គម្រោងធំៗចំនួន៣ក្នុងខេត្តកណ្តាលកំពុងធ្វើឲ្យតម្លៃដីនៅទីនោះមានសន្ទុះឡើងគួរឲ្យកត់សម្គាល់
ខេត្តកណ្ដាល គឺជាខេត្តមួយក្នុងចំណោមខេត្តដែលស្ដុកស្ដម្ភជាងគេក្នុងកម្ពុជា ដែលមានស្រុកចំនួន១០, ក្រុង១, ឃុំ-សង្កាត់១៤៦ ភូមិចំនួន១,០៨៧ មានប្រជាជនចំនួន១,០៧៥,១២៥នាក់ហើយ ខេត្តនេះផងដែរមានផែ្ទដី ៣៥៦៨ គីឡូម៉ែត្រការ៉េ និងមានទីរួមខេត្តគឺក្រុងតាខ្មៅ ដែលមានចំងាយ ១១ គម នៅខាងត្បូងនៃក្រុងភ្នំពេញ។
សព្វថ្ងៃយើងមើលឃើញថា ខេត្តកណ្ដាលកំពុងមានការកើនឡើងខ្លាំងនៅគម្រោងអភិវឌ្ឍន៍វិស័យអចលនទ្រព្យ និងមានការ បង្កើតគម្រោងជាច្រើនកំពុងសាងសង់នៅខេត្តកណ្ដាល ដែលគម្រោងធំៗដូចជា៖
១.គម្រោងសាងសង់អាកាសយានដ្ឋាន អន្តរជាតិភ្នំពេញថ្មី
គម្រោងសាងសង់អាកាសយានដ្ឋាន អន្តរជាតិភ្នំពេញថ្មី នៅក្រុងតាខ្មៅ និងស្រុកកណ្ដាលស្ទឹង ដែលមានទឹកប្រាក់រហូតដល់១,៥០០លានដុល្លារអាមេរិក។ គម្រោងនេះ នឹងត្រូវចាប់ផ្តើមសាងសង់ក្នុងខែកញ្ញាខាងមុខនេះ បើគ្មានឧបសគ្គនោះទេ នេះបើយោងតាមការបញ្ជាក់របស់ម្ចាស់គម្រោង អ្នកឧកញ៉ា ពុង ឃាវសែ។
២.៤ឃុំនៅស្រុកស្អាង ត្រូវបានកាត់ចូលក្រុង
ហើយថ្មីៗនេះដែរមានឃុំចំនួន៤នៅក្នុងស្រុកស្អាង ដែលកំពុងនិងមានការចាប់អារម្មណ៍ខ្លាំងពីសំណាក់អ្នក វិនិយោគ ជា ច្រើន គឺឃុំស្វាយរលំ ឃុំកោះអន្លង់ចិន ឃុំសិត្បូ ឃុំរកាខ្ពស់ និងដីមួយចំនួនទៀតដែលស្ថិតនៅក្នុងស្រុកកណ្ដាលស្ទឹង ត្រូវបានរាជរដ្ឋាភិបាលចេញអនុក្រឹត្យកាត់ចូលក្នុងក្រុងតាខ្មៅ។ ហេតុនេះហើយជាឱកាសល្អសម្រាប់អ្នកវិនិយោគដើម្បីធ្វើការវិនិយោគនិងបង្កើតគម្រោងថ្មីនៅលើទឹកដីសង្កាត់ថ្មីទាំងបួននោះ។
៣.គម្រោងស្ពានឆ្លងទន្លេមេគង់ចំនួន២
ស្ពានចំនួនពីរទៀត ត្រូវបានរាជរដ្ឋាភិបាល គ្រោងនឹងធ្វើការសាងសង់ ដែលគម្រោងនេះ ត្រូវបានរាជរដ្ឋាភិបាល ប្រគល់ទៅឱ្យ ក្រុមហ៊ុនប្រទេសចិន ជាអ្នកសិក្សា និងរៀបចំសាងសង់ ក្នុងនោះស្ពានមួយខ្សែ ឆ្លងកាត់ទន្លេមេគង្គលើ ត្រង់ចំណុចសង្កាត់ជ្រោយចង្វារ ខណ្ឌជ្រោយចង្វារឆ្ពោះ ទៅកាន់ ឃុំស្វាយជ្រុំ ក្នុងស្រុកខ្សាច់កណ្ដាល ខេត្ដកណ្ដាល ដែលគេអះអាងថា អាចធ្វើការសាងសង់ខាងរាជធានីភ្នំពេញអាចស្ថិតនៅត្រង់ចំណុចផ្លូវកែវចិន្ដា ខាងកើតអាង ទឹកជ្រោយចង្វារ ទៅភ្ជាប់នឹងភូមិស្វាយាំ ជ្រុំ ត្រង់ចំណុចផ្លូវកំពង់ដស្វាយជ្រុំ ។
ចំណែក ស្ពានមួយខ្សែទៀត ត្រូវបានរាជរដ្ឋាភិបាលគ្រោងកសាង ឆ្លងកាត់ទន្លេមេគង្គក្រោមពី ទឹកដីសង្កាត់វាលស្បូវ ខណ្ឌច្បារអំពៅរាជធានីភ្នំពេញ ទៅភ្ជាប់នឹងឃុំអរិយ ក្សត្រ ស្រុកល្វាឯម ខេត្ដកណ្ដាល ដែលទំនងកសាង នៅត្រង់ចំណុចភូមិក្ដីតាកុយ ឆ្ពោះមកកាន់ភូមិវត្ដ ខ្សាច់ ឃុំអរិយក្សត្រ៕