ហោរាសាស្រ្ត ប្រចាំថ្ងៃ ច័ន្ទ ទី ១ ខែ មីនា ឆ្នាំ ២០២១ ត្រូវនឹងថ្ងៃទី ៣រោច ខែផល្គុន ឆ្នាំជូត ទោស័ក ពស២៥៦៤
ឆ្នាំជូត
រាសីល្អជាមធ្យម។នាពេលនេះដំណើរជីវិតរបស់លោកអ្នក មានភាពមិនល្អបោកបក់ចូលមក នៅឡើយ ម្ល៉ោះហើយបើទោះបីធ្វើអ្វីក៏ដោយតោងតែប្រយ័ត្នប្រយែងទើ់បមិនមានបញ្ហាចោទឡើង។ការរស់នៅលោកអ្នកគួររក្សាភាពស្ងប់ស្ងាត់ ហើយធ្វើមិនដឹងមិនឮចំពោះក្រុមមនុស្សខ្លះទើបជាការប្រពៃ។អ្នកប្រកបរបររកស៊ីជួញដូរនៅថ្ងៃនេះវិញមិនត្រូវលោភលន់មិនមើលមុខក្រោយឡើយ បើមិនដូច្នេះនឹងនាំផលលំបាកណាមួយនៅពេលក្រោយ។ រីឯបញ្ហាសម្ព័ន្ធស្នេហាប្រុសស្រីកើតមានការប្រឆាំងគ្នាព្រោះតែម្នាក់ៗចង់ចាញ់ឈ្នះគ្នារៀងៗខ្លួន៕
ឆ្នាំឆ្លូវ
រាសីស្រុតចុះ។ការរស់នៅមានបញ្ហា ល្អក់កករផ្លូវចិត្ត ច្រើន ហើយពិសេសងាយមានបញ្ហាចម្រូងចម្រាសជាមួយមនុស្សជុំវិញខ្លួនថែមទៀត។នៅថ្ងៃនេះដែរបើលោកអ្នកទំនាក់ទំនងការងារឬចង់ធ្វើអ្វីមួយមិនត្រូវមានក្តីសង្ឃឺមពេកឡើយពីព្រោះថាការខកបំណងនោះក៏មានខ្ពស់ផងដែរ។ អ្នកប្រកបរបររកស៊ីជួញដូរលោកអ្នកមិនគប្បីហក់លោតខ្លាំងពេកឡើយព្រោះផលចំណូលប្រមូលមកវិញមិនឆ្លើយតបដូចសេចក្តីប្រាថ្នាទេនិងស្រួលមិនស្រួលត្រូវចំណាយកម្លាំងឥតអំពើថែមទៀត។ រីឯបញ្ហាសេចក្តីស្នេហាប្រុសស្រីកុំជ្រួលជ្រើមខុសបែបបទត្រូវចេះអប់រំខ្លួនឯងទើបជាការល្អដល់ថ្ងៃក្រោយ៕
ឆ្នាំខាល
រាសីខ្ពស់ត្រដែត។ការរស់នៅដែលធ្លាប់តែមានបញ្ហា និងរឿងរាវយាយីថ្ងៃនេះមានការស្ងប់ស្ងាត់វិញខ្លះ ហើយបើមានការពឹងពាក់អ្នកដទៃជួយដោះស្រាយក៏តែងមានក្រុមមនុស្សអាណិតជួយយកអាសារដែរ ។ការប្រកបការងារពុំមានបញ្ហាចោទឡើងច្រើនឡើយ ហើយពិសេសធ្វើច្រើនទទួលបានផលច្រើនថែមទៀត។ចំណែកអ្នកអាជីវករទោះមានការជួញទីជិតឆ្ងាយនៅថ្ងៃនេះលោកអ្នកអាចប្រមូលភោគផលចូលផ្ទះវិញយ៉ាងត្រជាក់ចិត្ត។ រីឯបញ្ហាសេចក្តីស្នេហាប្រុសស្រីមានភាពស្រស់ស្រាយនិងផ្អែមល្ហែមប្រពៃណាស់៕
ឆ្នាំថោះ
