មន្ត្រី​ចិន៖ ​ជំងឺ​ផ្លូវ​ដង្ហើម​ថ្មីឆ្លងពី​មនុស្ស​ទៅ​មនុស្ស​ហើយ

ប្រធាន​ក្រុម​អ្នក​ជំនាញ​ជំងឺ​ប្រព័ន្ធ​ផ្លូវ​ដង្ហើម​របស់​រដ្ឋាភិបាល​ចិន លោក ចុង ណានឆាន បាន​និយាយ​នៅ​ថ្ងៃ​ចន្ទ​នេះ​ថា ជំងឺ​ផ្លូវ​ដង្ហើម​ថ្មី (new coronavirus)ដែល​កំពុង​ផ្ទុះ​ឡើង​នេះគឺ​បាន​ឆ្លង​​ពី​មនុស្ស​ម្នាក់​ទៅ​មនុស្ស​ម្នាក់​ហើយ។ ករណី​នេះ​កើត​ឡើង​ចំពោះ​អ្នក​ជំងឺ​ពីរ​នាក់​ដែល​រស់​នៅ​ខេត្ត​ក្វាងទុងភាគ​ខាង​ត្បូង​ប្រទេស​ចិន​ដែល​បាន​ឆ្លង​ជំងឺ​នេះ​ពី​សមាជិក​គ្រួសារ​របស់​ពួក​គេ។

អ្នក​ជំនាញ​ក៏​បាន​រក​ឃើញ​ដែរ​ថា​បុគ្គលិក​ផ្នែក​សុខាភិបាលខ្លះ​ក៏មាន​ឆ្លង​វីរុសនេះ​ផង​ដែរក្រោយ​ការធ្វើតេស្ត នេះ​បើ​យោង​តាម​កាសែត​ China Daily  ជា​ភាសា​អង់គ្លេស។

ការ​ឆ្លង​ពី​មនុស្ស​ទៅ​មនុស្ស​នេះ គេ​ជឿ​ថា​នឹង​ធ្វើ​ឲ្យ​ការ​ចម្លង​កាន់​តែ​លឿន​និង​កាន់​តែ​រាលដាល​ធំ​ឡើង​ៗ ហើយ​​អ្នក​ជំនាញ​ក៏​ជឿ​ដែរ​ថា​ការ​ចម្លង​គឺ​ចាប់​ផ្ដើម​ឡើង​ពី​មនុស្ស​ម្នាក់​ទៅ​មនុស្ស​ម្នាក់​នៅ​ទី​ផ្សារ​លក់​អាហារ​ស្រស់​ដែល​ជា​ទី​ប្រជុំ​ជន​ ស្ថិត​នៅ​ទី​ក្រុង វូហាន  ភាគ​កណ្ដាល​ប្រទេស​ចិន។

លោក​ចុង ណានឆាន ក៏​បាន​បន្ត​ទៀត​ថា ចំពោះ​ករណី​មនុស្ស​ពីរ​នាក់​ដែល​ឆ្លង​ជំងឺ​នៅ​ខេត្ត​ក្វាងទុង​នោះ គឺ​ពួក​គេ​មិន​ដែល​បាន​ទៅ​ទីក្រុង​វូហាន​ឡើយ ប៉ុន្តែ​សមាជិក គ្រួសារ​របស់​ពួក​គេ​ទើប​នឹង​ត្រលប់​មក​ពី​ទី​ក្រុង​នោះ។

លោក​ប្រធានាធិបតី​ចិន លោក ស៊ី ជីង​ពីង  បាន​លើក​ឡើង​នៅ​ថ្ងៃ​ចន្ទ​ម្សិល​មិញ​នេះ​ថា “ករណី​នេះ​ជា​ករណី​ត្រូវ​ប្រុង​ប្រយ័ត្ន​ខ្លាំង” ហើយ​និង​ត្រូវ​ធ្វើ​រាល់​សកម្មភាព​ដែល​ធ្វើ​ទៅ​បាន ប្រឆាំង​នឹង​ជំងឺ​ផ្លូវ​ដង្ហើម​ថ្មី​នេះ ដែល​បាន​ឆ្លង​ទៅ​លើ​មនុស្ស ២១៧​នាក់​រួច​ទៅ​ហើយ​នៅ​ក្នុង​ប្រទេស ហើយ​នឹង​កំពុង​តែ​កើន​ឡើង រួម​ទាំង​ករណី​ដំបូង​ដែល​កើត​ឡើង​ក្នុង​រដ្ឋធានី ប៉េកាំង ទៀត​ផង។

ការ​លើក​ឡើង​នេះ គឺ​ធ្វើ​ឡើង​ស្រប​នឹង​ពេល​ឈប់​សម្រាក​ចូល​ឆ្នាំ​ចិន ឈាន​ជិត​ចូល​មក​ដល់​ដែល​ជា​ពេល​ប្រជាជន​ត្រៀម​ធ្វើ​ដំណើរ​យ៉ាង​កក​កុញ​។ លោក​ប្រធានាធិបតី​ក៏​បាន​បន្ត​ទៀត​ថា ត្រូវ​យក​ចិត្ត​ទុក​ដាក់​ខ្ពស់ ទាំង​ការ​ផ្ទុះ​ឡើង​ជំងឺ​ថ្មី​នេះ​នៅ​ទីក្រុង​វូហាន និង​នៅ​តំបន់​ផ្សេង​ទៀត ហើយ​រាល់​ភាគី​ពាក់​ព័ន្ធ និង​រាល់​ស្ថាប័ន​ក្នុង​រដ្ឋាភិបាល​គ្រប់​កម្រិត ត្រូវ​យក​ចិត្ត​ទុក​ដាក់​លើ​ជីវិត និង​សុខភាព​ប្រជា​ជន​ជា​រឿង​ចម្បង និង​ត្រូវ​ប្រាកដ​ថា​ប្រជាជន​អាច​រីករាយ​នៅ​ថ្ងៃ​បុណ្យ​និង​ឈប់​សម្រាក​នេះ​បាន។

