ហោរាសាស្រ្ត ប្រចាំថ្ងៃ ព្រហស្បតិ៍ ទី០៩ ខែ មិថុនា ឆ្នាំ ២០២២ ត្រូវនឹងថ្ងៃ ១០កើត ខែជេស្ឋ ឆ្នាំខាល ចត្វាស័ក ពស២៥៦៥
ឆ្នាំជូត
រាសីល្អជាមធ្យម។នៅថ្ងៃនេះមុនសម្រេចចិត្តអ្វីមួយលោកអ្នកតោងតែគិតពិចារណាឱ្យបានល្អពីព្រោះថាបើសម្រេចចិត្តត្រូវនោះផលល្អៗតែងឆ្លើយតបមកវិញជានិច្ច ប៉ុន្តែបើសម្រេចចិត្តខុសវិញនោះផលអាក្រក់ក៏តែងផ្តល់មកវិញជាមួយដែរ។សម្រាប់កិច្ចការការងារពុំឃើញមានអ្វីប្រែប្រួលប្តូរផា្លស់គួរជាទីកត់សម្គាល់ទេគឺដូចសព្វមួយដង។ក្នុងរយៈពេលនេះការធ្វើជំនួញតូចធំ លោកអ្នកជួបនូវបញ្ហាស្មុគស្មាញច្រើន ហើយពិសេសទំនិញជួញដូរអ្នកខ្លះបញ្ចេញមិនចេញទៀតផង។ សម្ព័ន្ធស្នេហាជួបនូវរឿងរាវរកាំរកូសច្រើនបន្តិច ហើយបើមានស្នាមប្រេះស្រាំស្រាប់ផងងាយបែកបាក់ជាងសព្វមួយដង៕
ឆ្នាំឆ្លូវ
រាសីខ្ពស់ត្រដែត។ក្នុងការរស់នៅលោកអ្នកតោងចេះដាស់តឿននូវរាល់កំហុសខ្លួនឯង និងក្រៅពីនេះបើមានបញ្ហាត្រូវចេះដោះស្រាយទើបជីវិតនៅថ្ងៃខាងមុខនឹងមានភាពភ្លឹថ្លាជាងនេះ។ទាំងស្ត្រីបុរសក្នុងថ្ងៃនេះគឺ ផ្តល់ផលល្អសម្រាប់លោកអ្នកប្រកបការងារតូចធំពីព្រោះថាផ្លែផ្កាតែងឆ្លើយតបគ្រាន់កក់ក្តៅ។ ចំពោះអ្នកប្រកបរបររកស៊ីជួញដូរបើចង់ធ្វើអ្វីមួយមិនភ័យព្រួយឡើយពីព្រោះលោកអ្នកតែងមានប្រៀបឬយ៉ាងហោចណាស់ក៏អាចរកផលកម្រៃគ្រាន់កក់ក្តៅ។ បញ្ហាសេចក្តីស្នេហាកំលោះក្រមុំឱ្យចេះដឹងទុក្ខធុរះគ្នា ហើយមិនត្រូវអាត្មានិយមឡើយបើពុំនោះទេផលលំបាកនឹងជួបនៅពេលក្រោយចៀសមិនរួចឡើយ៕
ឆ្នាំខាល
រាសីស្រុតចុះ។ក្នុងរយៈពេលនេះលោកអ្នកមិនត្រូវជួបជុំមិត្តភក្តិផឹកស៊ីសប្បាយក្អាកក្អាយ ចូរកុំសប្បាយជ្រុលភ្លេចខ្លួនប្រយ័ត្នសប្បាយក្លាយជាទុក្ខវិញ។ការប្រកបការងារលោកអ្នកគប្បីបន្ថែមការប្រុងប្រយ័ត្នបន្តិចពីព្រោះថាផលអាក្រក់ងាយកើតឡើងត្រូវឆ្លងកាត់ផង។សម្រាប់អ្នកប្រកបរបររកស៊ីជួញដូរមានការរីកលូតលាស់តិចតួចតែយ៉ាងណាការជួញទីជិតឆ្ងាយការរកផលកម្រៃនោះទោះមិនច្រើនពិតមែនក្តីតែក៏មានភាពសុខដុមគួរជាទីកក់ក្តៅ។ រីឯបញ្ហាសេចក្តីស្នេហាប្រុសស្រីកុំមានចិត្តរេដូចចុងស្រល់ប្រយ័ត្នកម្មពៀរវាឆ្លងម្តងម្នាក់វិញ៕
