អស្ចារ្យមែនទែន ! ក្រុមហ៊ុនហ្វេសប៊ុកនឹងបញ្ចេញបច្ចេកវិទ្យាថ្មីនៅឆ្នាំ២០២០មិនធ្លាប់មាន ឈ្មោះថា GlobalCoin
មួយរយៈនេះដំណឹងទាក់ទងនឹងលុយឌីជីថលរបស់ Facebook មានឥតដាច់បើទោះជាគ្មានការប្រកាសជាផ្លូវការណាមួយពីក្រុមហ៊ុនក៏ដោយ ប៉ុន្តែម្ដងនេះកាន់តែច្បាស់មែនទែនហើយ ដោយបើតាមរបាយការណ៍មួយពីសារពត៌មានអង់គ្លេស BBC បានឱ្យដឹងថា Facebook នឹងបញ្ចេញលុយឌីជីថលរបស់ខ្លួននៅឆ្នាំក្រោយនេះឯង ដោយបានដាក់ឈ្មោះថា “GlobalCoin”។
របាយការណ៍ដដែលនោះបានឱ្យដឹងថា Facebook នឹងធ្វើការតេស្ដសាកល្បងជាចុងក្រោយមុននឹងបញ្ចេញជាផ្លូវការនៅចុងឆ្នាំ២០១៩នេះ ជាមួយនឹងពត៌មានទាក់ទងនឹងលុយឌីជីថលរបស់ក្រុមហ៊ុនបណ្ដាញសង្គមយក្សមួយនេះកាន់តែលម្អិត ហើយសម្រាប់ឆ្នាំក្រោយវិញនឹងបញ្ចេញជាផ្លូវការដំបូងសម្រាប់ប្រើតែបួន ដប់ប្រទេសសិនតែប៉ុណ្ណោះ ដោយស្ថិតក្នុងទម្រង់ប្រើប្រាស់ជាប្រព័ន្ធទូរទាត់ប្រាក់។
ជាមួយគ្នានេះផងដែរ BBC បានលើកឡើងថា Facebook បានទាក់ទងជួបពិភាក្សារជាមួយនឹងប្រធានធនាគារជាតិរបស់ប្រទេសអង់គ្លេសរួចរាល់ហើយទាក់ទិនទៅនឹងហានិភ័យក៏ដូចជាឱកាសសម្រាប់លុយប្រភេទនេះ បន្ថែមពីនេះផងដែរ ក៏មានភ្លើងខៀវពីមន្ត្រីដែលធ្វើការទាក់ទងទៅនឹងរឿងលុយឌីជិថលរបស់អាមេរិក។
ជាងនេះទៅទៀត ស្ថាប័នហិរញ្ញវត្ថុលំដាប់ពិភពលោកក៏កំពុងតែចរចារនិយាយជាមួយនឹង Facebook ដែរតាមរយៈលុយឌីជីថល GlobalCoin នេះដូចជាក្រុមហ៊ុនល្បីល្បាញខាងវេរលុយឆ្លងទ្វីប Western Union ដោយហេតុតែបើសិនជាបច្ចេកវិទ្យាលុយឌីជីថលរបស់ Facebook ដំណើរការល្អមែននោះ ថ្លៃ និងរយៈពេល នឹងកាន់តែប្រសើរសម្រាប់អតិថិជនរបស់ខ្លួន ជាពិសេសអ្នកគ្មានកុងធនាគារក៏អាចផ្ញើរផ្ទេរឱ្យគ្នាបានដែរ។
គូសបញ្ជាក់ផងដែរថានេះមិនមែនជាលើកដំបូងទេដែល Facebook ចាប់អារម្មណ៍ទៅលើលុយឌីជីថលនេះ ដោយកាលពី១០ឆ្នាំមុន Facebook ធ្លាប់បញ្ចេញលុយឌីជីថលម្ដងរួចទៅហើយ ដោយបានដាក់ឈ្មោះថា Facebook Credits ដែលអ្នកប្រើប្រាស់ Facebook អាចប្រើវាបានក្នុងការទិញឥវ៉ាន់ឬចាយលុយលើ App ផ្សេងៗដែលភ្ជាប់ទៅនឹង Facebook ប៉ុន្តែត្រូវបរាជ័យទៅវិញដោយសារគ្មានអ្នកចាប់អារម្មណ៍។
គេមិនទាន់អាចដឹងថា លុយឌីជីថលថ្មីមួយនេះអាចប៉ះពាល់ដល់លុយឌីជីថលផ្សេងទៀតយ៉ាងណានោះទេ ខណៈដែលតម្លៃលុយឌីជីថលចាស់វស្សា Bitcoin កំពុងតែឡើងសន្សឹមៗក្បែរមួយម៉ឺនដុល្លារ ហើយមានលុយឌីជីថលផ្សេងទៀតដូចជា LiteCoin និង Etherum ជាដើមនោះ។ យ៉ាងណាក៏ដោយសម្រាប់ធនាគារជាតិនៃកម្ពុជាយើងមិនទាន់មានប្រកាសទទួលស្គាល់លុយឌីជីថលណាមួយនៅឡើយនោះទេ៕