ក្ដៅក្រហាយអ្នកកាសែតតាមរំខានពេក! ស្រាប់តែតួប្រុស Zhang Yujian ធ្វើបែបនេះតែម្ដង

ដូចពាក្យគេថា កាន់តែមានប្រជាប្រិយភាព ជីវិតឯកជនកាន់តែត្រូវគេតាមយាយី និងប្រមាញ់ឥតឈប់។ មែនទែនទៅ បទពិសោធទាំងអស់នេះ តារាល្បីលំដាប់ប្រទេសជាច្រើនបានឆ្លងកាត់រួចមកហើយជាពិសេសក្នុងប្រទេស ចិន ផ្ទាល់តែម្ដង។ ជាក់ស្ដែង កាលពីពេលថ្មីៗ នេះ តារាសម្ដែងប្រុស Zhang Yujian ក៏ត្រូវបានជួបនឹងរឿងរ៉ាវទាំងអស់នេះដូចគ្នា បន្ទាប់ពីប្រជាប្រិយភាពរបស់លោកហាក់ដូចមានសន្ទុះជាងមុន ក្រោយលេចវត្តមានក្នុងរឿងភាគ Le Coup De Foudre  និង An Oriental Odyssey ជាដើម ។  ថ្វីបើមិនមែនជា តារាសម្ដែងប្រុសដែលមានភាពលេចធ្លោជាងគេ ក៏ប៉ុន្ដែក៏ចាត់ទុកថាជាតារាមានឈ្មោះបោះសំឡេងគួរសម ដូច្នេះហើយជីវិតរបស់លោកក៏ចៀសមិនផុតពីការតាមប្រមាញ់របស់អ្នកសារពត៌មានដែរ។

ជាមួយគ្នានេះ តារាប្រុសវ័យ ៣០ ឆ្នាំ រូបនេះ ក៏បានបង្ហោះរូបភាពមួយក្នុងបណ្ដាញសង្គមរបស់ខ្លួន ដោយមានភ្ជាប់ជាមួយពាក្យពេចន៍យ៉ាងដូច្នេះថា៖ «សុំឈប់រំខានខ្ញុំទៀតទៅ ខ្ញុំពិតជាខ្លាច បើទោះពេលនេះខ្ញុំផ្សព្វផ្សាយឲ្យផលិតផលច្រើន តែខ្ញុំរកលុយមិនបានច្រើនទេ។ ដូច្នេះខ្ញុំត្រូវស្វែងរកវត្ថុការពារខ្លួនពីបន្ទប់ដាក់ឥវ៉ាន់ តែវាថ្លៃបើទោះជាមានរឿងក៏ខ្ញុំមិនហ៊ានប្រើវាដែរ»។

មែនទែនទៅ ការបង្ហោះរូបនេះ គ្រាន់តែជាការឌឺដង ផ្លែផ្ដាដាក់អ្នកដែលតាមយាយីខ្លួនប៉ុណ្ណោះ ហើយរូបលោកក៏ចង់បញ្ជាក់ប្រាប់ថា លោកមិនខ្លាចពួកគេនោះឡើយ ហើយលោកក៏អាចកំដរពួកគេបានគ្រប់ពេលដែរ៕

អត្ថបទដោយ៖ ស្រីពេជ្រ