រាសីស្រុតចុះ។ការរស់នៅលោកតោងតែរក្សាភាពស្ងប់ស្ងាត់ និង មិនត្រូវប្រកាន់ចិត្តឆេវឆាវឡើយពីព្រោះថាពេលខ្លះរឿងតិចតួចសោះប្រែរីកជាធំ។នៅថ្ងៃនេះដំណើរជីវិតការងាររបស់លោកអ្នកមិនល្អប្រសើរទេពីព្រោះថាលទ្ធផល និង កម្លាំងប្រឹងប្រែងដែលហុចមកវិញនោះឃើញថាមានការខ្សត់ខ្សោយនិងមានភាពរកាំរកូសច្រើនទៀតផង។ អ្នកប្រកបរបររកស៊ីជួញដូរមុនធ្វើអ្វីមួយត្រូវចេះត្រិះរិះពិចារណាឱ្យបានគ្រប់ជ្រុងជ្រោយ ហើយពុំត្រូវមានគំនិតវៀចវេឡើយបើពុំនោះទេនាំជួបផលលំបាកដល់អាត្មាខ្លួនឯងដោយសារអតិថិជនលែងមកក្បែរបន្តទៀត។ រីឯបញ្ហាស្នេហាកំលោះក្រមុំក្នុងពេលនេះជួនត្រូវជួនឈ្លោះធ្វើឱ្យកើតការខ្វាយខ្វល់ឥតសូវស្បើយប៉ុន្មានឡើយ៕
ឆ្នាំរោង
រាសីល្អជាមធ្យម។នៅថ្ងៃនេះកុំសម្លឹងខ្ពស់ និងស្រមើលស្រម៉ៃអ្វីមិនមែនការពិតពីព្រោះថានេះសុទ្ធសឹងរឿងឥតប្រយោជន៍ ហើយនាំឧបទ្រពចង្រៃដាក់ខ្លួន។ការប្រកបការងារមានការប៉ះពាល់លើផ្លូវចិត្តច្រើនបន្តិច តែយ៉ាងណាលទ្ធផលតែទទួលបានគ្រាន់កក់ក្តៅ។អ្នកប្រកបរបររកស៊ីជួញដូរទោះជួញទីជិតឆ្ងាយការរកផលកម្រៃមានភាពធូរស្បើយជាងមុនដោយលោកអ្នកអាចរកប្រាក់ចំណូលគ្រាន់ចិញ្ចឹមឆ្នាំងបាយអញ្ចឹងដែរ។ក្រៅពីនេះដំណើរចេញក្រៅផ្ទះលោកអ្នកមានក្រុមមនុស្សបៀតបៀនយាយីច្រើនដូច្នេះគួរប្រយ័ត្នប្រយែងឱ្យបានខ្លាំងក្លាផងដែរ។ រីឯបញ្ហាស្នេហាប្រុសស្រីមានភាពស្រស់ស្រាយព្រោះតែម្នាក់ៗមានការយកចិត្តទុកដាក់ចំពោះគ្នាគ្រាន់បើជាងមុន៕
ឆ្នាំម្សាញ់
រាសីស្រុតចុះ។ការរស់នៅមិនត្រូវបង្កជម្លោះជាមួយមនុស្សភេទផ្ទុយគ្នាឡើយពីព្រោះថាអាចឈានពីរឿងតូចសោះកើតជាជម្លោះប្តឹងផ្តល់គ្នាវែងឆ្ងាយ។ការប្រកបការងារដំណើរជីវិតរបស់លោកអ្នកមិនល្អប្រសើរទេ ដូចនេះតោងតែចេះមើលមុខក្រោយ និង ប្រយ័ត្នប្រយែងពីព្រោះថាផលមិនល្អនោះងាយរងគ្រោះ ជាងសព្វមួយដង។អ្នកប្រកបរបររកស៊ីជួញដូរមានការទិញចូលលក់ចេញគ្រាន់បើតែយ៉ាងណាលោកអ្នកទាល់តែខិតខំខ្លាំងទើបប្រាក់កាសអាចរកគ្រាន់បំពេញបំពង់ផង។ការធ្វើដំណើរឆ្ងាយជិតជួបភាពប្រទាំងប្រទើសច្រើនពិសេសឱ្យប្រយ័ត្នជម្លោះវិវាទណាមួយកើតឡើង។ រីឯសម្ព័ន្ធស្នេហាកំលោះក្រមុំងាយទាំងប្រេះស្រាំនិងងាយទាំងផ្អែមល្ហែមឡើងវិញ៕
