ក្រោយគំនិតកែច្នៃហាងក្នុងទំនិញក្នុងទ្វិបអាស៊ី អាចនឹងក្លាយជាទីផ្សារដ៏ធំបំផុតក្នុងពិភពនៅឆ្នាំ២០២៣ខាងមុខនេះ
យោងតាមរបាយការណ៍ IGD បានបង្ហាញថានៅក្នុងឆ្នាំ២០២៣ តម្លៃទីផ្សារហាងលក់ទំនិញក្នុងតំបន់អាស៊ីសរុបនឹងមានទំហំប្រាក់ប្រមាណជាង៤.២៦៤ទ្រីលានដុល្លារសហរដ្ឋអាមេរិកឯណោះ គឺកើនឡើងជាង១.១៣៨ទ្រីលានដុល្លាអាមេរិក បើធៀបទៅនឹងឆ្នាំមុន ដែលនេះគឺជាចំនួនមួយដែលសឹងតែស្មើរនឹងទំហំទឹកប្រាក់របស់ទីផ្សារហាងទំនិញសរុបរបស់សហភាពអឺរ៉ុបនិងអាមេរិកបូកបញ្ជូលគ្នា។
ការសិក្សាបានបង្ហាញថា ការពិតអាស៊ី គឺជាតំបន់ដែលមានទីផ្សារហាងលក់ទំនិញធំជាងគេក្នុងពិភពលោករួចមកហើយ ដូច្នេះហើយទំហំទីផ្សារក្នុងអាស៊ីអាចនឹងកើន៦ភាគរយបន្ថែមទៀតចន្លោះពីឆ្នាំ២០១៨ ដល់ ២០២៣។ ក្នុងនោះប្រទេសដែលនឹងមានទំហំទីផ្សារជាងគេស្មើនឹង៧៤ភាគរយ ក្នុងចំណោមទីផ្សារក្នុងអាស៊ីមានដូចជា ប្រទេសចិន ឥណ្ឌា ម៉ាឡេស៊ី ប៉ាហ្គីស្ថាន និងវៀតណាម ដែលជាប្រទេសមានប្រជាជនរស់នៅច្រើនជាងគេ នឹងបន្ដការនូវការលូតលាស់ និងជាប្រទេសផ្គត់ផ្គង់ទំនិញ និងលក់ទំនិញដល់ពិភពលោកនឹងបន្ដកើនឡើងបន្ថែមក្នុងឆ្នាំ ២០២៣។
មួយវិញទៀតចិននឹងបន្ដដើរមុខគេក្នុងពិភពលោក ដែលជាតិសាសន៍មួយមានការរីកចម្រើនខ្លាំងជាងគេខាងផ្នែក ហាងលក់ទំនិញជាប់គ្នា៣ឆ្នាំមកហើយ ក៏នៅរក្សាជំហររបស់ខ្លួនជាប្រទេសទីមួយ ដែលមានទីផ្សារហាងលក់ទំនិញធំជាងគេក្នុងពិភពលោកដល់ឆ្នាំ២០២៣ ព្រោះហាងលក់ទំនិញនៅក្នុងប្រទេសចិន គឺមានច្នៃប្រឌិតខ្ពស់ សូម្បីតែសហរដ្ឋអាមេរិក ដែលជាប្រទេសមហាអំណាចទីមួយក្នុងពិភពលោក បែរជាឈរក្រោមចិនទៅវិញ ក្នុងវិស័យទីផ្សារហាងទំនិញ។ គ្រប់ហាងលក់ទំនិញទាំងអស់នៅក្នុងប្រទេសចិនមានបំពាក់អ៊ីនធឺណេត គ្រប់ហាងទំនិញនីមួយៗនៅក្នុងប្រទេសចិនសុទ្ធតែរកស៊ីតាមលក្ខណៈអាជីវកម្មអេឡិចត្រូនិក បូករួមទាំងទំហំនៃប្រជាជនចិន ដែលជាហេតុធ្វើឲ្យទីផ្សារហាងទំនិញរបស់ចិនមានទំហំធំ និងលូតលាស់ជាងប្រទេសនានាក្នុងពិភពលោក។
ការកើនឡើងនៃទីផ្សារហាងទំនិញបានផ្ដល់នូវអត្ថប្រយោជន៍ជាច្រើនដល់ប្រជាជន សេដ្ឋកិច្ចជាតិនៅតាមប្រទេសនីមួយៗ ក៏ដូចជាការហូរចូលនូវបច្ចេកវិទ្យាទំនើបៗជាច្រើន ថែមទៀតផង។ ទីផ្សារលក់ទំនិញទាំងតាមអនឡាញ និង ក្រៅអនឡាញនឹងមានសន្ទុះខ្លាំងជាងមុន។ IGD បានរកឃើញថាហាងទំនិញអនឡាញនឹងស្ទុះបានលឿនជាងគេ ជាពិសេសប្រភេទហាងលក់វត្ថុអនុស្សាវរីយ៍ ។
ទ្វីបអាស៊ី គឺតំបន់មានសកា្ដនុពលពោរពេញទៅដោយការបង្កើតថ្មី ដូចនេះហើយយើងអាចរំពឹងទុកបានថា៥ឆ្នាំ ទៅមុខនេះទ្វីបអាស៊ីនឹងក្លាយទ្វីបមួយមានសន្ទុះសេដ្ឋកិច្ចខ្លាំងគេបំផុតខាងទីផ្សារហាងលក់ទំនិញ និងទទួលនូវដៃគូពាណិជ្ជកម្មធំៗជាច្រើនថែមទៀតផង៕