ឆ្នាំថោះ
រាសីល្អជាមធ្យម។នៅថ្ងៃនេះលោកអ្នកធ្វើអ្វីតែងរាំងស្ទះ និងបើជជែកពិភាក្សាជាមួយអ្នកដទៃក៏តែងមិនសម្រេចជោគជ័យនោះដែរ។សម្រាប់ពេលវេលាមិនល្អដែលលោកអ្នកគប្បីប្រយ័ត្នប្រយែងនោះគឺពេលវេលាម៉ោង ៥,០០- ៦,៥៩វិនាទីរសៀល។ចំពោះការប្រកបការងារវិញមានការលូតលាស់សន្សឹមៗទៅមុខឥតថយក្រោយឡើយ។អ្នកប្រកបរបររកស៊ីជួញដូរមានការប្រជែងគ្នាច្រើននិងពិសេសមានការ ប្រទាំងប្រទើសជាមួយអ្នកមានមុខរបរដូចគ្នាផង គួរមានការ បើកចិត្តឱ្យទូលាយបន្តិចទើបគ្មានរឿងរ៉ាវចម្រូងចម្រាសកើតមានឡើង។ បញ្ហាគូស្នេហាប្រុសស្រីមានភាពស្រស់ស្រាយនិងផ្អែមល្ហែមគ្រាន់ជាទីកក់ក្តៅ៕
ឆ្នាំរោង
រាសីល្អជាមធ្យម។ក្នុងថ្ងៃនេះបើទោះបីមានរឿងអ្វីក៏ដោយមិនត្រូវយកអារម្មណ៍ម៉ួម៉ៅក្តៅក្រហាយបញ្ចេញមកច្រើនពេក ហើយពិសេសត្រូវចេះរំងាប់ចិត្តឱ្យត្រជាក់ទើបរឿងរាវអាចងាយដោះស្រាយចេញទៅវិញ។ចំពោះពេលវេលាល្អរបស់លោកអ្នកគឺំម៉ោង ៣,០០-៦,៥៩វិនាទីល្ងាច។សម្រាប់ការប្រកបការងារបើមានឧបសគ្គ ហើយកាលពីមុនមកទទួលផលលំបាកក្នុងការដោះស្រាយពេលនេះបើព្យាយាមពុះពារក៏តែងហុចផ្លែផ្កាដូចជាទីពេញចិត្តផងដែរ។អ្នកប្រកបរបររកស៊ីជួញដូរមានការរីកលូតលាស់គួរសម ម្ល៉ោះហើយជាឱកាសល្អក្នុងការពង្រីកមុខរបរថ្មីឬបណ្តាក់ទុនបន្ថែមព្រោះផ្លែផ្កាដែលទទួលបានតែងហុចមកវិញដូចសមប្រកប។
គូស្វាមីភរិយាក្នុងរយៈពេលនេះទាល់តែឆាប់បញ្ចប់រឿងរាវរកាំរកូស និងការប្រចែប្រចណ្ឌខុសរឿងទើបនៅក្នុងគ្រួសារមានសុភមង្គល៕
ឆ្នាំម្សាញ់
រាសីខ្ពស់ត្រដែត។ការរស់នៅលោកអ្នកមានដំណើរជីវិតរលូនល្អ និងទោះធ្វើអ្វីមួយក៏មានភាពសុខស្រួលពុំមានឧបសគ្គច្រើនាំពិបាកដោះស្រាយឡើយ។លោកអ្នកគប្បីសម្រុកការងារនាពេលនេះពីព្រោះថាឆ្លងដល់សប្តាហ៍ ក្រោយអាចនឹងសុខស្រួលខ្លួនជាងនេះ ។អ្នកប្រកបរបររកស៊ីជួញដូរមានការទិញចូលលក់ចេញគ្រាន់បើតែយ៉ាងណាលោកអ្នកទាល់តែខិតខំខ្លាំងទើបទទួលជោគជ័យជំនូញធំៗទៅរួច។ សម្ព័ន្ធស្នេហាប្រុសស្រីបើមានការផ្សំផ្គុំគ្រួសារឬចូលស្តីដណ្តឹងជាពេលវេលាល្អប្រពៃបំផុត៕
