ហោរាសាស្រ្តប្រចាំថ្ងៃអង្គារ ទី១៩ ខែកញ្ញា ឆ្នាំ២០២៣

នៅថ្ងៃអង្គារ ទី១៩ ខែកញ្ញា ឆ្នាំ២០២៣នេះ គេហទំព័រហោរាសាស្រ្ដចិនបានចុះផ្សាយពីរាសីប្រចាំថ្ងៃនៃអ្នកដែលកើតឆ្នាំទាំង១២ថា៖

ឆ្នាំជូត៖ រាសីស្រុតចុះ។ នៅថ្ងៃនេះលោកអ្នកធ្វើអ្វីត្រូវចេះត្រៀមទប់ទល់បញ្ហាពីព្រោះថាផលអាក្រក់ងាយកើតឡើងជាងសព្វមួយដង។ នៅថ្ងៃនេះលោកអ្នកងាយទទួលរងផលប៉ះទង្គិច ហើយពិសេសភ្លើងក្រហមតែម្តង។ អ្នកប្រកបរបររកស៊ីជួញដូរការរកផលចំណូលមិនត្រូវឱ្យអតិថិជនជំពាក់ប្រាក់ច្រើនទ្បើយ ពីព្រោះផលកម្រៃងាយបាត់បង់ជាងសព្វមួយដង។ រីឯបញ្ហាសម្ព័ន្ធស្នេហាកំលោះក្រមុំកុំចង់ទុំមុនស្រគាលប្រយ័ត្នកើតរឿងធំគ្មាននរណាជួយកើត៕

ឆ្នាំឆ្លូវ៖ រាសីស្រុតចុះ។ ដំណើរជីវិតរបស់លោកអ្នកស្ថិតនៅលើកំណាត់ផ្លូវរដិបរដុប ម្ល៉ោះហើយឱ្យប្រយ័ត្នបញ្ហាសុខភាពពីព្រោះថាងាយកើតមានជាងសព្វមួយដង។ នៅថ្ងៃនេះបើទោះបីដួងរាសីស្រុតចុះ ប៉ុន្តែលោកអ្នកនៅតែអាចធ្វើអ្វីៗបានដែរពីព្រោះថាផលតែងឆ្លើយតបមកវិញគ្រាន់ពេញចិត្ត។ អ្នកប្រកបរបររកស៊ីជួញដូរវិញលោកអ្នកមានដំណើរជីវិតជួបផលប៉ះទង្គិចច្រើន ដូចនេះទោះធ្វើអ្វីក៏ដោយប្រយ័ត្នថ្លោះធ្លោយធ្លាក់ក្នុងគ្រោះចាញ់បោកគេ។ ការធ្វើដំណើរឆ្ងាយជិតជួបបញ្ហារកាំចិត្តនិងមានបញ្ហាច្រើនចំពោះមុខ។ បញ្ហាសម្ព័ន្ធស្នេហាប្រុសស្រីមានភាពសោះកក្រោះងាយទាំងកើតជម្លោះវិវាទនិងងាយទាំងត្រូវរ៉ូវគ្នា៕

ឆ្នាំខាល៖ រាសីខ្ពស់ត្រដែត។ នៅថ្ងៃនេះផ្តល់ផលល្អសម្រាប់លោកអ្នកសម្រេចចិត្តទិញផ្ទះសម្បែង លេងហ៊ុន ឬចរចាក្នុងរឿងអ្វីមួយផង។ ក្រៅពីនេះបើលោកអ្នកចាប់កិច្ចការងារសំខាន់ៗកាន់តែល្អពីព្រោះថាផលជាផ្លែផ្កាមានច្រើនចំពោះមុខផង។ សម្រាប់អ្នកប្រកបរបររកស៊ីជួញដូរវិញនៅថ្ងៃនេះគឺមានសន្ទុះជឿនលឿនទៅមុខ ហើយត្រូវរក្សាភាពស្ងប់ស្ងាត់ដាច់ខាតបើធ្វើជំនួញបានកាក់កបល្អមិនត្រូវក្អេងក្អាងឡើយបើពុំនោះទេអាចហុចផលអាក្រក់ណាមួយមកវិញជាក់ជាពុំខាន។ រីឯបញ្ហាគូគ្រងប្តីប្រពន្ធឬគូស្នេហ៍ប្រុសស្រីមានភាពស្រស់ស្រាយប្រៀបដូចត្រីក្នុងទឹក៕

