ហោរាសាស្រ្ត ប្រចាំថ្ងៃ ព្រហស្បតិ៍ ទី ៤ ខែ មីនា ឆ្នាំ ២០២១ ត្រូវនឹងថ្ងៃទី ៦រោច ខែផល្គុន ឆ្នាំជូត ទោស័ក ពស២៥៦៤
ឆ្នាំជូត
រាសីល្អជាមធ្យម។អ្នកកើតឆ្នាំកណ្តុរ នាពេលនេះលោកអ្នកជួបស្ថានភាពលំបាកទៅលើបញ្ហាប្រាក់កាស ហើយរឿងរាវមួយចំនួនដែលកើតពីមុនមកក៏មិនទាន់ដោះស្រាយស្រេចបាច់នៅឡើយដែរ។លោកអ្នកគប្បីអត់ធ្មត់ និង ដោះស្រាយរឿងរាវទាំងនេះដោយប្រើបញ្ញាជាអាវុធទើបជាការល្អបំផុត។ការប្រកបការងារនៅថ្ងៃនេះស្ថានការណ៍ពេលខ្លះមើលឃើញថាល្អសោះអាចប្រែក្លាយជាអាក្រក់ស្មានមិនដល់ផង។ចំពោះអ្នកប្រកបរបរកស៊ីជួញដូរទោះខ្សត់ខ្សោយចំណូលថវិការពិតមែន ប៉ុន្តែការធ្វើជំនួញរបស់លោកអ្នកសុខដុមដូចសព្វមួយដងទេ។ សម្ព័ន្ធស្នេហាកំលោះក្រមុំ ឬ សូម្បីតែស្វាមីភរិយាក្តី អារម្មណ៍ពុំសូវល្អចំពោះគ្នាឡើយព្រោះជួនផ្អែម ជួនជូរចត់អញ្ចឹងដែរ៕
ឆ្នាំឆ្លូវ
រាសីល្អជាមធ្យម។ការរស់នៅថ្ងៃនេះលោកអ្នកចូរប្រយ័ត្នក្រុមមនុស្សថាស្តីបន្ទោសបង្កើតជាបញ្ហា និងពិសេសអាចកើតជាជម្លោះវិវាទថែមទៀត។ការប្រកបការងារកុំសង្ឃឹមជាមួយមនុស្សសន្យាពេកពីព្រោះថាច្រើនតែខកបំណង និង ក្រុមមនុស្សមិនគោរពតាមសន្យាប៉ុន្មាននោះឡើយ។ការប្រកបរបរ រកស៊ីជួញដូរ មុជមិនជ្រៅទៅមិនឆ្ងាយប៉ុន្មានទេ ហើយពិសេសការរកចំណូលចិញ្ចឹមគ្រួសារប្រចាំថ្ងៃស្ទើរមិនគ្រប់ផង។ សម្ព័ន្ធស្នេហាកំលោះក្រមុំមានបញ្ហារកាំចិត្តខ្លះៗកើតឡើង តែយ៉ាងណាកុំខ្វល់ខ្វាយតែការប្រចែប្រច័ណ្ឌនាំតែកើតសៅហ្មង និង ទម្លាប់អាក្រក់ទៅថ្ងៃក្រោយប៉ុណ្ណោះ៕
ឆ្នាំខាល
រាសីខ្ពស់ត្រដែត។នៅថ្ងៃនេះ លោកអ្នក អាចសម្រុកធ្វើអ្វីមួយបានហើយ ពីព្រោះថា ផលល្អៗតែងឆ្លើយតបមកវិញគ្រាន់ជាទីពេញចិត្តត្រឡប់មកវិញ។ការប្រកបការងារជាក្រុមហ៊ុនឯក ជន ឬមន្ត្រីរាជការក្តីឃើញថាមានភាពរលូនល្អ ហើយបើចង់ផ្លាស់ប្តូរការងារក៏តែងទទួលជោគជ័យដែរ។អ្នកធ្វើជំនួញទីជិតឆ្ងាយបើចង់ទិញរបស់ទុកគ្រាន់លក់យកចំណេញទៅថ្ងៃក្រោយ ឬចង់ចរចាដោះដូរទិញអ្វីមួយតែងសមដូចប្រកបគួរសម។ សេចក្តីសេ្នហាកំលោះក្រមុំមានភាពស្រស់ស្រាយ និង កំពុងមានភាពផ្អែមល្ហែមគួរសមឡើងវិញ៕
