ហោរាសាស្រ្ត ប្រចាំថ្ងៃ សៅរ៍ទី ២៩ ខែ ឧសភា ឆ្នាំ ២០២១ ត្រូវនឹងថ្ងៃ ៣រោច ខែជេស្ឋ ឆ្នាំឆ្លូវ ត្រីស័ក ពស២៥៦៥
ឆ្នាំជូត
រាសីខ្ពស់ត្រដែត។នៅថ្ងៃនេះដួងរាសីរបស់លោកអ្នកខ្ពស់ត្រដែតដដែលទេ ហេតុនេះផ្តល់ផលល្អក្នុងការធ្វើអ្វីមួយសំខាន់ពីព្រោះថាតែងហុចជាលទ្ធផលគ្រាន់ជាទីគាប់ចិត្ត។លោកអ្នកគប្បីសម្រុកការងារនាពេលនេះពីព្រោះថា ឆ្លងដល់ខែក្រោយដួងរាសីខែស្រុតចុះវិញធ្វើឱ្យជួបផលលំបាកជាងនេះផង។លោកអ្នកធ្វើអ្វីតែងមានភ្លើងខៀវបើករង់ចាំពិសេសអាចទទួលផលល្អណាមួយថែមទៀត។អ្នកប្រកបរបររកស៊ីជួញដូរមានការទិញចូលលក់ចេញគ្រាន់បើតែយ៉ាងណាលោកអ្នកទាល់តែខិតខំខ្លាំងទើបទទួលជោគជ័យជំនូញធំៗទៅរួច។ រីឯសម្ព័ន្ធស្នេហាប្រុសស្រីបើមានការផ្សំផ្គុំគ្រួសារឬចូលស្តីដណ្តឹងជាពេលវេលាល្អប្រពៃបំផុត៕
ឆ្នាំឆ្លូវ
រាសីល្អជាមធ្យម។នៅថ្ងៃនេះលោកអ្នកទោះធ្វើអ្វីក៏ដោយនៅតែមានការរីកលូតលាស់ទៅមុខសន្សឹមៗដូចនេះត្រូវខិតខំប្រឹងប្រែងនោះនឹងជោគជ័យដល់គោលដៅជាក់ជាពុំខាន។ក្រៅពីនេះទោះធ្វើអ្វីក៏ដោយត្រូវគិតឱ្យបានគ្រប់ជ្រុងជ្រោយនោះទើបមិនជួបរឿងរាវត្រូវចាញ់បោកគេដោយប្រការណាមួយ។សម្រាប់អ្នកប្រកបរបររកស៊ីជួញដូរលោកអ្នកត្រូវមានទំនាក់ទំនងល្អជាមួយក្រុមមនុស្សជុំវិញខ្លួនឱ្យបានច្រើនព្រោះអាចទាញផលប្រយោជន៍អ្វីមួយមកវិញទៀតផង។ រីឯសម្ព័ន្ធស្នេហាប្រុសស្រីកុំគប្បីយកភាពប្រចែប្រច័ណ្ឌដាក់ខ្លួនច្រើននាំភាគីម្ខាងទៀតកើតការធុញទ្រាន់ងាករេចិត្ត៕
ឆ្នាំខាល
រាសីស្រុតចុះ។នៅថ្ងៃនេះលោកអ្នកកើតការខ្វាយខ្វល់ ហើយបញ្ហាខ្លះមិនធ្លាប់មានសោះក៏អាចរត់ចូលមកដែរ។ការប្រកបការងារលោកអ្នកគប្បីបន្ថែមការប្រុងប្រយ័ត្នបន្តិចពីព្រោះថាផលអាក្រក់ងាយកើតឡើងត្រូវឆ្លងកាត់ផង។សម្រាប់អ្នកប្រកបរបររកស៊ីជួញដូរមានការរីកលូតលាស់តិចតួចតែយ៉ាងណាការជួញទីជិតឆ្ងាយការរកផលកម្រៃនោះទោះមិនច្រើនពិតមែនក្តីតែក៏មានភាពសុខដុមគួរជាទីកក់ក្តៅផង។ រីឯបញ្ហាសេចក្តីស្នេហាប្រុសស្រីកុំមានចិត្តរេដូចចុងស្រល់ប្រយ័ត្នកម្មពៀរវាឆ្លងម្តងម្នាក់វិញ៕
