ហោរាសាស្រ្ត ប្រចាំថ្ងៃ សុក្រ ទី ២៦ ខែ កុម្ភៈ ឆ្នាំ ២០២១ ត្រូវនឹងថ្ងៃទី ១៥កើត ខែផល្គុន ឆ្នាំជូត ទោស័ក ពស២៥៦៤

ឆ្នាំជូត
រាសីល្អជាមធ្យម។លោកអ្នកកើតឆ្នាំកណ្តុរបញ្ហាស្នេហាពិសេសបុរសមានសញ្ញាមិនសូវល្អប៉ុន្មានទេរយៈពេលនេះដោយសារតែកើតមានការកាំរកូសនិងមានបញ្ហាចូលយាយីច្រើនបន្តិច។សម្រាប់អ្នកប្រកបការងារវិញកុំចាប់អារម្មណ៍ជាមួយអ្នកដទៃច្រើនពេក ត្រូវបំពេញការងារខ្លួនឯងឱ្យបានល្អនោះជាការប្រពៃបំផុតហើយ។អ្នកប្រកប របរ រកស៊ីជួញដូរមិនត្រូវនៅស្ងៀមទេ ត្រូវចេះសម្លឹងមុខរបរបន្ថែមផ្សេងទៀតពីព្រោះថារយៈពេលនេះប្រាក់ចំណូលចិញ្ចឹមគ្រួសារជួបស្ថានភាពលំបាកបន្តបន្ទាប់។ សម្ព័ន្ធស្នេហាកំលោះក្រមុំមិនសូវមានភាពផ្អែមល្ហែមទេ ពិសេសងាយកើតការប្រេះឆាថែមទៀត៕

ឆ្នាំឆ្លូវ
រាសីខ្ពស់ត្រដែត។លោកអ្នកកើតឆ្នាំគោឆ្លងចូលសប្តាហ៍ក្រោយពោលគឺខែមីនាខាងមុខដំណើរជីវិតបានផ្លាស់ប្តូរពីស្ថានភាពធ្លាក់ស្រុតចុះ មកជាដួងរាសីល្អមធ្យមវិញ។ ហេតុនេះបញ្ហាមួយចំនួនដែលធ្លាប់តែលំបាកបានផ្លាស់ប្តូរមកគ្រាន់ស្រួលចិត្តបន្តិចវិញ។ចំពោះអ្នកប្រកបការងារនៅថ្ងៃនេះកុំយកភាពរឹងមានះឬចង់ចាញ់ឈ្នះជាមួយអ្នកដទៃខ្លាំងពេក ត្រូវបន្ទន់ចិត្ត ដាក់ខ្លួនខ្លះក្រែងបានសុខស្រួលខ្លួនជាងនេះ។អ្នកប្រកប របរ រកស៊ីទទួលទានមានភាពលូតលាស់បន្តិចវិញ ហើយបើចង់ផ្លាស់ប្តូរទីតាំងឬលក់ដូរកន្លែងសព្វថ្ងៃឃើញថាអាចសម្រេចជោគជ័យផង។ សេចក្តីស្នេហាកំលោះក្រមុំ ឬ សូម្បីតែប្តីប្រពន្ធឃើញថាមានភាពល្អប្រសើរ និងមានការចេះអត់ឱនឱ្យគ្នាគ្រាន់ប្រសើរជាងមុន៕

ឆ្នាំខាល
រាសីស្រុតចុះ។លោកអ្នកកើតឆ្នាំខ្លានាថ្ងៃនេះរាសីធ្លាក់ស្រុតចុះខ្លាំងបន្តិច ម្ល៉ោះហើយការសម្រេចចិត្តអ្វីមួយងាយជះផលអាក្រក់មកវិញណាស់គប្បីថ្លឹងថ្លែងគ្រប់ជ្រុងជ្រោយទើបពុំមានបញ្ហាចោទឡើង។អ្នកប្រកបការងារមានការលូតលាស់យឺត ហើយឱ្យប្រយ័ត្នក្រុមមនុស្សជាសត្រូវលាក់មុខទម្លាក់កំហុសទុកឱ្យដោយប្រការណាមួយ។អ្នកប្រកបរបរលក់ដូរមានការតានតឹងក្នុងការ រកចំណូល ហើយបើចង់ទិញទំនិញស្តុកទុកច្រើនតែមិនសូវដូចគាប់បំណងទេ។ សម្ព័ន្ធស្នេហាកំលោះក្រមុំ កុំលង់លក់តែរឿងស្នេហាត្រូវរកពេលវេលាបំពេញការងារ ឬ រៀនសូត្រឱ្យបានច្រើនទើបជីវិតថ្លៃថ្លាទៅគ្រាខាងមុខ៕

ឆ្នាំថោះ
រាសីល្អជាមធ្យម។លោកអ្នកកើតឆ្នាំទន្សាយបើតាមក្បួនហោរាសាស្ត្រចិនឃើញថាក្រោយចូលឆ្នាំចិនរួចមកនេះលោកអ្នកបានឆ្លងផុតដួងរាសីឆ្នាំធ្លាក់ស្រុតចុះហើយ។សម្រាប់ខែមីនាខាងមុខនេះដួងរាសីខែក៏ល្អប្រសើរ ដែរ ហេតុនេះចាប់ផ្តើមមានភាពភ្លឺថ្លា និងប្រាជ្ញាក៏ឈ្លាសវៃជាងមុនដែរ។ដោយឡែកអ្នកប្រកបការងារនៅថ្ងៃនេះវិញពុំមានអ្វីប្រែប្រួលប្តូរផ្លាស់គួរជាទីកត់សម្គាល់ទេគឺដូចសព្វមួយដង។អ្នកប្រកបរបរទទួលទានភាពល្អនិងអាក្រក់នៅលាយឡំគ្នា ដូចនេះគួរប្រយ័ត្នបញ្ហាការឱ្យអតិថិជនជំពាក់ប្រាក់កាសបន្តិចពីព្រោះការបាត់បង់មានខ្ពស់ណាស់ដែរ។ សម្ព័ន្ធស្នេហាកំលោះក្រមុំសុខចិត្តឱ្យជ្រុលសម្តីកុំឱ្យចេញក្រៅពិសេសទីឆ្ងាយព្រោះថាងាយមានឧបទ្រពចង្រៃយាយីច្រើនជាងសព្វមួយដង៕

ឆ្នាំរោង
រាសីល្អជាមធ្យម។អ្នកកើតឆ្នាំរោងនាពេលនេះដំណើរជីវិតនៅល្អគួរសម ប៉ុន្តែនៅពេលឆ្លងដល់សប្តាហ៍ក្រោយដួងរាសីខែបានធ្លាក់ស្រុតចុះ ម្ល៉ោះហើយរាល់ការធ្វើអ្វីៗមិនបានដូចប្រាថ្នាប៉ុន្មាននោះឡើយ។ការប្រកបការងារនៅថ្ងៃនេះលទ្ធផលការងារជួបស្ថានភាពតានតឹង ហើយបើធ្វើខុសមានក្រុមមនុស្សលួចជាន់កបន្ថែទៀត។អ្នកធ្វើជំនួញវិញមានភាពសោះកក្រោះមិនសម្បូណ៍អតិថិជនឡើយ ហើយអ្នកខ្លះដូចពាក្យចាស់ថា”រកអង្ករច្រកឆ្នាំងសឹងថាមិនគ្រប់ផង”។ សម្ព័ន្ធស្នេហាកំលោះក្រមុំបើចង់បែកបាក់អំឡុងពេលនេះមិនងាយចប់ទេ ពិសេសកើតមានបញ្ហាលំបាកនាពេលក្រោយថែមទៀត៕

ឆ្នាំម្សាញ់
រាសីខ្ពស់ត្រដែត។អំឡុងពេលនេះលោកអ្នកកើតឆ្នាំម្សាញ់អ្នកខ្លះមុជមិនជ្រៅទៅមិនឆ្ងាយ ហើយបើក្រឡេកនាយអាយក៏អ្នកដទៃគេមិនចង់មើលមុខដែរ។ដោយឡែកថ្ងៃនេះវិញដោយសារដួងរាសីឡើងខ្ពស់ ហេតុនេះបើចង់ដោះស្រាយជម្លោះវិវាទយូរមកហើយ ក៏ជាការប្រសើរដែរ។អ្នកប្រកបការងារវិញមានភាពភ្លឺថ្លាគ្រាន់បើ ហើយចង់ចេញដំណើរឆ្ងាយក៏តែងមានភាពជោគជ័យច្រើនត្រឡប់មកវិញ។អ្នកធ្វើជំនួញមានសភាពរលូនល្អគួរសម ឯផលកម្រៃទោះមិនច្រើនតែក៏មានភាពសុខដុមប្រពៃ។ បញ្ហាស្នេហាកំលោះក្រមុំជាពេលវេលារៀបចំគ្រួសារ និងការចូលដល់ចាស់ទុំនិយាយគ្នាហើយ៕

