ថាមែនមែន! ទីបំផុត Patricia ចេញមុខនិយាយទាំងយំ ពីទំនាក់ទំនងខ្លួននិង Note Vises!
ដូចប្រិយមិត្តបានជ្រាបអញ្ចឹងថា រឿងរ៉ាវបែកបាក់គ្នារវាងតារាសម្ដែងថៃប្រុសលោក Peach Pachara និងកញ្ញា Patricia Good នៅតែធ្វើឲ្យមហាជនជាច្រើនសោកស្ដាយ តែអ្វីដែលភ្ញាក់ផ្អើល ក្រោយមករូបភាពរបស់ Patricia និងលោក Note Vises នៅជាមួយគ្នា ត្រូវបែកធ្លាយកាន់តែច្រើន ធ្វើឲ្យមហាជនសង្ស័យលោក Note Vises ថាជាជនទី៣ ទោះបីជាអ្នកទាំងពីរបានបកស្រាយថា គ្រាន់តែរាប់អានគ្នាធម្មតាក៏ពិតមែន។
តែយ៉ាងណាមិញ ដោយសារតែរូបភាពបែកធ្លាយកាន់តែច្រើនឡើងៗ ស្រាប់តែកាលពីយប់ថ្ងៃទី០៣ ខែសីហាម្សិលមិញនេះ Patricia បានបកស្រាយពីទំនាក់ទំនងរបស់ខ្លួនជាមួយលោក Note ទាំងទឹកភ្នែក នៅចំពោះមុខអ្នកកាសែតថា៖
«វាពិតជាលឿនពេកហើយ ដែលខ្ញុំចាប់ផ្ដើមស្នេហាថ្មីម្ដងទៀត ប៉ុន្តែខ្ញុំបានប្រើពេលសម្រាប់ការខូចចិត្ត រយៈពេលយូរគួរសមដែរហើយ វាល្មមដល់ពេលដែលខ្ញុំចង់មានក្តីសុខខ្លះហើយ។ រូបជាច្រើនរបស់ខ្ញុំជាមួយបងNote បានបែកធ្លាយមិនថារូបដែលទៅដើរលេង រូបនៅក្នុងឡាន វាកើតក្រោយពេលដែលខ្ញុំបែកគ្នាដាច់ស្រេច ជាមួយបង Peach មួយរយភាគរយ។ ខ្ញុំនិងបង Note បានស្គាល់គ្នារយៈពេលពីរខែ ហើយពួកយើងចាប់ផ្ដើមទៅណាមកណាជាមួយគ្នា ពេលខ្ញុំត្រឡប់មកពីក្រៅប្រទេស ហើយពេលនេះខ្ញុំបានបែកគ្នាជាមួយ Peach ហើយ។ ម្យ៉ាងវិញទៀត បង Note ក៏បានដឹងរឿងនេះដែរ។ ហើយចំពោះពាក្យថា «មិនជិតស្និត» ដែលខ្ញុំបានផ្ដល់បទសម្ភាសន៍កាលពីលើកមុននោះ មកពីខ្ញុំមិនបានបកស្រាយឲ្យល្អិតល្អន់ ហើយមួយវិញទៀត ប្រសិនបើខ្ញុំនិយាយថាជិតស្និត គ្រប់គ្នាប្រាកដជាថាខ្ញុំនិងបង Note ជាសង្សារនិងគ្នាហើយ ប៉ុន្ដែនៅពេលនោះពួកយើងទើបតែចាប់ផ្ដើមនិយាយជាមួយនិងគ្នាតែប៉ុនណោះ។ នេះជាកំហុសខ្ញុំដែលបកស្រាយមិនបានច្បាស់។ ពេលនេះខ្ញុំ និងបង Note កំពុងតែមើលចិត្តគ្នាទៅវិញទៅមក មិនទាន់មានឈ្មោះជាអ្វីឲ្យពិតប្រាកដនោះទេ ហើយពេលដែលខ្ញុំបញ្ចប់រឿងដាច់ស្រេច ទើបគាត់ចូលមកផ្ដើមទំនាក់ទំនង»។
លើសពីនេះទៅទៀត Patricia បញ្ជាក់ម្ដងទៀតថា «មូលហេតុដែលខ្ញុំចេញមកបកស្រាយម្ដងទៀត គឺគ្រាន់តែចង់បញ្ជាក់ឲ្យបានល្អិតល្អន់ជាមុន និងចង់ឲ្យគ្រប់គ្នាដឹងថា រឿងដែលថាខ្ញុំលួចទាក់ទងអ្នកផ្សេង ឬលួចក្បត់ចិត្តវាមិនមែនជាការពិតនោះទេ»។
គួរបញ្ជាក់ផងដែរថា គ្រាន់តែ Patricia បកស្រាយចប់ភ្លាម នាងក៏ខ្ទប់មុខយំ និងបានដើរចេញពីក្រុមអ្នកកាសែតតែម្តង៕
អត្ថបទដោយ៖សុីវលី