មានទស្សនាអត់? “Find Yourself” រឿងភាគកំពុងល្បីខ្លាំងក្នុងប្រទេសចិន (មានវីដេអូ)

រឿងភាគជាច្រើនរបស់ប្រទេសចិន បានកំពុងចេញជាបន្ដបន្ទាប់ដើម្បីមកកំដរអារម្មណ៍របស់ទស្សនិកជនដែលជាអ្នកនិយមតាមដានរឿងភាគ។ កាលពីថ្មីៗ កន្លងទៅនេះ រឿងភាគចិនថ្មីមានចំណងជើងថា “Find Yourself” ដែលចូលរួមសម្ដែងដោយតារាសម្ដែងប្រុសវ័យក្មេង Song Weilong និងតារាសម្ដែងស្រីចិន Victoria Song បានចាក់ផ្សាយជាផ្លូវការ។

អ្វីដែលគួរឲ្យចាប់អារម្មណ៍នោះគឺ រឿងភាគមួយនេះទើបតែធ្វើការចាក់ផ្សាយក្នុងប្រទេសចិនបាន ៨ ភាគ ក៏ប៉ុន្ដែបែរជាទទួលបានការគាំទ្រយ៉ាងខ្លាំងសម្បើមមិនធម្មតា។ មិនតែប៉ុណ្ណោះ Song Weilong ដែលជាតួឯកប្រុសក្នុងរឿងភាគនេះ ក៏ត្រូវបានអ្នកគាំទ្រជាច្រើនកាន់តែចាប់អារម្មណ៍ខ្លាំង ពីព្រោះថាគេមានរូបសង្ហារសាកសមឥតខ្ចោះជាមួយនឹងតួអង្គឯកប្រុស។

មែនទែនទៅ ថ្វីបើរឿងភាគមួយនេះ ធ្វើការចាក់ផ្សាយស្របពេលនឹងការផ្ទុះវីរុស កូរ៉ូណា ក៏ពិតមែន ប៉ុន្ដែប្រជាប្រិយភាពរឿងភាគមួយនេះបែរជាមិនធ្លាក់ចុះ ផ្ទុយទៅវិញបែរជាក្លាយជាប្រធានបទក្ដៅគគុក ត្រូវបានមនុស្សជាច្រើនទស្សនា និងយកពិភាក្សាពាសពេញបណ្ដាញសង្គម Weibo ទៅវិញ។ ខណៈមានមតិជាច្រើនក៏បានសរសើរថា តារាស្រីប្រុស មួយគូនេះពិតជាសមគ្នាខ្លាំង។

គួររំលឹកផងដែរថា រឿងភាគ “Find Yourself” គឺជាប្រភេទរឿងមនោសញ្ចេតនាលាយឡំនិងឈុតឆាកកំប្លែង ដែលនិយាយពីជិវិតស្នេហាដ៏រ៉ូមែនទិចរវាងតួឯកស្រីដែលមានអាយុច្រើនជាងតួឯកប្រុសដល់ទៅជាង ១០ ឆ្នាំ៕ ចុះប្រិយមិត្តមានបានទស្សនារឿងភាគនេះខ្លះហើយ រឺនៅ?

អត្ថបទដោយ៖ ស្រីពេជ្រ