ឆ្នាំមមី
រាសីល្អជាមធ្យម។អ្នកកើតឆ្នាំសេះលោកអ្នកខ្លះជួបស្ថានភាព ចង្អៀតមុខចង្អៀតក្រោយរកច្រកពុំសូវចេញដោយសារបញ្ហាប្រាក់កាស ហេតុនេះត្រូវរក្សាភាពនឹងធឹងអត់ធ្មត់ខ្លះក៏ប្រពៃដែរ។អ្នកប្រកបការងារនៅថ្ងៃនេះមានស្ថានភាពល្អប្រសើរ ហើយកិច្ចការខ្លះក៏អាចពឹងពាក់អ្នកដទៃបានទៀតផង។អ្នកធ្វើជំនួញប្រាក់កាសពុំសូវហូរចូលទេ មានតែហូរចេញច្រើនជាង។ស្ថានភាពនេះមានច្រើនថ្ងៃបន្ថែមទៀត។ សម្ព័ន្ធស្នេហាកំលោះក្រមុំកុំជ្រោលជ្រើមខុសបែបបទ ព្រោះតែអារម្មណ៍ដឹកមុខនាំក្តីលំបាកគ្រាខាងមុខដែលកំពុងរង់ចាំរៀងរាល់ថ្ងៃ៕

ឆ្នាំមមែ
រាសីល្អជាមធ្យម។លោកអ្នកកើតឆ្នាំពពែនៅពេលឆ្លងផុត ខែ កុម្ភៈ ឈានដល់ ខែ មីនាដួងរាសីខែហក់ឡើងខ្ពស់ ម្ល៉ោះហើយធ្វើឱ្យដំណើរជីវិតបានផ្លាស់ប្តូរមកល្អប្រសើរបន្តិចវិញ។ការប្រកបការងារនៅថ្ងៃនេះដែរ ទោះមានការនឿយណាយ ក៏ដោយមិនត្រូវត្អូញត្អែរច្រើនដែរ ពីព្រោះជញ្ជាំងមានត្រចៀកប្រយ័ត្នអត់ការអី សោះចៅហ្វាយចាប់ថ្នាំងថ្នាក់ដល់គ្រាក្រោយ។អ្នកប្រកបរបរទទួលទានមានការចំណាយច្រើនអនេក ឯប្រាក់ចំណូលសឹងថាចិញ្ចឹមគ្រួសារមិនចង់រស់ទេ។ បញ្ហាស្នេហាកំលោះក្រមុំកុំមើលគ្នាក្នុងផ្លូវអាក្រក់ឱ្យសោះនាំកើតជាទម្លាប់អាក្រក់គ្មាននរណារស់នៅក្បែរបាន៕

ឆ្នាំវក
រាសីខ្ពស់ត្រដែត។ការនិយាយច្រើន រអ៊ូរទាំច្រើន បើមានក្នុងខ្លួនលោកអ្នកគប្បីបោះបង់ចោល ជាប្រញាប់ពីព្រោះវានាំតែកើតឧបទ្រព្យចង្រៃធ្វើឱ្យអ្នកដទៃរស់នៅក្បែរមិនចង់កើតប៉ុណ្ណោះ។ដោយឡែកថ្ងៃនេះការរស់នៅមានភាពល្អប្រសើរគួរសម ហើយបើចង់ពឹងពាក់នរណាម្នាក់គេតែងអាណិតជួយផង។ការប្រកបការងារលោកអ្នកគប្បីសម្លឹងការងារណាដែលសំខាន់ ឬការងារដែលធំដុំធ្វើក៏ជាការល្អដែរ។អ្នកប្រកបរបរទទួលទានមានភាពលូតលាស់ទៅមុខសន្សឹមៗ ហើយបើគិតទារបំណុលពីអ្នកដទៃនាពេលនេះជាឱកាសល្អហើយ។ សម្ព័ន្ធស្នេហាកំលោះក្រមុំមានភាពស្រស់ស្រាយប្រៀបប្រដូចទៅនឹងត្រីនៅក្នុងទឹកនារដូវវស្សាដូច្នេះដែរ៕

