ជាការពិតណាស់ ជីវិតជាតារាគឺចៀសមិនផុតឡើយពីការតាមប្រមាញ់រូបភាព និងពត៌មាន ពីអ្នកកាសែត ហើយបើសិនជាតារាល្បីដែលមានកេរ្ដិ៍ឈ្មោះល្បីលំដាប់ប្រទេសទៀតនោះ ច្បាស់ជាជីវិតឯកជនរស់នៅមិនបានសុខឡើយ។
ជាក់ស្ដែង ដូចជាតារាស្រីរូបស្រស់ Angelababay និង Zheng Shuang តែម្ដង ពួកគេតែងតែត្រូវបានក្រុមអ្នកកាសែត Daipai តាមប្រមាញ់រូបភាព និងរំខានជារឿយៗ ក៏ព្រោះតែពួកគេទាំងពីរជាតារាស្រីដែលកំពុងមានប្រជាប្រិយភាពនៅក្នុងប្រទេសចិន។
កាលពីប៉ុន្មានថ្ងៃមុននេះ តារាស្រីរូបស្រស់ Zheng Shuang ដែលជាតួឯកស្រីក្នុងរឿង «Love O2O» ត្រូវបានអ្នកកាសែតតាមប្រមាញ់រូបយ៉ាងស្អិត ខណៈពេលដែលនាងទៅធ្វើដំណើរកំសាន្ដលក្ខណៈឯកជន រហូតដល់ធ្វើឲ្យតារាស្រីរូបស្រស់នេះត្រូវរត់គេចទៅរកកន្លែងសុវត្ថិភាពក្នុងព្រលានយន្ដហោះតែម្ដង។
បើនិយាយពី Angelababy វិញ គឺកាន់តែយ៉ាប់ បន្ទាប់ពីនាងត្រូវបានក្រុមអ្នកកាសែតអស់ទាំងនោះតាមស្អិតពេក ធ្វើឲ្យអ្នកគាំទ្ររបស់នាងដែលស្ថិតក្នុងស្ថានភាពនោះបានចូលទៅជួយ ហើយក្រុមអ្នកកាសែត Daipai នោះក៏ឈានដល់ការប្រើអំពើហឹង្សាទៅលើអ្នកគាំទ្ររបស់តារាស្រីរូបនេះតែម្ដង។
គួរបញ្ជាក់ផងដែរថា ក្រុមអ្នកកាសែត Daipai គឺជាពួកអ្នកប្រមាញ់រូបភាពដ៏ជំនាញរបស់តារា ដែលពួកគេត្រូវបានជួលដោយសំណាក់អ្នកគាំទ្រងប់ងល់ឲ្យទៅថតរូបតារាដែលពួកគេស្រលាញ់ពេញចិត្ត៕
អត្ថបទដោយ៖ ស្រីពេជ្រ