ដឹងតែល្អមើលតែម្ដង! ត្រលប់មកវិញជាមួយរឿងភាគថ្មី តួឯកប្រុសរឿង F4 នឹងសម្ដែងជាតួអង្គ…

ជឿជាក់ថាប្រិយមិត្តជាច្រើនបានស្គាល់រួចមកនូវតារាសម្ដែងប្រុសវ័យក្មេងរូបសង្ហារ Dylan Wang ព្រោះរូបលោកបានបង្ហាញវត្តមានក្នុងរឿងភាគល្បី F4 កាលពីឆ្នាំ ២០១៨ ដែលរឿងភាគមួយនេះបានឆក់យកបេះដូងអ្នកគាំទ្រជាច្រើនកំឡុងពេលចាក់ផ្សាយ។

មែនទែនទៅ តារាសម្ដែងប្រុសវ័យ ២២ ឆ្នាំ រូបនេះ ក៏ត្រូវបានរាយការណ៍ថា កំពុងតែថតរឿងភាគបុរាណថ្មីដែលមានចំណងជើងថា “YuLong” ដែលដកស្រងចេញពី Game ដ៏ល្បីក្នុងប្រទេសចិន។ ក្នុងរឿងភាគថ្មីនេះផងដែរ លោកនឹងចាប់ដៃសម្ដែងរួមគ្នាជាមួយតារាសម្ដែងស្រី Zhu Xudan ជាតួស្រីក្នុងរឿង និស្ស័យស្នេហ៍ទេវតាបី​ជាតិ។ រឿងភាគមួយនេះនឹងនិយាយពីដំណើរស្នេហារបស់រាជបុត្រស្ដេចនាគសក់សរូបសង្ហារដែលជាកំពូលបុរសកំពូលស្មោះស្នេហ៍ និងអ្នកបំរើស្រីស្មោះត្រង់ម្នាក់ ជារឿងរ៉ាវស្នេហាដ៏ល្បីរំជួលចិត្តមួយ។

គួររំលឹកផងដែរថា នេះគឺជាលើកទី ១ ដែលតារាសម្ដែងប្រុស-ស្រី មូយគូនេះ សម្ដែងរួមគ្នា។ ថ្វីបើមានអាយុខុសគ្នាដល់ទៅ ៦ ឆ្នាំ តែអ្នកទាំងពីរនៅតែមើលទៅសមគ្នា និងត្រូវបានអ្នកគាំទ្រជាច្រើនក្នុងបណ្ដាញសង្គម Weibo សរសើរ និងលើកទឺកចិត្តពួកគេសម្រាប់ការថតរឿងភាគថ្មីនេះ៕

អត្ថបទដោយ៖ ស្រីពេជ្រ