ហោរាសាស្រ្ត ប្រចាំថ្ងៃ សុក្រ ទី ១៣ ខែ ឧសភា ឆ្នាំ ២០២២ ត្រូវនឹងថ្ងៃ ១៣កើត ខែពិសាខ ឆ្នាំខាល ចត្វាស័ក ពស២៥៦៥

ឆ្នាំជូត

រាសីស្រុតចុះ។នៅថ្ងៃនេះលោកអ្នកគប្បីមានការប្រយ័ត្នប្រយែងបន្តិចក្នុងការរស់នៅពីព្រោះថារឿងរាវងាយរត់ចូល ហើយបើជារបស់របរងាយខូចខាតនិងបាត់បង់ជាងសព្វមួយដង។ការធ្វើដំណើរឆ្ងាយជិតចូរប្រយ័ត្នកើតបញ្ហាណាមួយដោយសារអ្នកដទៃបង្កឡើង។រាល់កិច្ចការងារតូចធំមានបញ្ហារាំងស្ទះខ្លះៗយាយី ហេតុនេះបើមានការប្រឹងប្រែងតែងទទួលជោគជ័យត្រឡប់មកវិញមួយចំនួនផងដែរ។សម្រាប់អ្នកប្រកបរបររកស៊ីជួញដូរមានការជឿនលឿនទៅមុខតិចតួច ហើយបើថយក្រោយនោះក៏មានច្រើន។ រីឯបញ្ហាសេចក្តីស្នេហាកំលោះក្រមុំមានការងាយទាំងផ្អែមល្ហែម ហើយក៏ងាយកើតរឿងរាវទាស់ទែង៕

ឆ្នាំឆ្លូវ

រាសីស្រុតចុះ។លោកអ្នកមានការផ្លាស់ប្តូរទាំងខាងអារម្មណ៍និងកិច្ចការងារ ម្ល៉ោះហើយចូរប្រយ័ត្នប្រយែង។ចំពោះការប្រកបការងារ លោកអ្នក ឱ្យប្រយ័ត្នបញ្ហាពាក្យសម្តីដែលងាយកើតជារឿងរាវជាមួយអ្នកដទៃណាស់។ក្នុងអំឡុងពេលនេះដែរចំពោះលោកអ្នកដែលចង់ពង្រីកមុខរបររកស៊ីជួញដូរគឺពុំសូវទទួលផលប្រយោជន៍អ្វីឡើយគឺបានត្រឹមមួយបង់កម្លាំងច្រើនជាង។ រីឯបញ្ហាគូស្នេហាប្រុសស្រីបើចង់ផ្តើមស្នេហ៍ជាមួយនរណាម្នាក់ងាយត្រូវរ៉ូវគ្នាហើយក៏ងាយបែកបាក់ទៅវិញផង៕

ឆ្នាំខាល

រាសីខ្ពស់ត្រដែត។នៅថ្ងៃនេះបញ្ហាតូចធំមួយចំនួនបានធូរស្បើយ ហើយរឿងរាវខ្លះដែលកើតកាលពីមុនមកឃើញថាបើមានការសម្រុះសម្រួលអាចដោះស្រាយបានផង។ការប្រកបការងារមានការជឿនលឿនទៅមុខឥតថយក្រោយទេ ពិសេសក្រុមមនុស្សតែងមិនសូវហ៊ានយាយីថែមទៀត។អ្នកប្រកបរបររកស៊ីជួញដូរវិញបើលោកអ្នកចង់បោះទុនតូចធំឬចង់រកស៊ីចូលហ៊ុនជាមួយអ្នកដទៃត្រូវចេះត្រួតពិនិត្យឱ្យបានគ្រប់ជ្រុងជ្រោយបើពុំនោះទេអាចជួបផលអាក្រក់ណាមួយនៅថ្ងៃខាងមុខជាក់ជាពុំខាន។ រីឯបញ្ហាសេចក្តីស្នេហាប្រុសស្រីកុំជ្រួលជ្រើមខុសបែបបទប្រយ័ត្ននាំក្តីទុក្ខលំបាកមកវិញ៕