ឆ្នាំថោះ៖ រាសីស្រុតចុះ។ នៅថ្ងៃនេះលោកអ្នកមិនងាយទប់ស្កាត់បញ្ហាកើតឡើងបានឡើយ ម្ល៉ោះហើយត្រូវរក្សាភាពស្ងប់ស្ងៀម និង ធ្វើមិនដឹងមិនឮបញ្ហាខ្លះទើបប្រសើរ។ ក្រៅពីនេះលោកអ្នកមិនងាយគេចបញ្ហាបានទេពិសេសរឿងរាវកិច្ចការងារតែម្តង។ អ្នកប្រកបរបររកស៊ីជួញដូរជួបបញ្ហាសៅហ្មងបន្តិចតែមុខរបរមានស្ថានភាព ដូចសព្វមួយដង។ រីឯសម្ព័ន្ធស្នេហាប្រុសស្រីកុំគប្បីយកភាពប្រកែប្រកាន់ដាក់ខ្លួនច្រើននាំតែកើតរឿងសៅហ្មងចំពោះគ្នាប៉ុណ្ណោះ៕

ឆ្នាំរោង៖ រាសីល្អជាមធ្យម។ ចំពោះស្ត្រី នៅក្នុងផ្ទះសម្បែងងាយកើតជម្លោះវិវាទណាស់ចូរចេះធ្វើគធ្វើថ្លង់ខ្លះទើបប្រសើរ។ នៅកន្លែងធ្វើការងារតែង មានការចាប់កំហុសគ្នាច្រើន ហើយទាល់តែអត់ឱនឱ្យគ្នាទើបគ្មានបញ្ហាចម្រូងចម្រាសកើតឡើង។ អ្នកប្រកបរបររកស៊ីជួញដូរបើចង់បោះទុនតូចធំឬទិញទំនិញស្តុកទុកលក់រយះពេលខ្លីឬវែងតែងហុចផ្លែផ្កាគួរសមផងដែរ។ ការធ្វើដំណើរទីជិតឆ្ងាយឱ្យប្រយ័ត្នក្រុមមនុស្សតាមព្យាបាទយាយីដោយប្រការណមួយ។ រីឯសម្ព័ន្ធស្នេហាប្រុសស្រីមានការប្រែប្រួលប្តូរផ្លាស់ព្រោះជួនត្រូវរ៉ូវគ្នាជួនទាស់ទែងគ្នា៕

ឆ្នាំម្សាញ់៖ រាសីល្អជាមធ្យម។ នៅក្នុងថ្ងៃនេះលោកអ្នកខ្លះងាយជួបបញ្ហាចំពោះមុខណាស់ ហើយធ្វើអ្វីក៏ដោយប្រៀបដូចអុំទូកបញ្ច្រាសទឹកដែលមិនងាយទៅមុខតែងាយថយក្រោយ។ ការប្រកបការងារបើមិនខិតខំស្រវាស្រទេញទេពិតជាជួបផលលំបាកខ្លាំងជាក់ជាពុំខាន។ អ្នកប្រកបរបររកស៊ីជួញដូរវិញមិនថាលោកអ្នកប្រកបរបរទីជិតឆ្ងាយតែងកើតមានរឿងរកាំរកូស ហើយអាចកើតបញ្ហាជម្លោះច្រើន ដូចនេះបើមិនចេះរំងាប់ចិត្ត ហើយបណ្តោយតាមហិង្សាទេពិតជាកើតរឿងរាវនាំអំពលទុក្ខយកត្រឡប់មកផ្ទះវិញជាក់ជាពុំខាន។ សម្ព័ន្ធស្នេហាប្រុសស្រីមានដំណើរថយក្រោយព្រោះតែម្នាក់ៗយកភាពចង់ចាញ់ឈ្នះគ្នាដាក់ខ្លួនច្រើន៕