ឆ្នាំមមី
រាសីខ្ពស់ត្រដែត។ការរស់នៅបើលោកអ្នកចង់ដោះស្រាយបញ្ហា ឬចង់ជជែកពិភាក្សាអ្វីមួយជាមួយអ្នកដទៃតែងអាចរកច្រកចេញបានខ្លះនាថ្ងៃនេះ។ការប្រកបការងារត្រូវសម្លឹងកិច្ចការធំដុំខ្លះ ហើយរឿងរាវមួយចំនួនអ្នកក៏អាចរកច្រកចេញងាយស្រួលជាងមុនដូចគ្នា។សម្រាប់អ្នកប្រកបរបររកស៊ីជួញដូរមានការទិញចូលលក់ចេញគ្រាន់រស់រវើកគួរសមហើយបើចង់រកស៊ីចូលហ៊ុនជាមួយអ្នកដទៃក៏មានភាពល្អប្រសើរដែរតែត្រូវត្រួតពិនិត្យសមាសភាពឱ្យបានត្រឹមត្រូវប្រយ័ត្នត្រូវចាញ់បោកគេ។ រីឯបញ្ហាសេចក្តីស្នេហាកំលោះក្រមុំមានការជឿនលឿនទៅមុខនិងផ្អែមល្ហែមល្អ៕
ឆ្នាំមមែ
រាសីល្អជាមធ្យម។ថ្ងៃនេះលោកអ្នកត្រូវរក្សាភាពស្ងប់ស្ងាត់ ហើយធ្វើគធ្វើថ្លង់ដោយមិនយកចិត្តទុកដាក់សម្តីក្រុមមនុស្សខ្លះកាន់តែប្រសើរ។លោកអ្នកតោងតែចងចាំថាជម្លោះវិវាទជាការឥតប្រយោជន៍ និងនាំតែជះផលអាក្រក់ដល់ពេលក្រោយ។ការប្រកបការងារមិនអាចប្រមាថបានទេ ពិសេសពេលព្រឹកព្រោះថាងាយទាំងខូចខាតនិងបាត់បង់។អ្នកប្រកបរបររកស៊ីជួញដូរទោះជួញទីជិតឆ្ងាយត្រូវរត់ទៅរកអតិថិជនហើយត្រូវស្វះស្វែងបន្តិចទើបការរកប្រាក់ចំណូលគ្រាន់ប្រមូលបានដូចសេចក្តីប្រាថ្នាទៅរួច។ រីឯបញ្ហាសេចក្តីស្នេហាប្រុសស្រីមានការប្រចែប្រច័ណ្ឌនិងចាប់កំហុសគ្នាច្រើន៕
ឆ្នាំវក
រាសីស្រុតចុះ។ថ្ងៃនេះកុំមើលរំលងបញ្ហាតិចតួចថាមិនអីពីព្រោះថាបញ្ហាខ្លះផ្តើមចេញតែពីរឿងរាវល្អិតល្អោចនេះឡើងទៅ។ការប្រកបការងារជួបស្ថានភាពលំបាកច្រើន ហើយពិសេសធ្វើច្រើនអាចខុសច្រើនថែមទៀត។ ចំពោះការប្រកបរបររកស៊ីជួញដូរវិញការជួញឆ្ងាយឱ្យប្រយ័ត្នបន្តិចព្រោះសម្បូណ៍រក្រុមមនុស្សបោកប្រាស់ច្រើនតែជួញជិតការរកផលចំណូលជួបផលលំបាក ហើយអ្នកខ្លះកើតបញ្ហាជាមួយក្រុមមនុស្សមិនចេះចប់ទៀតផង ។ រីឯបញ្ហាសេចក្តីស្នេហាប្រុសស្រីកុំចង់ទុំមុនស្រគាលប្រយ័ត្នកើតរឿងរាវហើយដោះស្រាយមិនចេញត្រូវមកសោកការអាត្មាខ្លួនឯងដែលជាការហួសពេលទៅហើយ៕