ឆ្នាំថោះ
រាសីខ្ពស់ត្រដែត។នៅថ្ងៃនេះដំណើរជីវិតរបស់លោកអ្នកល្អប្រសើរ ហើយពិសេសលោកអ្នកអាចទទួលដំណឹងអ្វីមួយចូលមកគ្រាន់សប្បាយចិត្តទៀតផង។ក្រៅពីនេះការប្រកបការងារមានការជឿនលឿនទាំងកិច្ចការងារ និង បញ្ហាប្រាក់កាសក៏អាចមានហូរចូលខ្លះៗថែមទៀត។អ្នកធ្វើជំនួញមានភាពសុខដុម ហើយលោកអ្នកបើចង់សាកល្បងជួញទីជិតឆ្ងាយដែលជាមុខរបរថ្មីថ្មោងអាចសម្រេចជោគជ័យ តែយ៉ាងណាការធ្វើជំនួញរយៈពេលយូរអង្វែង តែងមិនសូវសមដូចប្រកបប៉ុន្មានទេ។ សម្ព័ន្ធស្នេហាកំលោះក្រមុំនាពេលនេះបើយល់ចិត្តថ្លើមគ្មានអស់ហើយ អាចនិយាយដល់ចាស់ទុំបានផងដែរពីព្រោះថាជាពេលវេលាល្អសម្រាប់ផ្សំផ្គុំគ្រួសារបំផុត៕
ឆ្នាំរោង
រាសីល្អជាមធ្យម។អំឡុងពេលនេះសម្រាប់ស្ត្រីកើតឆ្នាំរោង លោកអ្នកតោងតែចេះគ្រប់គ្រងអារម្មណ៍ឱ្យបានល្អ មិនត្រូវប្រកាន់ចិត្តឆេវឆាវ ប៉ះដៃយកដៃ ប៉ះជើងយកជើងទេ ហើយតោងតែចងចាំពាក្យចាស់ថា”ខឹង ខូចខឹងខាត”ប៉ុណ្ណោះឯង។ការប្រកបការងារនៅថ្ងៃនេះវិញបើសិនជាបុរសឱ្យប្រយ័ត្នប្រយែងរឿងរាវចាស់ ឬកិច្ចការងារគ្រាមុនកន្លងមក ពីព្រោះថាងាយកើតឡើងជាបញ្ហាលំបាកជាងសព្វមួយដង។ការធ្វើជំនួញឆ្ងាយជិត និយាយពីរឿងប្រាក់ចំណូលកុំសង្ឃឹមថាបានដូចចិត្ត ហើយបើចង់ទារអតិថិជនច្រើនខកបំណងច្រើនជាង។ សម្ព័ន្ធស្នេហាកំលោះក្រមុំមិនត្រូវងប់ងល់តែរឿងរាវស្នេហាច្រើនពេក ត្រូវ រកពេលបំពេញការងារឬប្រើគំនិតរៀនសូត្រឱ្យបានច្រើនទើបអនាគតវាភ្លឺថ្លាទៅរួច៕
ឆ្នាំម្សាញ់
រាសីស្រុតចុះ។នៅថ្ងៃនេះអ្វីៗលោកអ្នកមិនត្រូវសង្ឃឹមពេកឡើយ ពីព្រោះថាអ្វីដែលលោកអ្នកសង្ឃឹមវាអាចប្រែក្រឡាស់មកជាអត់ និងពេលខ្លះក្រុមមនុស្សដែលធ្លាប់តែល្អគេអាចបែរមកព្រួតគ្នាវាប្រហារអ្នកថែមទៀត។ការប្រកបការងារវិញមិនត្រូវធ្វេសប្រហែសឡើយ ត្រូវតែមានការប្រុងប្រយ័ត្ន និង ខិតខំទើបបញ្ហាអាក្រក់វានឹងប្រែមកជាល្អវិញ។ការធ្វើជំនួញតែងមានឧបទ្រពចង្រៃបិទបាំងធ្វើឱ្យការជួញឆ្ងាយជិតមិនសូវសមដូចប្រកបឡើយ ហើយបើនិយាយពីចំណូលនោះតិចតួចស្តួចស្តើងដោយអ្នកខ្លះសឹងថាចិញ្ចឹមខ្លួនឯងមិនគ្រាន់មាត់ផង៕ សម្ព័ន្ធស្នេហាកំលោះក្រមុំត្រូវចេះទុកចិត្តគ្នា និងមិនត្រូវប្រកែប្រកាន់ច្រើនឡើយពីព្រោះថានោះសុទ្ធសឹងនាំរឿងរាវអំពល់ទុក្ខប៉ុណ្ណោះ៕
ឆ្នាំមមី
រាសីល្អជាមធ្យម។អំឡុងពេលនេះលោកអ្នកត្រូវយកភាពត្រជាក់ដាក់ខ្លួន បើពុំនោះទេការសម្រេចចិត្តអ្វីមួយងាយមានកំហុសឆ្គង និងភ្លាំងភ្លាត់ ងាយណាស់ផង។ការប្រកបការងារនៅថ្ងៃនេះវិញពុំមានអ្វីប្រែប្រួលប្តូរផ្លាស់ទេគឺដូចសព្វមួយដង។ចំពោះអ្នកប្រកបរបររកស៊ីជួញដូរវិញមួយរយះពេលនេះមានការខ្សត់ខ្សោយក្នុងការរកផលចំណូលបន្តិច ហេតុនេះគប្បីមានការអត់ធ្មត់ក្នុងមុខរបរទើបប្រសើរ។ រីឯបញ្ហាសេចក្តីស្នេហាកំលោះក្រមុំមិនសូវចុះសម្រុងគ្នាប៉ុន្មានទេពីព្រោះម្នាក់ៗប្រកាន់ចិត្តខ្លាំងរៀងៗខ្លួន៕
ឆ្នាំមមែ
រាសីខ្ពស់ត្រដែត។នៅអំឡុងពេលនេះសម្រាប់លោកអ្នកស្ត្រីកើតឆ្នាំពពែអាចសម្រុកឬធ្វើអ្វីមួយបានហើយ ពីព្រោះថាលទ្ធផលតែងឆ្លើយតបមកវិញគ្រាន់ កក់ក្តៅ។ចំពោះលោកអ្នកដែលបំពេញការងារក្រុមហ៊ុនឯកជន និងជាមន្ត្រីរាជការមានដំណើរជីវិតល្អប្រសើរ ហើយធ្វើអ្វីៗតែងទទួលជាផ្លែផ្កាគ្រាន់ជាទីមនោរម។អ្នកប្រកបរបររកស៊ីជួញដូរមានការរីកលូតលាស់គួរសម ម្ល៉ោះហើយជាឱកាសល្អក្នុងការពង្រីកមុខរបរថ្មីឬបណ្តាក់ទុនបន្ថែមព្រោះផ្លែផ្កាដែលទទួលបានតែងហុចមកវិញដូចសមប្រកប។ រីឯបញ្ហាស្នេហាប្រុសស្រីមានភាពផ្អែមល្ហែមដូចទឹកឃ្មុក៏ថាបាន៕
ឆ្នាំវក
រាសីស្រុតចុះ។ថ្ងៃនេះស្ត្រីចូរប្រយ័ត្នក្រុមមនុស្សតាមផ្ចាញ់ផ្ចាលកើតជម្លោះវិវាទហើយនាំជះឥទ្ធិពលអាក្រក់ទៅគ្រាខាងមុខ។ការប្រកបការងារងាយភ្លាំងភ្លាត់ខ្ពស់ ហេតុនេះត្រូវចេះចាត់ចែងនិងប្រយ័ត្នប្រយែងការងារចាស់ៗក៏កាន់តែប្រសើរ។សម្រាប់អ្នកប្រកបរបររកស៊ីជួញដូរវិញជួបផលលំបាកក្នុងការប្រាក់កម្រៃបន្តិច ហើយបើមានការជួញឆ្ងាយទៀតសោតចូរប្រយ័ត្នជួបគ្រោះចាញ់បោកគេ ។ រីឯសេចក្តីស្នេហាកំលោះក្រមុំមានការប្រែប្រួលប្តូរផ្លាស់ពីព្រោះជួនផ្អែមល្ហែមជួនពាក់មុខយក្សដាក់គ្នា៕