ឆ្នាំថោះ
រាសីល្អជាមធ្យម។ក្នុងថ្ងៃនេះដំណើរជីវិតរបស់លោកអ្នកមានភាពលូតលាស់សន្សឹមៗទៅមុខហើយទោះធ្វើអ្វីក៏មានភាពសុខដុមដែរ។សម្រាប់ការប្រកបការងារបើមានឧបសគ្គ ហើយកាលពីមុនមកទទួលផលលំបាកក្នុងការដោះស្រាយពេលនេះបើព្យាយាមពុះពារក៏តែងហុចផ្លែផ្កាដូចជាទីពេញចិត្តផងដែរ។សម្រាប់អ្នកប្រកបរបររកស៊ីជួញដូរមានការរីកលូតលាស់គួរសម ម្ល៉ោះហើយជាឱកាសល្អក្នុងការពង្រីកមុខរបរថ្មីឬបណ្តាក់ទុនបន្ថែមព្រោះផ្លែផ្កាដែលទទួលបានតែងហុចមកវិញដូចសមប្រកប។ រីឯបញ្ហាសេចក្តីស្នេហាប្រុសស្រីកំពុងសុខដុមនិងមានភាពផ្អែមល្ហែមគួរសម៕
ឆ្នាំរោង
រាសីស្រុតចុះ។នៅថ្ងៃនេះដួងរាសីស្រុតចុះ ហើយបើតាមក្បួនហោរាសាស្ត្រចិន បញ្ជាក់ថាមិនផ្តល់ផលល្អសម្រាប់លោកអ្នកធ្វើដំណើរឆ្ងាយប៉ុន្មានឡើយ។ក្នុងថ្ងៃនេះដែរបើលោកអ្នកសម្រេចចិត្តធ្វើអ្វីក៏ដោយត្រូវមានការប្រយ័ត្នប្រយែងបន្តិចព្រោះថាផលល្អនិងផលអាក្រក់ដើរទន្ទឹមគ្នាជានិច្ច។សម្រាប់អ្នកប្រកបរបររកស៊ីជួញដូរការជួញផ្លូវឆ្ងាយពុំសូវកាក់កបប៉ុន្មានទេ ហើយបើរកស៊ីនាយអាយក្បែរៗផ្ទះបានគ្រាន់ចិញ្ចឹមឆ្នាំងបាយអញ្ចឹងដែរ។ រីឯបញ្ហាសេចក្តីស្នេហាកំលោះក្រមុំមានការកើតទុក្ខឥតសូវស្បើយដែរទេដោយសាររឿងរាវប្រទាំងប្រទើសកើតឡើងបន្តបន្ទាប់នាកន្លងមក៕
ឆ្នាំម្សាញ់
រាសីខ្ពស់ត្រដែត។ដំណើរជីវិតរបស់លោកអ្នកនាថ្ងៃនេះឃើញថាបញ្ហាឧបទ្រពចង្រៃចៀសឆ្ងាយ ហើយបញ្ហាល្អៗបានហូរចូលជំនួសមកវិញ ហេតុនេះធ្វើឱ្យ លោកអ្នក សប្បាយចិត្ត សប្បាយកាយគ្រាន់ជាទី កក់ក្តៅ ផ្លូវចិត្ត។ថ្ងៃនេះការប្រកបមុខរបរមិនសូវជឿនលឿនទៅមុខពិតមែនប៉ុន្តែក៏មានភាពសុខដុមគ្រាន់ប្រពៃ។អ្នកប្រកបរបររកស៊ីជួញដូរវិញប្រៀបដូចបានជា(ភ្លៀងធ្លាក់មួយមេមេឃស្រទ្បះ)ព្រោះអាចកម្ចាត់រាល់ឧបទ្រពចង្រៃទាំងពួងឱ្យវិនាសជាអហោសិកម្មអស់ ហើយលោកអ្នកអាចប្រកបមុខរបរពេញដៃពេញជើងទ្បើងវិញ។ សម្ព័ន្ធស្នេហាប្រុសស្រីមានការជឿនលឿនទៅមុខនិងកំពុងមានភាពស្រស់ស្រាយប្រពៃណាស់៕