ឆ្នាំថោះ

រាសីល្អជាមធ្យម។នៅថ្ងៃនេះលោកអ្នកជួបបញ្ហានឿយហត់ ពិសេសរឿងរាវតូចធំតែងចូលយាយីច្រើនទៀតផង។ទោះបីយ៉ាងណា លោកអ្នក អាចមានជីវិតគាប់ប្រសើរជាងមុនបើសិនមានការព្យាយាមអត់ធ្មត់ក្នុងការបំពេញការងារឬខិតខំដោះស្រាយបញ្ហា លំបាកដែលកើតកាល ពីមុនមក។អ្នកប្រកបរបររកស៊ីជួញដូរក្នុងថ្ងៃនេះឱ្យប្រយ័ត្នពាក្យសម្តីបន្តិចព្រោះងាយប៉ះទង្គិចជាមួយមនុស្សនៅជុំវិញខ្លួនបង្កើតជារឿងរាវតូចធំណាស់ ។ រីឯបញ្ហាសេចក្តីស្នេហាប្រុសស្រីកុំចង់យកកំហឹងទល់កំហល់ប្រយ័ត្នកើតជម្លោះវិវាទឈានដល់ការបែកបាក់៕

ឆ្នាំរោង

រាសីល្អជាមធ្យម។នៅថ្ងៃនេះបញ្ហាឧបទ្រព និង រឿងរាវអាក្រក់ៗដែលធ្លាប់កើតកាលពីមុនមកបានធូរស្រាល ហើយបញ្ហាខ្លះអាចដោះស្រាយបានយ៉ាងធូរទៀតផង។សម្រាប់ការប្រកបការងារ ពិសេស បុរសវិញរឿងរាវធ្លាប់តែតានតឹង ក៏បានប្រែមកធូរស្បើយ ហើយអាចទទួលជោគជ័យការងារឡើងវិញផង។អ្នកដែលប្រកបរបររកស៊ីជួញដូរមិនថាជួញទីជិតឆ្ងាយតែងអាចហុចផ្លែផ្កាមកវិញគ្រាន់ជាទីកក់ក្តៅ តែយ៉ាងណាចូរប្រយ័ត្នក្រុមមនុស្សបាបមិត្តបង្កជម្លោះណាមួយកើតឡើង។ រីឯបញ្ហាសេចក្តីស្នេហាប្រុសស្រីមានការប្រទាំងប្រទើសនិងចាប់កំហុសគ្នាធ្វើឱ្យមានបញ្ហាចម្រូងចម្រាសច្រើន៕

ឆ្នាំម្សាញ់

រាសីស្រុតចុះ។ក្នុងថ្ងៃនេះដោយសារដួងរាសីធ្លាក់ស្រុតចុះ ម្ល៉ោះហើយឱ្យប្រយ័ត្នបញ្ហាឧប្បត្តិហេតុ និងរោគជំងឺបៀតបៀនយាយីដោយប្រការណាមួយ ។ក្រៅពីនេះការប្រកបការងារចូរប្រយ័ត្នការមានកំហុសនាំត្រូវគេវាយប្រហារដោយប្រការណាមួយ។បើជាអ្នកប្រកបរបររកស៊ីជួញដូរក្នុងថ្ងៃនេះវិញពុំសូវកាក់កបទេគឺលាភហេងច្រើនបោលហួស ឬ ហោះរំលងចាប់ពុំសូវជាប់ឡើយ។ រីឯបញ្ហាស្នេហាកំលោះក្រមុំមានការរីកលូតលាស់ទៅមុខយឺត ហើយក៏ងាយថយក្រោយវិញណាស់៕

