ខ្លាច COVID-19 ពេក! YangZi រុំជិតស្ទើរតែចំណាំមិនបានពេលចេញក្រៅទៅថតរឿង

ដូចដែលប្រិយមិត្តបានជ្រាបរួចមកហើយថា វីរុស COVID-19 នៅតែជាក្ដីបារម្ភសម្រាប់ប្រជាជនចិន ក៏ដូចជាមនុស្សទូទាំងពិភពលោកផងដែរ។ ដូច្នេះហើយនៅពេលដែលដើរចេញទៅណា គឺត្រូវតែប្រុងប្រយ័ត្ន និងការពារឲ្យបានត្រឹមត្រូវដើម្បីចៀសវាងកាលឆ្លងនូវវីរុសប្រភេទថ្មីនេះ។

ជាក់ស្ដែង កាលពីពេលថ្មីៗ នេះ តារាសម្ដែងស្រីកំពុងមានប្រជាប្រិយភាពក្នុងប្រទេសចិន YangZi បានធ្វើឲ្យអ្នកគាំទ្រជាច្រើនភ្ងាក់ផ្អើល និងហាក់ដូចជាអស់សំណើចបន្ដិចនៅពេលដែលឃើញនាងរុំជិតស្ទើរមើលមិនស្គាល់នៅឯព្រលានយន្ដហោះ ដើម្បីធ្វើដំណើរទៅថតរឿងភាគថ្មីរបស់ខ្លួន “The Golden Hairpin”។

ក្នុងនោះផងដែរ គេសង្កេតឃើញតារាស្រីរូបនេះ ពាក់ម៉ាស់ការពារ ពាក់មួក ពាក់របាំងការពារមុខ ថែមទាំងពាក់អាវភ្លៀងរញ៉េរញ៉ៃ ដែលលេចធ្លោមើលមិនច្រលំជាមួយគេតែម្ដង។ ក្រោយពីបានឃើញបែបនេះ ក៏មានមតិជាច្រើនបានបញ្ចេញថា តារាស្រីរូបនេះ ស្រលាញ់សុខភាព ចេះការពារត្រឹមត្រូវ ប៉ុន្ដែក៏មានមតិមួយចំនួនបានលើកឡើងថា នាងខ្លាចជ្រុលហួសហេតុ ព្រោះអ្នកនៅជុំវិញនាងគ្មាននរណារុំជិត និងការពារដល់ម្លឹងនោះទេ។ យ៉ាងណាមិញ នេះគ្រាន់តែជាការបញ្ចញមតិរបស់មហាជនប៉ុណ្ណោះ អ្វីដែលសំខាន់គឺត្រូវការពារសុខភាពរបស់ខ្លួនឲ្យបានត្រឹមត្រូវ៕

 

 

អត្ថបទដោយ៖ ស្រីពេជ្រ