ឆ្នាំមមី
រាសីស្រុតចុះ។នៅថ្ងៃនេះបើជាស្ត្រីមុនធ្វើអ្វីតោងតែចេះគិតគូរឱ្យបានគ្រប់ជ្រុងជ្រោយ បើពុំនោះទេផលលំបាកពិតជាមិនងាយចៀសរួចណាស់។ក្រៅពីនេះការប្រកបការងារក៏ងាយការសម្រេចចិត្តអ្វីមួយងាយភ្លាំងភ្លាត់ដែរគប្បីប្រយ័ត្នប្រយែង។អ្នកប្រកបរបររកស៊ីជួញដូរក្នុងថ្ងៃនេះពុំផ្តល់ផលល្អក្នុងការបណ្តាក់ទុនធំប៉ុន្មានឡើយ គួរមានការគិតឱ្យបានជ្រុយជ្រោយមុនធ្វើអ្វីមួយព្រោះបើបោះទុនទៅហើយមិនងាយដកទុនមកវិញឡើយ ហើយស្រួលមិនស្រួលកប់ដើមសូន្យឈឹងតែម្តង។ រីឯបញ្ហាស្នេហាកំលោះក្រមុំឬពោះម៉ាយមេម៉ាយក្តី មានការហួងហែងនិងម្នាក់ៗយកភាពប្រចែប្រច័ណ្ឌដឹកមុខនាំឱ្យល្អក់កករផ្លូវចិត្តច្រើន ៕
ឆ្នាំមមែ
រាសីស្រុតចុះ។នៅក្នុងអំឡុងពេលនេះលោកអ្នកគប្បីមានការបើកចិត្តឱ្យទូលាយជាងនេះ ទើបដំណើរជីវិតមានភាពសុខដុម ហើយគ្មានរឿងរាវចម្រូងចម្រាសកើតឡើង។នៅថ្ងៃនេះវិញបើលោកអ្នកប្រកបការងារអ្វីមួយមិនគប្បីមានភាពរឹងរូសឬយកភាពមោហៈទោសៈដាក់ខ្លួនឡើយបើពុំនោះទេនឹងជួបរឿងរាវបង់ប្រយោជន៍ណាមួយជាក់ជាពុំខាន។អ្នកប្រកបរបររកស៊ីជួញដូរនៅថ្ងៃនេះដែរមានការជឿនលឿនទៅមុខជាសន្សឹមៗឥតថយក្រោយទេតែយ៉ាងណាបើលោកអ្នកចង់រកស៊ីចូលហ៊ុនជាមួយអ្នកដទៃឱ្យប្រយ័ត្នបន្តិចព្រោះងាយខាតបង់និងចាញ់បោកគេណាស់។ រីឯបញ្ហាសម្ព័ន្ធស្នេហាកំលោះក្រមុំមានការផ្អែមល្ហែមនិងជឿនលឿនទៅមុខប្រពៃ៕
ឆ្នាំវក
រាសីល្អជាមធ្យម។នៅថ្ងៃនេះមុនសម្រេចចិត្តអ្វីមួយលោកអ្នកតោងតែគិតពិចារណាឱ្យបានល្អពីព្រោះថាបើសម្រេចចិត្តត្រូវនោះផលល្អៗតែងឆ្លើយតបមកវិញជានិច្ច ប៉ុន្តែបើសម្រេចចិត្តខុសវិញនោះផលអាក្រក់ក៏តែងផ្តល់មកវិញទៅតាមនោះដែរ។ចំពោះការប្រកបការងារឃើញថាពុំមានអ្វីប្រែប្រួលប្តូរផ្លាស់គួរកត់សម្គាល់ទេគឺដូចសព្វមួយដង។ការប្រកបមុខជំនួញជួបបញ្ហាលំបាក និង ការ រកប្រាក់ចំណូលខ្សត់ខ្សោយជាងសព្វមួយដង។ សម្ព័នស្នេហាប្រុសស្រីថ្ងៃនេះវិញពុំសូវមានការជឿនលឿនទៅមុខទេមានតែការថយក្រោយនិងងាយកើតរឿងបែកបាក់ថែមទៀត៕