ឆ្នាំមមី៖ រាសីខ្ពស់ត្រដែត។ នៅថ្ងៃនេះផ្តល់ផលល្អសម្រាប់ លោកអ្នក ប្រកបកិច្ចការទាក់ទងប្រាក់កាស ឬការសម្រេចចិត្តក្នុងការធ្វើកិច្ចសន្យាអ្វីមួយផង។ ការប្រកបការងារមិនថាជាចៅហ្វាយនាយ កូនចៅតែងជួយជំរុញកិច្ចការងារឱ្យចម្រើនលូតលាស់ទៅមុខថែមទៀត។ អ្នកប្រកបរបររកស៊ីជួញដូរវិញលោកអ្នកបើមានគម្រោងការធ្វើអ្វីដែលជាកិច្ចការងារសំខាន់អាចចាប់ផ្តើមបានហើយព្រោះផ្លែផ្កាដែលហុចមកវិញក៏តែងដូចជាទីគាប់ចិត្ត។ រីឯបញ្ហាសេចក្តីស្នេហាកំលោះក្រមុំឬពោះម៉ាយមេម៉ាយក្តីមានភាពផ្អែមល្ហែមដូចទឹកឃ្មុំ៕

ឆ្នាំមមែ៖ រាសីខ្ពស់ត្រដែត។ នៅខែនេះ ដួងរាសីឡើងខ្ពស់ ម្ល៉ោះហើយដូចពាក្យចាស់ថា “ទឹកឡើងប្រញាប់ដួសទុក”ពីព្រោះថាលោកអ្នកធ្វើអ្វីតែងទទួលជាលទ្ធផលគ្រាន់ជាទីគាប់ចិត្តត្រឡប់មកវិញ។ នៅថ្ងៃនេះផ្តល់ផលល្អសម្រាប់លោកអ្នកទំនាក់ទំនងការងារ ឬ ចេញប្រកបកិច្ចការងារអ្វីមួយពីព្រោះថាផលតែងរង់ចាំចំពោះមុខផង។ អ្នកប្រកបរបររកស៊ីជួញដូរនៅថ្ងៃនេះដែរបើចង់រកស៊ីចូលហ៊ុនជាមួយអ្នកដទៃពេលនេះឃើញថាមិនគាប់ប្រសើរប៉ុន្មានទេ ប៉ុន្តែបើចង់បោះទុនតូចធំសម្រាប់ខ្លួនឯងវិញគ្រាន់គាប់ប្រសើរជាង។ បញ្ហាសម្ព័ន្ធស្នេហាកំលោះក្រមុំបើចង់ធ្វើការជ្រើសរើសគូស្រករតែងជួបគូព្រេងពិតដូចសេចក្តីប្រាថ្នា៕

ឆ្នាំវក៖ រាសីល្អជាមធ្យម។ នៅថ្ងៃនេះការប្រកបកិច្ចការងារងាយកើតបញ្ហាមួយចំនួនចំពោះមុខផង ហេតុនេះត្រូវដោះស្រាយទាន់សភាពការណ៍ទើបប្រសើរ។ សម្រាប់អ្នកប្រកបរបររកស៊ីជួញដូរការរកផលចំណូលទោះបីថាមានភាពរលូនល្អទៅមុខក្តីតែយ៉ាងណាក៏កើតមានភាពរកាំរកូសមិនតិចដែរទេ ហើយពិសេសលោកអ្នកឱ្យប្រយ័ត្នចំណូលតូចតាចបោលហួសព្រោះរវល់ស្រវ៉ាចាប់តែអាធំ។ ការធ្វើដំណើរទីជិតឆ្ងាយជួបតែភាពរកាំចិត្តនិងក្រុមមនុស្សឈ្នានីសច្រើនផង។ រីឯបញ្ហាស្នេហាកំលោះក្រមុំមិនមានការលូតលាស់ទៅមុខទេគឺមានការថយក្រោយច្រើនជាង៕