ឆ្នាំមមី
រាសីធ្លាក់ស្រុតចុះ។បើលោកអ្នកធ្វើអ្វីតែងមិនសម្រេចបំណង ហើយពិសេសងាយកើតទំនាស់ជាមួយអ្នកដទៃថែមទៀត ។ការប្រកបការងារលោកអ្នកត្រូវរក្សាភាពស្ងប់ស្ងាត់ ហើយចេះពិនិត្យសភាពការណ៍ឱ្យបានស្រួលបួលពីព្រោះអាចមានក្រុមមនុស្សបាបមិត្តចង់វាយប្រហារផងដែរ។សម្រាប់អ្នកប្រកបរបររកស៊ីជួញដូរជួបផលលំបាកក្នុងការរកផលចំណូល ហើយទាល់តែខិតខំខ្លាំងទើបអាចរកម្រៃគ្រាន់ចិញ្ចឹមក្រពះទៅរួច។
រីឯបញ្ហាសេចក្តីស្នេហាប្រុសស្រីមានការខ្វាយខ្វល់ពីជីវិតអនាគតរបស់ខ្លួនរាប់រយជំពូកនិងភាពរកាំរកូស ក៏កើតមានច្រើនដែរ៕
ឆ្នាំមមែ
រាសីល្អជាមធ្យម។ថ្ងៃនេះការរស់នៅស្ត្រីគប្បីមានការប្រយ័ត្នប្រយែងទាំងរឿងផ្ទាល់ខ្លួននិងក្រុមគ្រួសារព្រោះថាបើសម្រេចចិត្តធ្វើអ្វីមួយខុសនោះនាំឱ្យបាត់បង់ច្រើនជាងទទួលផល។សម្រាប់ការបំពេញការងារលោកអ្នកត្រូវចេះយកចិត្តទុកដាក់ឱ្យបានខ្លាំងក្លានោះផ្លែផ្កាដែលផ្តល់មកវិញក៏ដូចជាទីពេញចិត្ត។ចំពោះ អ្នកប្រកបរបររកស៊ីជួញដូរវិញបើលោកអ្នកចង់បោះទុនតូចធំឬចង់រកស៊ីចូលហ៊ុនជាមួយអ្នកដទៃត្រូវចេះត្រួតពិនិត្យឱ្យបានគ្រប់ជ្រុងជ្រោយបើពុំនោះទេអាចជួបផលអាក្រក់ណាមួយនៅថ្ងៃខាងមុខជាក់ជាពុំខាន។ រីឯបញ្ហាស្នេហាប្រុសស្រីកើតការរកាំចិត្ត និងមានការខ្វែងគំនិតគ្នាច្រើន ៕
ឆ្នាំវក
រាសីខ្ពស់ត្រដែត។ទាំងស្ត្រីបុរសពុំមានអ្វីចូលមកយាយីនាំពិបាកត្រូវរាប់រង ហើយបើចង់ទំនាក់ទំនងអ្វីមួយតែងឆ្លើយតបគ្រាន់កក់ក្តៅ។ការប្រកបការងារថ្ងៃនេះដែរបើលោកអ្នក ចង់ ជួបចរចាជាមួយនរណាម្នាក់ក៏តែងផ្តល់ផលល្អៗមកវិញជានិច្ច។ក្រៅពីនេះលោកអ្នកអាចទទួលដំណឹងល្អពីរឿងបញ្ហាប្រាក់កាសឬការងារផង។ចំពោះអ្នកប្រកបរបររកស៊ីជួញដូរបើចង់បើកហាងថ្មីឬប្តូរមុខរបរថ្មីជាឱកាសប្រពៃមួយដែរព្រោះអាចមានការជឿនលឿនគ្រាន់គាប់ប្រសើរ។ សម្ព័ន្ធស្នេហាកំលោះក្រមុំបើលោកអ្នកមិនទាន់មានគូគាប់អាចមានក្រុមមនុស្សភេទផ្ទុយគ្នាចាប់អារម្មណ៍ពិសេសអាចក្លាយជាគូគាប់ទៀតផង៕