- Advertisement -

អាជ្ញាធរ សុខាភិបាល​នៅ​ទីក្រុង​វូហាន ដែល​ជា​កន្លែង​ផ្ទុះ​ជំងឺ​នេះ​ដំបូង​បាន​និយាយ​ថា នៅ​ពេល​ផ្ទុះ​ដំបូង គឺ​មាន​ករណី​តែ​១៣៦​ករណី​ប៉ុណ្ណោះ ប៉ុន្តែនៅពេល​នេះ គឺ​មាន​ការ​ឡើង​ដល់​ទៅ ១៩៨​ករណី ហើយ​កាល​ពី​ចុង​សប្ដាហ៍​កន្លង​ទៅ​នេះ គឺ​មាន​អ្នក​ជំងឺ​ទី​បី​ហើយ​ដែល​បាន​បាត់​បង់​ជីវិត។

គេ​បាន​រក​ឃើញ​មាន ប្រាំ​ករណី​កើត​មាន​នៅ​ទីក្រុង​ប៉េកាំង និង​១៤ករណី​ផ្សេងទៀត​កើត​មាន​នៅ​ភាគ​ខាង​ត្បូង​ប្រទេស​ចិន ស្ថិត​ក្នុង​ខេត្ត​ក្វាងទុង ដែល​ទើប​នឹង​រាយ​ការណ៍​ឡើង​នៅ​ល្ងាច​ថ្ងៃ​ចន្ទ​នេះ ហើយ​នៅ​មាន​៧​ករណី​ផ្សេង ទៀត​គឺ​កើត​មាន​ឡើង​នៅ​តំបន់​ផ្សេងៗ​ទៀត​ក្នុង​ប្រទេស​ចិន រួម​មាន ខេត្ត​ស៊ីឈួននិង យូណាន ដែល​ស្ថិត​នៅ​ភាគ​ពាយ័ព្យ​ប្រទេស និង​នៅ​ទីក្រុង​សៀងហៃ។

គួរ​បញ្ជាក់​ដែរ​ថា នៅ​ប្រទេស​ផ្សេង​ទៀត​ដែល​ប្រជាជន​ចិន​ធ្វើ​ដំណើរ​ឆ្លង​កាត់ អំឡុង​ពេល​ចូល​ឆ្នាំ​ចិន​នេះ ក៏​ឃើញ​មាន​ផ្ទុះ​ករណី​ថ្មី​ៗ​ផង​ដែរ។ អាជ្ញាធរ​ប្រទេស​ថៃ​ និង​ប្រទេស​ជប៉ុន ទើប​រក​ឃើញ​យ៉ាង​តិច ៣​ករណី ជំងឺ​នេះ ដែល​កើត​ឡើង​ចំពោះ​អ្នក​ដំណើរ​ដែល​មក​ពី​ប្រទេស​ចិន។ ឯ​នៅ​ប្រទេស​កូរ៉េ​ខាង​ត្បូង​វិញ​ ទើប​រក​ឃើញ​ករណី​ដំបូង​នៅ​ថ្ងៃ​ចន្ទ​នេះ ដែល​អ្នក​ជំងឺ​ជា​ស្ត្រី ជនជាតិ​ចិន​វ័យ​៣៥​ឆ្នាំ​រក​ឃើញ​ថា​មាន​ជំងឺ​ផ្លូវ​ដង្ហើម​ថ្មី​នេះ មួយ​ថ្ងៃ​បន្ទាប់​ពី​មក​ដល់​ប្រលាន​យន្ត​ហោះ អ៊ីនឈ័ននៅ​ទី​ក្រុង​សេអ៊ូល។

នៅ​ពេល​នេះ​ស្ត្រី​អ្នក​ជំងឺ​នោះ ត្រូវ​បាន​ដាក់​ឲ្យ​នៅ​ដាច់​ដោយ​ឡែក​នៅ​ឯ​មន្ទីរពេទ្យ​រដ្ឋ​មួយ​នៅ​ទី​ក្រុង​អ៊ីនឈ័ន ដែល​នៅ​ភាគ​ខាង​លិច​ទី​ក្រុង​សេអ៊ូល​ដើម្បី​ពិនិត្យ​តាម​ដាន។ គួរ​រំលឹក​ដែរ​ថា​យ៉ាង​ហោច​ណាស់ ជាង​ពាក់​កណ្ដាល​ប្រទេស​ស្ថិត​ក្នុង​ទ្វីប​អាស៊ី និង​ប្រលាន​យន្ត​ហោះ​បី​របស់​សហរដ្ឋ​អាមេរិក បាន​ចាប់​ផ្ដើម​ពិនិត្យ​រាល់​ប្រជាជន​ដែល​ធ្វើ​ដំណើរ​មក​ពី​ផ្នែក​កណ្ដាល​នៃ​ប្រទេស​ចិន។

ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

​​​អត្ថបទផ្ដល់សិទ្ធិដោយ