ឆ្នាំរកា៖ រាសីស្រុតចុះ។ នៅថ្ងៃនេះបើលោកអ្នកធ្វើអ្វីមិនធ្វេសប្រហែស ឬមិនធ្វើអ្វីដែលជាការប្រមាថមើលងាយនោះបញ្ហាមិនល្អក៏មិនអាចរត់ចូលដែរ។ ដំណើរជីវិតមិនល្អប្រសើរទេ ហើយបើចង់ធ្វើអ្វីមួយដែលសំខាន់ហើយចង់ធ្វើការពន្យាពេលក៏ប្រសើរដែរ។ អ្នកប្រកបរបររកស៊ីជួញដូរមិនត្រូវយកភាពឈ្នានីសឬមាត់ឌឺដងដល់អ្នកដទៃឡើយព្រោះងាយកើតជម្លោះវិវាទណាស់ ហើយស្រួលមិនស្រួលកើតរឿងរាវប្រកាប់ប្រចាក់គ្នាថែមទៀត។ រីឯបញ្ហាសម្ព័ន្ធស្នេហាប្រុសស្រីមិនត្រូវប្រកាន់ភាពមោហៈទោសៈដាក់ខ្លួននាំតែជួបបញ្ហាល្អក់កករឥតឈប់ឈរតែប៉ុណ្ណោះ៕

ឆ្នាំច៖ រាសីខ្ពស់ត្រដែត។ នៅថ្ងៃនេះដំណើរជីវិតរបស់លោកអ្នកជួបលើកំណាត់ផ្លូវល្អប្រសើរគួរសម ហេតុនេះចង់ធ្វើអ្វីតែងជឿនលឿនគ្រាន់ជាទីកក់ក្តៅ។ ថ្ងៃនេះដែរផ្តល់ផលល្អសម្រាប់ចុះប្រកបការងារ ឬសម្រេចចិត្តអ្វីមួយតែងហុចជាលទ្ធផលគ្រាន់ជាទីពេញចិត្តផង។ អ្នកប្រកបរបររកស៊ីជួញដូរ បើចង់បើកហាងថ្មីឬប្តូរមុខរបរថ្មីជាឱកាសប្រពៃព្រោះអាចមានការជឿនលឿនគ្រាន់គួរសម។ការធ្វើដំណើរទីជិតឆ្ងាយជួបភាពសុខដុមទាំងពេលទៅនិងត្រឡប់មកវិញ។ រីឯសេចក្តីស្នេហាប្រុសស្រីមានការចេះអត់ឱនឱ្យគ្នានិងផ្អែមល្ហែមដូចសព្វមួយដង៕

ឆ្នាំកុរ៖ រាសីល្អជាមធ្យម។ នៅថ្ងៃនេះដំណើរជីវិតរបស់លោកអ្នកមានការថយក្រោយច្រើនបន្តិច តែយ៉ាងណាបើមាការពុះពារក៏តែងទទួលផលមកវិញដែរ។ ការប្រកបការងារពុំមានអ្វីប្រែប្រួលប្តូរផ្លាស់ទេ គឺដូចសព្វមួយដង។ ចំណែកអ្នកប្រកបរបររកស៊ីជួញដូរនៅថ្ងៃនេះវិញជួបលើបញ្ហាស្មុគស្មាញនិងពិសេសមិនត្រូវឱ្យអតិថិជនជំពាក់ប្រាក់កាសឡើយប្រយ័ត្នទារវិញមិនបាន កើតជំលោះវិវាទថែមទៀត។ បញ្ហាសម្ព័ន្ធស្នេហាប្រុសស្រីកុំគប្បីចង់ទុំមុនស្រគាលប្រយ័ត្នជួបរឿងប្រុសប្រកែកស្រីប្រកាន់ស្រួលមិនស្រួលខូចកិត្តិយស ហើយជាប់ទោសពៃរ៍ឥតអំពើ៕