ឆ្នាំរកា
រាសីល្អជាមធ្យម។ក្នុងរង្វង់គ្រួសារ ស្វាមីភរិយាមានភាពប្រទាំងប្រទើស ដូច្នេះត្រូវចេះអត់ឱនឱ្យគ្នាទៅវិញទៅមកទើបរក្សាភាពសុខដុមបានយូរអង្វែង។នៅថ្ងៃនេះការប្រកបការងាររបស់លោកអ្នក ពុំសូវមានការរីកលូតលាស់ ប៉ុន្មានទេពោលគឺមានភាពនឹងថ្កល់ជាប់មួយកន្លែង ហើយបើមានការរីកចម្រើននោះក៏តិចតួចបំផុត។ អ្នកប្រកបរបររកស៊ីជួញដូរវិញបើលោកអ្នកចង់បណ្តាក់ទុនអ្វីមួយឃើញថាមិនទាស់ខុសអ្វីទេព្រោះតែងហុចផ្លែផ្កាគ្រាន់ជាទីកក់ក្តៅដែរ។ រីឯបញ្ហាសេចក្តីស្នេហាកំលោះក្រមុំបើមានការជម្លោះវិវាទត្រូវតែប្រញាប់ផ្សះផ្សារទើបប្រសើរ៕
ឆ្នាំច
រាសីល្អជាមធ្យម។លោកអ្នកកើតឆ្នាំច ពិសេសស្ត្រីនាពេលនេះទោះចង់ធ្វើអ្វីមិនអាចសម្រេចចិត្តភ្លាមៗឬចង់ធ្វើអ្វីភ្លាមៗដោយមិនខ្លាចកោតក្រែងឡើយ បើពុំនោះទេនឹងជះផលអាក្រក់នាពេលក្រោយយូរអង្វែងថែមទៀត។ការប្រកបការងារនាថ្ងៃនេះទាក់ទងនឹងចំណូលក្រៅ ពិសេសលើបញ្ហាប្រាក់កាសក៏ងាយហូរធ្លាយចេញច្រើនជាងហូរចូលផងដែរ។សម្រាប់ថ្ងៃនេះដែរដោយសារដួងរាសីស្រុតចុះ ដូចនេះការប្រកបរបររកស៊ីជួញដូរមានការរកាំចិត្ត និងពិសេសឱ្យប្រយ័ត្នជម្លោះវិវាទកើតឡើង។ រីឯបញ្ហាសេចក្តីស្នេហាកំលោះក្រមុំវិញមានដំណើរថយក្រោយច្រើនជាងការរីកលូតលាស់ទៅមុខ៕
ឆ្នាំកុរ
រាសីល្អជាមធ្យម។នា ថ្ងៃនេះដោយសារដួងរាសីស្រុតចុះ ម្ល៉ោះហើយការរស់នៅ លោកអ្នកអាចបានស្តាប់រឿងរាវមិនល្អឬមានដំណឹងមិនល្អនាំឱ្យសៅហ្មងផង។ការប្រកបការងារលោកអ្នកមិនត្រូវស្តាប់ជឿក្រុមមនុស្សពេកឡើយត្រូវចេះពិនិត្យពិច័យ និងប្រយ័ត្នប្រយែងខ្លួនឯងទើបគ្មានពាក្យថាលំបាកនាពេលក្រោយ។ចំពោះអ្នកប្រកបរបររកស៊ីជួញដូរកុំសូវលោភលន់ច្រើនព្រោះពុំដូចនេះមិនត្រឹមលាភហេងបោលហួសទេគឺអាចត្រូវបង់កម្លាំងទទេទៀតផង។ រីឯបញ្ហាស្នេហាវិញមិនសូវមានការលូតលាស់ទៅមុខទេពោលគឺតែងមានការថយក្រោយច្រើនជាង៕