អ្នកគាំទ្រកំពុងទន្ទឹងរងចាំការសហការបស់ក្រុម EXO ជាមួយ IU ឆាប់ៗនេះហើយមានអ្វីប្លែកខ្លះក្រោយសម្តែងរួមគ្នា
កូរ៉េខាងត្បូង ៖ បន្ទាប់ពីការចូលរួមក្នុងកិច្ចសម្ភាសនៅក្នុងស្ថានីយ៍វិទ្យុមួយ ដែលមានសមាជិកក្រុម EXO នោះគឺលោក Chen បានក្លាយជាភ្ញៀវពិសេសផងដែរ អ្វីដែលជាការចាប់អារម្មណ៍នោះ អ្នកគាំទ្របានផ្ញើសារទៅកាន់កម្មវិធីដោយបានលើកឡើងចង់ឲ្យលោកច្រៀងជាមួយតារាចម្រៀងស្រី IU ព្រោះអ្នកទាំង២សមគ្នាខ្លាំងណាស់។
ជាការឆ្លើយតប លោក Chen បានឲ្យដឹងថា ចំពោះការសំណូមពររបស់ប្រិយមិត្ត គឺជាអ្វីដែលលោកតែងតែសង្ឃឹមចង់បាន តាំងពីយូរណាស់មកហើយ ព្រោះលោកក៏ជាម្នាក់ក្នុងចំណោម អ្នកគាំទ្ររបស់ IU ផងដែរ។ សូម្បីតែរាល់យប់ ពេលដែលលោកកំពុងតែរៀបចំបទចម្រៀងថ្មី លោកក៏តែងតែស្ដាប់បទចម្រៀងរបស់ IU។
Chen បានកោតសរសើរចំពោះទេពកោសល្យរបស់ IU ដែលជាតារាស្រី ទទួលបានការស្រលាញ់ និងការគាំទ្រយ៉ាងច្រើន ពីសំណាក់តារាៗនៅក្នុងវិស័យសិល្បៈកូរ៉េ។
លោកបានបញ្ជាក់បន្ថែមថា នៅថ្ងៃណាមួយលោកនឹងមានការសហការជាមួយ IU ហើយស្វែងរកអ្វីដែលប្លែកមកសម្តែងជូនប្រិយមិត្ត ដោយមិនឲ្យខុសចិត្តអ្នកគាំទ្រនោះទេ៕
