ធ្លាប់តែតាមដានរឿង F4 ចុះមានដឹងថារឿងមួយនេះមានប្រភពមកពីណាអត់?

ប្រិយមិត្តដែលនិយមតាមដានរឿងភាគច្បាស់ណាស់ថាភាគច្រើនសុទ្ធសឹងតែបានស្គាល់នូវរឿង F4 ជាក់ជាមិនខាន ព្រោះវាជាប្រភេទរឿងមនោសញ្ចេតណាយុវវ័យមួយដែលទទួលបានការគាំទ្រពីបណ្ដាអ្នកគាំទ្រជាច្រើនស្ទើរតែនៅជុំវិញពិភពលោក ជាពិសេសក្នុងតំបន់អាស៊ីយើងតែម្ដង ហើយអ្នកគាំទ្ររឿងភាគមួយនេះមិនមែនមានតែយុវវ័យនោះទេ សូម្បីតែមនុស្សចាស់មួយចំនួនក៏ជាអ្នកគាំទ្រយ៉ាងសម្បើមផងដែរ។

ជាការពិតទៅរឿងមួយនេះមានដើមកំណើតចេញមកពីសៀវភៅ Manga របស់ប្រទេសជប៉ុន ដែលមានចំណងជើងថា «Hana Yori Dango» រឺក៏ជាភាសាអង់គ្លេសថា «Boy Over Flower» ដែលបានបោះពុម្ពផ្សាយជាលើកដំបូងក្នុងឆ្នាំ ១៩៩២។ បន្ទាប់ពីបានបោះពុម្ពផ្សាយជាផ្លូវការរួចសៀវភៅរឿងមួយនេះទទួលបានប្រជាប្រិយភាពយ៉ាងខ្លាំងពីសំណាក់អ្នកគាំទ្រទាំងក្នុង និងក្រៅប្រទេស។

ក្នុងឆ្នាំ ២០០១ តៃវ៉ាន់ក៏បានបង្កើតរឿងភាគ F4 ជាលើកដំបូងរបស់ខ្លួនដែលមានចំណងជើងថា «Meteor Garden» ដែលបានយកលំនាំតាមសៀវភៅរឿង Manga របស់ប្រទេសជប៉ុន «Hana Yori Dango»។ រឿងភាគ F4 របស់តៃវ៉ាន់មួយនេះ ក៏ទទួលបានភាពជោគជ័យយ៉ាងខ្លាំងបន្ទាប់ពីបានចាក់ផ្សាយ។

ក្រោយមកប្រទេស ជប៉ុន ដែលជាម្ចាស់ដើមនៃរឿងភាគដ៏ល្បីមួយនេះ ក៏បានបង្កើតរឿងភាគ F4 របស់ខ្លួននៅក្នុងឆ្នាំ ២០០៥ ដែលមានចំណងជើងថា «Hana Yori Dango»។

នៅក្នុង ឆ្នាំ ២០០៩ ប្រទេសកូរ៉េ និងចិន ក៏បានថតរឿងភាគមួយនេះសារជាថ្មីម្ដងទៀតដែលរឿងកូរ៉េ មានចំណងជើងថា «Boy Over flower» ស្របពេលដែលរឿងភាគរបស់ចិនមានចំណងជើងថា «Let’s Go To Watch Meteor Shower» ។

ហើយរឿងភាគ F4 ចុងក្រោយបំផុតដែលបានចាក់ផ្សាយគឺបានថតដោយប្រទេសចិន ដែលមានចំណងជើងថា «Meteor Garden ២០១៨ »។

កាលពីថ្មីៗ កន្លងទៅនេះប្រទេសថៃក៏បានទិញសិទ្ធដើម្បីថតរឿងភាគមនោសញ្ចេតណាដ៏ល្បីមួយនេះសារជាថ្មីផងដែរ ដែលរឿងភាគមួយនេះស្ថិតនៅក្រោមការផលិតរបស់ស្ថានីយ៍ទូរទស្សន៍ GMMTV ប៉ុន្តែសម្រាប់តួសម្ដែងមិនទាន់បានបញ្ជាក់នូវឡើយថាជាតារាស្រី ប្រុស រូបណាខ្លះនោះទេ៕

តើប្រិយមិត្តយល់យ៉ាងណាដែរ ?

អត្ថបទដោយ៖ ស្រីពេជ្រ