ឆ្នាំរកា
រាសីល្អជាមធ្យម។នាពេលនេះ លោកអ្នកដែលជួបបញ្ហាស្មុគស្មាញ និងឧបសគ្គនានាក៏តែងបានធូរស្រាលជាងមុនវិញខ្លះ។ការប្រកបការងារពុំមានសូវឃើញមានឧបសគ្គច្រើនតែប៉ុន្តែបញ្ហាចាស់នៅតែលំបាកស្រាយមិនទាន់ចេញដែរ។ចំពោះអ្នកប្រកបរបររកស៊ីជួញដូរលោកអ្នកតោងមានការរវាសរវៃញាប់ដៃញាប់ជើងហើយស្វះស្វែងរកអតិថិជនបន្តិច ទើបហុចផ្លែផ្កាគួរជាទីពេញចិត្តមកវិញ។ រីឯបញ្ហាសេចក្តីស្នេហាកំលោះក្រមុំកុំគប្បីចង់ទុំមុនស្រគាលប្រយ័ត្នកើតរឿងធំនាគ្រាខាងមុខហើយត្រូវមកដេកសោកស្តាយក្រោយ៕
ឆ្នាំច
រាសីខ្ពស់ត្រដែត។មនុស្សអាក្រក់អាចប្រែជាល្អ និងបញ្ហាល្អក់កករនឹងប្រែមកធូរស្បើយបើលោកអ្នកចេះដោះស្រាយដោយបញ្ញាវាងវៃ។នៅថ្ងៃនេះផ្តល់ផលល្អសម្រាប់លោកអ្នកបំពេញកិច្ចការងារឬទំនាក់ទំនងការងារអ្វីមួយពីព្រោះថាផ្លែផ្កាតែងហុចមកវិញគ្រាន់ជាទីកក់ក្តៅ។សម្រាប់អ្នកប្រកបរបររកស៊ីជួញដូរនៅថ្ងៃនេះវិញបើចង់ជួញទីជិតឆ្ងាយមិនថាផ្លូវទឹកផ្លូវអាកាសផ្លូវគោកក្តីតែងហុចផ្លែផ្កាគ្រាន់ស្រួលចិត្តហើយក៏មានភាពសុខដុមល្អ។ បញ្ហាសម្ព័ន្ធស្នេហាកំលោះក្រមុំបើលោកអ្នកចង់ធ្វើការជ្រើសរើសគូស្រករតែងជួបគូព្រេងពិតដូចសេចក្តីប្រាថ្នា៕
ឆ្នាំកុរ
រាសីខ្ពស់ត្រដែត។ការរស់នៅជួបភាពសុខដុមឡើងវិញ ហើយបញ្ហាស្មុគស្មាញក៏បានប្រែមកភ្លឺថ្លាវិញមួយចំនួនដែរ ។ការបំពេញការងារវិញចៅហ្វាយនាយមានការយកចិត្តទុកដាក់និងយល់ចិត្តគ្រាន់គាប់ប្រសើរ។សម្រាប់អ្នកប្រកបរបររកស៊ីជួញដូរមានការរីកលូតលាស់ទៅមុខគួរសម ហើយបើលោកអ្នកចង់បើករបរអ្វីមួយថ្មីក៏មានការលូតលាស់ទៅមុខសន្សឹមៗជានិច្ច។ រីឯបញ្ហាសេចក្តីស្នេហាប្រុសស្រីមានការរីកលូតលាស់និងផ្អែមល្ហែមប្រពៃ៕