ឆ្នាំរកា
រាសីខ្ពស់ត្រដែត។នៅថ្ងៃនេះមិនថាជាការងារ ឬ បញ្ហាប្រាក់កាសទេគឺ លោកអ្នក មានការចម្រើនលូតលាស់ទៅមុខ និងហុចផលល្អៗមកវិញ។ក្រៅពីនេះបើលោកអ្នកជាបាវបម្រើឬកម្មករក៏តែងត្រូវបានចៅហ្វាយនាយអាណិតស្រឡាញ់លែងចាប់ថ្នាំងថ្នាក់ច្រើនផង។សម្រាប់អ្នកប្រកបរបររកស៊ីជួញដូរមានការរីកលូតលាស់គួរសមម្ល៉ោះហើយជាឱកាសល្អក្នុងការពង្រីកមុខរបរថ្មីឬបណ្តាក់ទុនបន្ថែមព្រោះផ្លែផ្កាដែលទទួលបានតែងហុចមកវិញដូចសមប្រកប។ រីឯបញ្ហាសេចក្តីស្នេហាប្រុសស្រីមានការជឿនលឿនទៅមុខនិងកំពុងស្រស់ស្រាយប្រពៃណាស់ដែរ៕

ឆ្នាំច
រាសីល្អជាមធ្យម។លោកអ្នកកើតឆ្នាំចនៅពេលឆ្លងដល់ខែក្រោយគឺខែមីនាដួងរាសីផ្លាស់ប្តូរមកល្អឡើងវិញធ្វើឱ្យអ្វីៗធ្លាប់តែលំបាកឬជួបបញ្ហាមិនចេះចប់មិនចេះហើយបានផ្លាស់ប្តូរមកប្រសើរឡើងវិញ។អ្នកប្រកបការងារនៅថ្ងៃនេះវិញកុំចិត្តច្រើន ហើយកុំយកភាពមួម៉ៅក្តៅក្រហាយដាក់ខ្លួនច្រើនដែរបើពុំនោះទេនឹងមានតែរឿងរាវកើតមិនចេះចប់ទៀតហើយ។អ្នកប្រកបរបររកទទួលទានកុំជឿក្រុមមនុស្សពេកពីព្រោះថាពេលខ្លះគេនាំតែអ្នកកើតមានជម្លោះជាមួយអ្នកដទៃ ហើយគេអង្គុយសប្បាយចិត្តព្រោះតែអាចខ្ចីដៃអ្នកប្រើបានជោគជ័យ។ សម្ព័ន្ធស្នេហាកំលោះក្រមុំត្រូវយកចិត្តទុកដាក់គ្នា ហើយបោះបង់ការប្រចែប្រច័ណ្ឌចេញពីខ្លួនខ្លះកាន់តែប្រសើរ៕

ឆ្នាំកុរ
រាសីស្រុតចុះ។លោកអ្នកបើមានបញ្ហាអ្វីគប្បីដោះស្រាយនាអំឡុងខែកុម្ភៈនេះក៏ប្រសើរដែរពីព្រោះថាឆ្លងដល់ខែមីនានៅសប្តាហ៍ក្រោយនេះនៅមានបញ្ហាច្រើនទៀតដែលត្រូវធ្វើ និងដោះស្រាយ។ការប្រកបការងារនៅថ្ងៃនេះវិញមានបញ្ហាលុកលុយ និងពិសេសក្រុមមនុស្សចាំចាប់កំហុសនិងបន្ទោសបង្អាប់នោះក៏ច្រើនដែរ។អ្នកប្រកបរបរទទួលទានមានការខ្សត់ខ្សោយចំណូល ហើយចង់ទិញទំនិញសម្រា់បស្តុកទុកតែងមិនគាប់ដូចបំណងប៉ុន្មានទេ។ សម្ព័ន្ធស្នេហាកំលោះក្រមុំមានដំណើរថយក្រោយងាយទាំងជម្លោះវិវាទនិងការបែកបាក់ផង៕