ឆ្នាំរកា
រាសីខ្ពស់ត្រដែត។នៅថ្ងៃនេះការរស់នៅមានភាពសុខដុមគួរសម ហើយការធ្វើដំណើរឆ្ងាយជិតមានតែក្រុមមនុស្សស្វាគមន៍រាក់ទាក់ជានិច្ច។ទាំងស្ត្រីបុរសផ្តល់ផលល្អក្នុងការចរចារឿងផ្នែកអាជីវកម្ម និងទំនាក់ទំនងការងារផ្នែកខាងក្រៅទទួលផលសម្រេចដូចគាប់បំណង។សម្រាប់អ្នកប្រកបរបររកស៊ីជួញដូរនៅថ្ងៃនេះទោះទីជិតឆ្ងាយមានភាពកាក់កបល្អ ហើយបើចង់ជួញផ្លូវឆ្ងាយទៀតសោតក៏ផ្តល់ផ្លែផ្កាគួរសម។ រីឯបញ្ហាសម្ព័ន្ធស្នេហាកំលោះក្រមុំបើមិនទាន់មានគូគាប់ ហើយចង់ស្វែងរកជាពេលវេលាល្អប្រពៃណាស់៕
ឆ្នាំច
រាសីល្អជាមធ្យម។ការរស់នៅថ្ងៃនេះដោយសារដំណើរជីវិតជួបលើកំណាត់ផ្លូវរដិបរដុបច្រើនបន្តិច ម្ល៉ោះហើយធ្វើឱ្យលោកអ្នកជួបនូវបញ្ហាលំបាកផ្លូវចិត្ត និង កើតរឿងរាវប៉ះទង្គិចមួយចំនួនចំពោះមុខ។ចំពោះការប្រកបការងារវិញបើទោះបីធ្វើអ្វីក៏ដោយតោងប្រយ័ត្នប្រយែងកុំប្រើអារម្មណ៍ឈ្នានីសច្រើននោះផ្លែផ្កានឹងទទួលបានជោគជ័យគ្រាន់បើពុំខាន។សម្រាប់បើជាអ្នកប្រកបរបររកស៊ីជួញដូរក្នុងថ្ងៃនេះដែរជួបលើបញ្ហាប្រទាំងប្រទើសបន្តិច ហើយផលកម្រៃទៀតសោតក៏ហូរចូលដោយតានតឹងណាស់ផង។ រីឯបញ្ហាស្នេហាកំលោះក្រមុំឬពោះម៉ាយមេម៉ាយក្តីមានការចាប់កំហុសគ្នាព្រោះតែភាពចង់ឈ្នះគ្នាមានច្រើនក្នុងពេលនេះ៕
ឆ្នាំកុរ
រាសីល្អជាមធ្យម។ដួងរាសីរបស់លោកអ្នកជួបលើកំណាត់ផ្លូវលំបាកបន្តិច ហើយបើមានធ្វើអ្វីមួយផងតែងមានក្រុមមនុស្សតាមចាក់ឆ្កឹះឆ្គៀលនាំឱ្យជួបរឿងសៅហ្មង។ចំពោះអ្នកប្រកបការងាររាជការឬក្រុមហ៊ុនឯកជនវិញមានភាពផុយស្រួយប្រទាំងប្រទើសជាមួយមិត្តភក្តិណាស់ចូរប្រយ័ត្នកើតជម្លោះវិវាទ។ ចំណែកអ្នកប្រកបរបររកស៊ីជួញដូរមានការជឿនលឿនទៅមុខយ៉ាងឆាប់រហ័សហើយរឿងរាវអាក្រក់ទាំងឡាយដែលធ្លាប់មានកាលពីមុនមកក៏ត្រូវបានរលត់រលាយទៅឆ្ងាយតាមកាលវេលាដែរ។ បញ្ហាសេចក្តីស្នេហាកំលោះក្រមុំកំពុងមានការខ្វាយខ្វល់ ព្រោះតែម្នាក់ៗមានការគិតហួសព្រំដែនច្រើន៕