ខ្លាំងបាត់! ឈានជើងចូលប៉ុស្តិ៍លេខ៣ភ្លាម Bow បានដំណែងតួឯកជាមួយ Nadech ភ្លែត ក្នុងរឿង…
គ្រាន់តែដំណឹងថាកញ្ញា Bow Maylada អតីតតារារបស់ប៉ុស្តិ៍លេខ៧ បានចុះកុងត្រាជាមួយប៉ុស្តិ៍លេខ៣ថៃ ក៏បានធ្វើឲ្យអ្នកគាំទ្រជាច្រើនហ៊ោរកញ្ជ្រៀវត្រេកអរយ៉ាងខ្លាំងរួចទៅហើយ ប៉ុន្តែគេមិននឹកស្មានថាលឿនយ៉ាងនេះ ព្រោះដំណឹងដែលកាន់តែធ្វើឲ្យអ្នកទស្សនារំភើបខ្លាំងជាងនេះទៅទៀតនោះ គឺស៊ីញ៉េកុងត្រារួចភ្លាម Bow ទទួលបានដំណែងតួឯកនៅក្នុងរឿងភាគថ្មីភ្លែត ជាមួយតារាប្រុសកំពូលគឺលោក Nadech Kugimiya។
ព័ត៌មាននេះ ធ្វើឲ្យអ្នកគាំទ្រជាច្រើននាំគ្នារីករាយអបអរដល់ Bow ដែលចូលភ្លាមទទួលបានការងារភ្លែត វាហាក់បីដូចជាត្រូវរង្វាន់ធំអញ្ចឹង។ អ្វីដែលកាន់តែពិសេស នាងបានប៉ះគូជាលើកដំបូងជាមួយលោក Nadech តារាកំពូលមានកេរ្តិ៍ឈ្មោះល្បីល្បាញខ្លាំង ហើយកន្លងមកក៏មានតារាស្រីមិនតិចនាក់នោះទេដែលប៉ងចង់រួមការងារជាមួយលោក តែក៏មិនបានដូចចិត្ត។
បើយោងតាមប្រភពព័ត៌មាន ភាពយន្តភាគថ្មីដែលតម្រូវឲ្យ Bow សម្ដែងគូជាមួយ Nadech នោះមានចំណងជើងថា« Miti Thi Sarm» ដែលរឿងនេះពីដំបូងឡើយ បានតម្រូវឲ្យតារាស្រីកញ្ញា Taew Natapohn ជាតួឯកស្រី។ ចំណែកឯសាច់រឿង ឬពេលវេលាថតនៅពេលណាឲ្យប្រាកដនោះមិនទាន់ត្រូវបានគេបញ្ជាក់ឲ្យដឹងនៅឡើយទេ ដូចច្នេះមានតែប្រិយមិត្តរង់ចាំតាមដានបន្តទៀត៕