ឆ្នាំមមី

រាសីខ្ពស់ត្រដែត។ការរស់នៅបញ្ហាធ្លាប់តែចូលញាំញី ឬមានបញ្ហាមិនសូវលោះពេលវេលា នោះនាពេលនេះចាប់ផ្តើមធូរស្បើយ ហើយចង់ធ្វើអ្វីៗក៏គ្រាន់មានភាពសុខដុមប្រពៃ។ការប្រកបការងារលោកអ្នកតោងតែញាប់ដៃញាប់ជើង ហើយត្រូវចងចាំថាធ្វើច្រើនផលក៏ទទួលច្រើនទៅតាមនោះដែរ។សម្រាប់អ្នកប្រកបរបររកស៊ីជួញដូរក្នុងថ្ងៃនេះវិញមានភាពរលូនល្អទៅមុខនិងការរកប្រាក់កម្រៃទៀតសោតក៏គ្រាន់បើជាងមុន។
សម្ព័ន្ធស្នេហាកំលោះក្រមុំឬពោះម៉ាយមេម៉ាយក្តីជួបរឿងការយល់ខុសនិងភាពប្រចែប្រច័ណ្ឌចូលលុកលុយច្រើនដូចនេះត្រូវកាត់បន្ថយការបង្កជម្លោះវិវាទចេញពីខ្លួនខ្លះទើបប្រសើរ៕

ឆ្នាំមមែ

រាសីល្អជាមធ្យម។ការរស់នៅលោកអ្នកទទួលរងផលប៉ះទង្គិច និងមានរឿងរាវយាយីមួយចំនួនត្រូវឆ្លងកាត់ផង។ដូចនេះទោះធ្វើអ្វីក៏ដោយតោងតែមានការអត់ធ្មត់បន្តិចទើបមិនមានបញ្ហាមិនល្អណាមួយឈានចូលកើត។ការប្រកបការងារពុំមានអ្វីប្រែប្រួលប្តូរផ្លាស់ទេគឺដូចសព្វមួយដង។សម្រាប់អ្នកប្រកបរបររកស៊ីជួញដូរបើទោះបីលោកអ្នកចេញធ្វើជំនួញទីជិតឆ្ងាយមិនទាស់ខុសអ្វីទេព្រោះថាផ្លែផ្កាដែលទទួលបានក៏មានការរីកលូតលាស់ជាសន្សឹមៗគ្រាន់បំពេញបំពង់ដែរ។ រីឯបញ្ហាសេចក្តីស្នេហាកំលោះក្រមុំកុំដើរហើរពាសវាលកាលឬប្រព្រឹត្តិស្នេហាភ្លើតភ្លើនប្រយ័ត្នជួបរឿងស៊យកើតរឿងធំគ្មាននរណាជួយស្រោចស្រង់រួច៕

ឆ្នាំវក

រាសីស្រុតចុះ។នៅថ្ងៃនេះដំណើរជីវិតជួបបញ្ហារដិបរដុបធ្វើឱ្យងាយកើតជាបញ្ហានិងធ្វើអ្វីក៏ដោយចូរមានចិត្តត្រជាក់ទើបគ្មានរឿងរាវចូលកើត ។ការប្រកបការងារបើលោកអ្នកត្រូវធ្វើដំណើរឆ្ងាយជិតមិនសូវមានសុវត្តិភាពទេគប្បីបន្ថែមការប្រុងប្រយ័ត្ន។អ្នកប្រកបរបររកស៊ីជួញដូរមានការខ្សត់ខ្សោយក្នុងការរកផលចំណូលណាស់ ដូច្នេះទាល់តែខិតខំខ្លាំងទើបអាចរកផលកម្រៃចិញ្ចឹមគ្រួសារគ្រាន់រស់ទៅរួច។ សម្ព័ន្ធស្នេហាកំលោះក្រមុំឬពោះម៉ាយមេម៉ាយក្តីត្រូវចេះលុបបំបាត់ភាពប្រចែប្រច័ណ្ឌដែលមិនសមហេតុផលចេញខ្លះទើបប្រសើរ៕