ឆ្នាំរកា
រាសីខ្ពស់ត្រដែត។ថ្ងៃនេះដំណើរជីវិតល្អប្រសើរ ដូចនេះលោកអ្នកអាចទទួលដំណឹងល្អអ្វីមួយផង។នៅថ្ងៃនេះលោកអ្នកកើតឆ្នាំមាន់ផ្តល់ផលល្អសម្រាប់លោកអ្នកប្រកបការងារតូចធំពីព្រោះថាផលតែងឆ្លើយតបគ្រាន់កក់ក្តៅ។ ចំពោះអ្នកប្រកបរបររកស៊ីជួញដូរបើចង់ធ្វើអ្វីមួយមិនភ័យព្រួយឡើយពីព្រោះលោកអ្នកតែងមានប្រៀបឬយ៉ាងហោចណាស់ក៏អាចរកផលកម្រៃគ្រាន់កក់ក្តៅខ្លះដែរ។
បញ្ហាសេចក្តីស្នេហាកំលោះក្រមុំឱ្យចេះដឹងទុក្ខធុរះគ្នា ហើយមិនត្រូវអាត្មានិយមឡើយបើពុំនោះទេផលលំបាកនឹងជួបនៅពេលក្រោយចៀសមិនរួចឡើយ៕
ឆ្នាំច
រាសីស្រុតចុះ។នៅថ្ងៃនេះបើទោះបីដំណើរជីវិតរបស់លោកអ្នកមិនបានទទួលរងផលប៉ះពាល់អ្វីក៏ដោយប៉ុន្តែក៏ផលលំបាកមួយចំនួនតែងយាយីដោយសារការគិតនិងអារម្មណ៍ប្រែប្រួលរបស់ខ្លួនឯងផង។ការប្រកបការងារពុំសូវលូតលាស់ទៅមុខទេ ហើយបើថយក្រោយនោះឃើញថាខ្លាំងក្លាផង។សម្រាប់អ្នកប្រកបរបររកស៊ីជួញដូរនៅថ្ងៃនេះវិញឃើញថាការរកផលចំណូលពុំសូវដូចគាប់បំណងប៉ុន្មានទេគឺច្រើនបោលហួសនិងហោះរំលងជានិច្ច។ រីឯសេចក្តីស្នេហាប្រុសស្រីកុំចង់យកកំហឹងទល់កំហល់ប្រយ័ត្នកើតជម្លោះវិវាទឈានដល់ការបែកបាក់៕
ឆ្នាំកុរ
រាសីល្អជាមធ្យម។នៅថ្ងៃនេះដំណើរជីវិតរបស់លោកអ្នកមានភាពរដិបរដុបច្រើនបន្តិច ហេតុនេះចូរប្រយ័ត្នកើតជម្លោះវិវាទព្រោះតែការនិយាយប៉ះពាល់ទៅលើអ្នកដទៃ។ការប្រកបការងារលោកអ្នកឱ្យប្រយ័ត្នកើតរឿងមួយហើយមួយទៀតមិនចេះចប់និងពិបាកដោះស្រាយនាពេលក្រោយ។សម្រាប់អ្នកប្រកបរបររកស៊ីជួញដូរទាំងការជួញទីជិតឆ្ងាយការរកផលកម្រៃទោះជួបផលលំបាកម្តេចមា្តក៏មានហូរចូលមួយៗគ្រាន់បំពេញបំពង់អញ្ចឹងដែរ។ រីឯបញ្ហាសម្ព័ន្ធស្នេហាកំលោះក្រមុំមានការជឿនលឿនទៅមុខតិចតួចណាស់ដូចនេះត្រូវចេះពូនជ្រោយចំណងស្នេហារបស់ខ្លួនបន្តិចទើបប្រសើរ៕