្សារឿងអ្វីមួយពីព្រោះថាងាយជួបនូវបញ្ហានាពេលក្រោយវិញណាស់។ការប្រកបការងារផលល្អ និង អាក្រក់នៅលាយឡំគ្នា ម្ល៉ោះហើយចូរប្រយ័ត្នប្រយែងបញ្ហាការធ្វើដំណើរទាំងផ្លូវឆ្ងាយនិងផ្លូវជិតបន្តិច។សម្រាប់អ្នកប្រកបរបររកស៊ីជួញដូរមានបញ្ហាមិនល្អនិងផលប៉ះទង្គិចច្រើនយាយី ដូចនេះទោះធ្វើអ្វីត្រូវមានចិត្តអត់ធ្មត់ ហើយធ្វើមិនដឹងមិនឮខ្លះទើបប្រសើរហោង។
រីឯបញ្ហាសេចក្តីស្នេហាកំលោះក្រមុំមានការប្រឆាំងនិងប្រទាំងប្រទើសចំពោះគ្នាច្រើន៕
ឆ្នាំរកា
រាសីស្រុតចុះ។ថ្ងៃនេះលោកអ្នកងាយធ្លាក់ខ្លួនចូលក្នុងរឿងទំនាស់អ្វីមួយណាស់ ហេតុនេះត្រូវចេះធ្វើចិត្តត្រជាក់និងធ្វើរឿងធំឱ្យទៅជាតូច ទើបជាការល្អបំផុត។ការប្រកបការងារឃើញថាពុំមានអ្វីប្រែប្រួលប្តូរផ្លាស់គួរជាទីកត់សម្គាល់ទេគឺអ្វីៗដូចសព្វមួយដង ។អ្នកប្រកបរបររកស៊ីជួញដូរវិញការធ្វើជំនួញទីជិតឆ្ងាយមិនសូវផ្តល់ផលល្អប៉ុន្មានឡើយ ពីព្រោះតែការរកផលចំណូលតានតឹង ហើយការចំណាយវិញនោះមានគ្រប់សារពើដែលសឹងរកទប់ទល់ពុំចង់ឈ្នះ។ សេចក្តីស្នេហាប្រុសស្រីកុំចង់ទុំមុនស្រគាលប្រយ័ត្នជួបរឿងទុក្ខប៉ុនភ្នំចង់ទៅមុខមិនរួចថយក្រោយក៏មិនកើត៕
ឆ្នាំច
រាសីខ្ពស់ត្រដែត។ថ្ងៃនេះបើលោកអ្នកជួបពិភាក្សាឬចង់ដោះស្រាយអ្វីមួយគឺតែងទទួលផ្លែផ្កាគ្រាន់គាប់បំណងជានិច្ច។ការប្រកបការងារតែងជឿនលឿន និងបើចង់ដាក់ពាក្យធ្វើការទីកន្លែងណាមួយក៏ជាពេលវេលាមួយល្អណាស់ដែរ ។សម្រាប់អ្នកប្រកបរបររកស៊ីជួញដូរក្នុងថ្ងៃនេះវិញទោះគ្មានចំណូលអ្វីជាដុំកំភួនតែភាពសុខដុមមានភាពប្រពៃណាស់។ បញ្ហាស្នេហាប្រុសស្រីមានការចម្រើនលូតលាស់ទៅមុខនិងកំពុងមានភាពផ្អែមល្ហែមប្រពៃ៕
ឆ្នាំកុរ
រាសីល្អជាមធ្យម។នៅថ្ងៃនេះលោកអ្នកត្រូវមានភាពឧស្សាហ៍ដាក់ខ្លួន ហើយត្រូវចេះយកចិត្តក្រុមមនុស្សបន្តិចទើបទទួលលទ្ធផលអ្វីមួយត្រឡប់មកវិញ។ការប្រកបការងារមានទាំងរឿងរាវល្អ និង អាក្រក់នៅលាយឡំគ្នាដែលធ្វើឱ្យលោកអ្នកមានទាំងរឿងរាវសប្បាយចិត្តនិងរឿងរាវទុកក្ខលំបាកតែងកើតឡើងទន្ទឹមគ្នា។ការប្រកបរបររកស៊ីជួញដូរ លោកអ្នកត្រូវលៃលកគិតគូរបញ្ជីប្រាក់កាសឱ្យបានច្បាស់លាស់ ហើយត្រូវទូទាត់ឱ្យរួចរាល់ប្រយ័ត្នកើតជម្លោះវិវាទដោយប្រការណាមួយ។ សម្ព័ន្ធស្នេហាកំលោះក្រមុំចូរប្រយ័ត្នក្រុមមនុស្សទីបីចាក់ដោតនាំកើតជម្លោះវិវាទ៕