មោះក្រឡេកមើល សហគ្រិនអលចនទ្រព្យ៖ វិធីសាស្ត្រប្រើប្រាស់លុយរបស់អ្នកមាន ឬមហាសេដ្ឋី
លោក ភិរម្យ វិចិត្រដារ៉ា ជាសហគ្រិនវ័យក្មេង តែមានសមត្ថភាពខ្ពស់អាចក្តោបក្តាប់ក្រុមហ៊ុនដល់ទៅ៤នៅក្នុងដៃ មានដូចជាក្រុមហ៊ុន អចលនទ្រព្យ ECC, សុវណ្ណវិចិត្រហ្វាយណែន, One world trading និងក្រុមហ៊ុន World Wide Dental Supplies។ តាមរយៈបទពិសោធន៍ផ្ទាល់ខ្លួន ដែលចាប់ផ្តើមអាជីវកម្មដំបូងមានលុយត្រឹមតែ៤០០ដុល្លារ រហូតច្នៃលុយដ៏តិចតួចនេះ ទៅជាលុយរាប់លានដុល្លារដល់ពេលបច្ចុប្បន្ន។ ថ្ងៃនេះពាណិជ្ជកម្មកម្ពុជាបានជួបសម្ភាសផ្ទាល់ជាលោកភិរម្យ វិចិត្រដារា ដើម្បីធ្វើការចែករំលែកអំពី«វីធីសាស្ត្រប្រើប្រាស់លុយរបស់អ្នកមាន ឬមហាសេដ្ឋី»។
លោក បានថ្លែងប្រាប់ពាណិជ្ជកម្មកម្ពុជាថា «សម្រាប់អ្នកមានគេចាយលុយមិនតាមអារម្មណ៍នោះទេ តែមនុស្សភាគច្រើន គឺចាយលុយតាមអារម្មណ៍ ដូចជាការទិញរបស់ដែលខ្លួនចូលចិត្ត តែមិនមានតម្រូវការ សម្រាប់អួតជាមួយមនុស្សដែលខ្លួនមិនចូលចិត្ត។ ឧទាហរណ៍៖ អ្នកខ្លះមានម៉ូតូហើយ តែចង់អួតប្រាប់គេថា ខ្លួនអស្ចារ្យ សុខចិត្តខ្ចីលុយគេទិញ តែលទ្ធផលត្រូវបង់លុយរៀងរាល់ខែដល់ធនាគារក៏មាន។ ប្រសិនបើយើងគ្រប់គ្រងអារម្មណ៍បាន នោះយើងអាចទប់ទល់ការចាយលុយមិនចាំបាច់បាន ព្រោះមុនស្សទូទៅពេលមានលុយ តែងចង់ដូរឡានទំនើប ម៉ូតូថ្មី ហើយនេះជាបញ្ហាផ្ទាល់ដែលលោកធ្លាប់បានឆ្លងកាត់។
លោកបានបន្តថា អ្នកមានតែងតែសន្សំមុនចំណាយ តែមនុស្សទូទៅចាយលុយហើយ បានសន្សំ។ អ្នកមានជាច្រើននាក់ គេចាត់ទុកកាសន្សំជាផ្នែកមួយដ៏សំខាន់នៃវិធីសាស្ត្រប្រើប្រាស់លុយ ឲ្យតែមានចំណូលមិនថាតិច ឬច្រើន គេតែងដកខ្ទង់សន្សំទុកជានិច្ច។ សម្រាប់លោកភិរម្យ វិចិត្រដារា ផ្ទាល់ លោកបានដក២០ភាគរយនៃចំណូលរបស់ខ្លួនសម្រាប់ខ្ទង់សន្សំ ហើយតែងមានទម្លាប់សន្សំមុនចំណាយ សន្សំសម្រាប់វិនិយោគ។ លោកបានសង្ងត់ធ្ងន់ថា យើងត្រូវបង្កើតខ្ទងសន្សំដាច់ដោយឡែក សម្រាប់ទុកសន្សំរាល់ខែ ព្រោះការធ្វើបែបនេះ គឺជាវិន័យមួយសម្រាប់មនុស្សក្នុងការចាត់ចែងលុយ។ យើងត្រូវប្រើប្រាស់យុទ្ធសាស្ត្រសន្សំមុនចំណាយ មិនសំខាន់ចំនួនលុយប៉ុន្មាននោះទេ តែសំខាន់គឺទម្លាប់ក្នុងការសន្សំ។
