សម្ដែងជាមួយតារាប្រុសក្មេងទៀត! ស្រីស្អាត Dilraba នឹងត្រៀមខ្លួនត្រលប់មកវិញជាមួយរឿងភាគបុរាណថ្មី

ក្រោយពីទទួលបានជោគជ័យក្នុងរឿង “និស្ស័យស្នេហ៍ទេវតាបីជាតិ វគ្គ ២” ស្រីស្អាតច្រមុះស្រួច Dilraba នឹងត្រៀមត្រលប់មកបម្រើអារម្មណ៍ប្រិយមិត្តជាមួយនឹងរឿងភាគបុរាណថ្មីក្នុងពេលឆាប់ៗ​ នេះហើយ។ នេះបើយោងតាមប្រភពព៌មាន 38jiejie។

រឿងភាគដែលតារាស្រីរូបស្រស់នេះត្រៀមសម្ដែងមានចំណងជើងថា “Chang Ge Xing” ឬ “长歌行”។ អ្វីដែលកាន់តែគួរឲ្យចាប់អារម្មណ៍នោះគឺលើកនេះ Dilraba នឹងចាប់ដៃគូជាមួយនឹងតារាសម្ដែងប្រុសវ័យក្មេង Wu Lei ដែលមានអាយុតិចជាងរូបនាងដល់ទៅ ៧ ឆ្នាំ។ បើទោះជាមានមតិរិះគន់មួយចំនួនថា អ្នកទាំងពីរមិនសាកសមគ្នាក៏ពិតមែន ប៉ុន្ដែវាគ្រាន់តែជាការលើកឡើងរបស់មហាជនមួយចំនួនប៉ុណ្ណោះ។ មែនទែនទៅ មានដៃគូសម្ដែងជាច្រើនដែលតួស្រីអាយុច្រើនជាង តួប្រុស ហើយត្រូវបានគេរិះគន់យ៉ាងចាស់ដៃ តែចុងក្រោយពួកគេនៅតែអាចបង្វែរការចាប់អារម្មណ៍របស់អ្នកគាំទ្រឲ្យងាកមកតាមដានរឿងភាគរបស់ពួកគេបានដោយរលូន។

ថ្វីបើថ្ងៃចាក់បញ្ចាំងរឿងភាគដ៏ថ្មីស្រឡាងមួយនេះ មិនទាន់មានការបញ្ជាក់ច្បាស់លាស់ ក៏ប៉ុន្ដែបានធ្វើពិធីសែនព្រេនដើម្បីជាកិច្ចចាប់ផ្ដើមថត និងត្រៀមបើកាមេរ៉ាថតក្នុងពេលឆាប់ៗ នេះហើយ៕

អត្ថបទដោយ៖ ស្រីពេជ្រ