អ្នកមានអារម្មណ៍ថាខ្ជិលច្រអូសមែនទេ? ដើម្បីដំណើរការអាជីវកម្មអ្នកត្រូវបំបាត់វា
នរណាៗ ក៏ធ្លាប់ឆ្លងកាត់ការពន្យារពេលដែរ ប៉ុន្តែបើនៅតែពន្យារពេលច្រើនដងពេក វានឹងបង្កើតទម្លាប់ខ្ជិលច្រអូសមួយជាប់នឹងខ្លួនអ្នកដោះមិនចេញ។ ការពន្យារពេលនេះ វានឹងមកបង្អាក់សកម្មភាពនានា ដែលនាំអ្នកទៅរកគោលដៅអាជីវកម្ម។ ការធ្វើអាជីវកម្ម គឺទាមទារឲ្យមានភាពរហ័សរហួន ក្នុងការសម្រេចចិត្ត និងការអនុវត្ត។ ហេតុនេះតើអ្នកគួរប្រាប់ខ្លួនឯងថាម៉េចខ្លះ ដើម្បីបញ្ឈប់ទម្លាប់នៃការពន្យារពេលនេះតទៅទៀត?
១.បោះបង់អ្វីៗ ដែលធ្វើឲ្យអ្នកបែកអារម្មណ៍ ៖ កាលណាអ្នកបែកអារម្មណ៍ហើយនោះ អ្នកមិនមានអារម្មណ៍ផ្ដោតទៅមុខតទៅទៀតទេ។ ដូចនេះបញ្ឈប់ការឆែកអ៊ីមែល ឆែកបណ្ដាញសង្គមនានា ឬមួយការលេងហ្គេមកម្សាន្តដែលមិនសូវមានប្រយោជន៍នោះចោលឲ្យអស់។
២.រៀបចំកាលវិភាគឲ្យច្បាស់ ៖ ពេលខ្លះគំនិតតែងលេចចេញមកមួយភ្លែត តែបើអ្នកមិនកត់ត្រាឬមិនរៀបកាលវិភាគ នោះអ្នកនឹងភ្លេចជាមិនខាន។ ហេតុនេះ បើយល់ល្អអ្នក គួរបង្កើតជាតារាងកាលវិភាគដោយក្នុងនោះត្រូវមានគោលដៅច្បាស់លាស់មួយ, សកម្មភាពត្រូវធ្វើ, រួមទាំងកំណត់ពេលក្នុងការធ្វើផងដែរ។
៣.ធ្វើការងារចាំបាច់ខ្លាំងមុនគេ ៖ ជាធម្មតាទេ ការងារគឺមានច្រើន តែសារៈសំខាន់វាគឺមានខ្លាំងមានខ្សោយ។ ដូច្នេះបើចង់ធ្វើអាជីវកម្មទមុខដោយរលូន និងមិនស្មុគស្មាញ អ្នកត្រូវលៃលក ថាអ្វីដែលសំខាន់ជាងគេ និងមិនសូវសំខាន់ ហើយផ្ដោតតែលើវាសិនបានហើយ។
៤.ឈប់ខ្លាចខុសទៀតទៅ ៖ មនុស្សមួយចំនួន មិនខ្ជិលនោះឡើយ តែពួកគេពន្យារពេលដោយសារតែខ្លាចបង្កកំហុសតាមពិតទៅកំហុសគឺជាគ្រូបង្រៀនដ៏អស្ចារ្យមួយ ចុះចាំបាច់អ្វីទៅខ្លាចនោះ?