លោកបានបន្តទៀតថា «ការចំណាយ ត្រូវតែទិញលើគុណតម្លៃ កុំទិញតម្លៃ» លោកបានសង្កេតឃើញថា មនុស្សទូទៅតែងទិញលើតម្លៃ ឧទហរណ៍៖ ស្បែកជើងមានតម្លៃ១០ដុល្លារ ហើយមួយទៀតតម្លៃ៣០ដុល្លារ តែស្បែកតម្លៃ១០ដុល្លារ ប្រើបានត្រឹមរយៈពេលខ្លី។ មនុស្សទូទៅចង់ទិញរបស់ថោកគ្មានគុណតម្លៃ ប្រើប្រាស់មិនបានយូរ។ ដូច្នេះយើងត្រូវទិញរបស់ ត្រូវគិតទៅតាមគុណតម្លៃ ចៀសវាងទិញតាមអារម្មណ៍ យើងត្រូវទិញរបស់ណាដែលចាំបាច់ក្នុងការប្រើប្រាស់ ចៀសវាងការទិញគ្រាន់តែមានតម្លៃថោក។ ជាក់ស្តែងការទិញអចលនទ្រព្យ មានអ្នកខ្លះទិញដីរៀងធូរថ្លៃ ហើយមានអ្នកខ្លះទិញតម្លៃថ្លៃបន្តិច តែវាងាយស្រួលលក់ និងឡើងថ្លៃលឿន។ ហើយអ្នកមានតែងតែទិញរបស់ផ្តោតលើគុណតម្លៃ ជាជាងការទិញរបស់មានតម្លៃថោកតែគ្មានគុណភាពល្អ។
លោកបានបន្ថែមថា លុយសម្រាប់សន្សំនេះ គឺសម្រាប់វិនិយោគ មិនសន្សំដើម្បីសន្សំនោះទេ។ យើងត្រូវចាត់ទុកលុយដែលបានសន្សំជាគ្រាប់ពូជ សម្រាប់ដំាដំណាំ បើយើងហ៊ានតែហូបគ្រាប់ពូជអស់នោះ យើងនិងគ្មានអ្វីសម្រាប់ដំាដុះនោះទេ។ មនុស្សជាច្រើនមានបញ្ហាលុយសម្រាប់វិនិយោគ ព្រោះគេគ្មានខ្ទង់សម្រាប់សន្សំ ដូច្នេះបើយើងប្រើទម្លាប់ក្នុងការសន្សំទុកចំណាយ នោះវានិងលេងជាបញ្ហាទៀតហើយ។ ពេលដែលយើងមានលុយនៅក្នុងដៃ ពេលឱកាសវិនិយោគហុចឲ្យ យើងអាចវិនិយោគបានភ្លាមៗ។ លោកលើកទឹកចិត ដំបូងយើងគួរសន្សំសម្រាប់វិនិយោគលើខ្លួនឯងសិន ព្រោះបើយើងវិនិយោគលើខ្លួនឯង ដូចជាការរៀនសូត្រ ចូលរួមសិកា្ខសាលា ពេលនោះឱកាសនិងកើតឡើងមកតាមក្រោយមិនខាន។
លោកបានបញ្ជាក់ទៀតថា ការធ្វើជំនួញ គឺជាដោះស្រាយបញ្ហាយកប្រាក់ចំណេញ ចឹងដើម្បីវិនិយោគបាន ដំបូងយើងត្រូវវិនិយោគលើខ្លួនឯង ដើម្បីឈរជើងធ្វើជាថៅកែ ធ្វើអាជីវកម្មបាន។ ដូច្នេះយើងត្រូវចាប់ផ្តើមអាជីវកម្មបាន ត្រូវចាប់ផ្តើមប្រើប្រាស់លុយតាមវិធីខាងលើនេះ ព្រោះយើងមិនអាចយកលុយទំាងស្រុងមកវិនិយោគភ្លាមៗបាននោះទេ។ តែយើងអាចវិនិយោគលើខ្លួនឯង ដោយចូលរួមសិក្ខាសាលា សេពគប់ជាមួយមនុស្សជោគជ័យ ឬក៏អាចដាក់ទុនវិនិយោគជាមួយមនុស្សជោគជ័យលើវិស័យអចលនទ្រព្យជាដើម។ យើងត្រូវវិនិយោគលើទ្រព្យ កុំវិនិយោគលើបំណុល ហើយការសន្សំលុយទុកស្មើនិងយើងអ្នកចាញ់ ព្រោះលុយ១០០០ថ្លៃនេះ ប្រហែលជាមិនមានតម្លៃស្មើនៅឆ្នាំក្រោយទេ ហើយវាចាប់ផ្តើមខាតបន្តិចម្តងៗ៕