ឆ្នាំរកា

រាសីល្អជាមធ្យម។ក្នុងរង្វង់គ្រួសារងាយមានការប៉ះទង្គិចគ្នាណាស់ ចូរប្រយ័ត្នកើតជម្លោះវិវាទកើតឡើង។ថ្ងៃនេះដែរទោះធ្វើអ្វីក៏ដោយមានភាពជឿនលឿនសន្សឹមៗទៅមុខជានិច្ច តែយ៉ាងណាលោកអ្នកត្រូវប្រុងប្រយ័ត្នផងដែរពីព្រោះផលអាក្រក់នៅពេលក្រោយតែងមានជាប់ជានិច្ច។ចំពោះអ្នកប្រកបរបររកស៊ីជួញដូរលោកអ្នកជួបលើកំណាត់ផ្លូវលំបាកក្នុងការរកផលចំណូលបន្តិច ហើយការជួញទីជិតឆ្ងាយជួបតែរឿងប្រទាំងប្រទើសចូលអុកឡុកយាយី។ បញ្ហាសេចក្តីស្នេហាប្រុសស្រីមិនសូវមានការជឿនលឿនទៅមុខទេមានតែការថយក្រោយប៉ុណ្ណោះ៕

ឆ្នាំច

រាសីខ្ពស់ត្រដែត។ការរស់នៅមានភាពត្រជាក់ត្រជុំបន្តិចវិញ ក្រោយពីជួបនូវការលំបាកនិងមានបញ្ហាមួយចំនួនយាយីរួចមក។អ្នកប្រកបការងារទាំងរាជការឬក្រុមហ៊ុនឯកជនក្តីមានការចម្រើនលូតលាស់ទៅមុខហើយបើចង់ស្នើសុំអ្វីមួយពីចៅហ្វាយនាយតែងទទួលចម្លើយឆ្លើយតបគ្រាន់ជាទីពេញចិត្ត។ បើជាអ្នកប្រកបរបររកស៊ីជួយដូរវិញបើចង់បោះទុនតូចធំមិនមានអ្វីទាស់ខុសទេព្រោះផ្លែផ្កាដែលទទួលបានក៏សមដូចប្រកប។ រីឯបញ្ហាគូស្នេហ៍កំលោះក្រមុំឬពោះម៉ាយមេម៉ាយក្តីមានភាពស្រស់ស្រាយនិងផ្អែមល្ហែមគ្រាន់ជាទីកក់ក្តៅ៕

ឆ្នាំកុរ

រាសីល្អជាមធ្យម។ ថ្ងៃនេះដួងរាសីរបស់លោកអ្នកបើមានបញ្ហាអ្វីត្រូវចេះត្រៀមទប់ទល់ ហើយប្រើបញ្ញាជាអាវុធទើបមិនជួបរឿងរាវដែលថាចាញ់ប្រៀបគេឬត្រូវគេព្យាបាទដោយប្រការណាមួយ។ការប្រកបការងារបើមានក្រុមមនុស្សមកនិយាយដើម្បីបញ្ឆេះបញ្ហាអ្វីមួយមិនត្រូវចេះតែជឿឬលោតតាមការញុះញង់ឡើយប្រយ័ត្នឥតការអ្វីសោះបង្កើតរឿងរាវដាក់ខ្លួន ហើយគេបែរជាទទួលផលប្រយោជន៍ទៅវិញ។សម្រាប់អ្នកប្រកបរបររកស៊ីជួញដូរបបញ្ហាប្រាក់កាសត្រូវជួបស្ថានភាពចំណាយច្រើន ឯចំណូលតិច ហើយពិសេសបើមានការធ្វើអ្វីពាក់ព័ន្ធបញ្ហាប្រាក់កាសច្រើនត្រូវរាំងស្ទះទៀតផង។ សម្ព័ន្ធស្នេហាកំលោះក្រមុំក្នុងពេលនេះអាចមានមនុស្សភេទផ្ទុយគ្នាមកទំនាក់ទំនងច្រើនតែស្ត្រីចូរប្រយ័ត្នធ្លាក់ចូលអន្ទាក់ប្រុសព្រាន ហើយត្រូវមកខូចអនាគតភ្លឺស្វាងឥតអំពើ៕