Bill Gate ៖ ទាំង៦ចំណុចដែលសិស្ស និងនិស្សិតក្នុងវ័យសិក្សាគួរតែធ្វើ ដើម្បីអនាគតមានភាពជោគជ័យ
លោក Bill Gate មហាសេដ្ឋីលំដាប់ពិភពលោក បានធ្វើការផ្តាំផ្ញើដល់និស្សិតក្នុងវ័យសិក្សា គួរតែធ្វើរឿងចំនួន៦យ៉ាងដើម្បីជីវិតរបស់ខ្លួន។ ហើយលោកក៏ធ្លាប់ជានិស្សិតបោះបង់ចោលសាលាដែរ ហើយលោកសុំឲ្យនិស្សិតអនុវត្តចំណុចទាំង៦ ដើម្បីអនាគតរបស់ខ្លួន៖
១. វិស័យថាមពល បច្ចេកវិទ្យាឆ្លាតវៃសិប្បនិម្មិត (AI) និងជីវសាស្ត្រនឹងមានសក្ដានុពលនៅពេលអនាគត
នៅចុងឆ្នាំ ២០១៧ កន្លងទៅ លោក Bill Gates បានសរសេរសារមួយនៅលើគេហទំព័រ Twitter របស់លោកថា សិស្សនិស្សិតចូលថ្មីដែលបញ្ចប់ថ្នាក់វិទ្យាល័យ គួរចាប់ជំនាញរៀនមុខវិជ្ជាសំខាន់ៗទាំង៣ខាងលើនេះ។ លោកបានហៅមុខវិជ្ជាទាំង៣នេះថា ជាមុខវិជ្ជាដ៏មានសក្ដានុពលសម្រាប់កើបមាសកើបប្រាក់នៅពេលអនាគត។
២. រាប់អានមនុស្សដែលជួយឲ្យអ្នកជោគជ័យ
នៅលើបណ្ដាញ Twitter របស់លោកដដែល លោក Bill Gates ផ្តល់ដំបូន្មានថា និស្សិតទាំងអស់គួរចំណាយពេលនៅជាមួយមនុស្សដែលជួយឲ្យពួកគេរីកចម្រើន និងមានគំនិតអភិវឌ្ឍន៍។ លោកបានបន្តថា មនុស្សម្នាក់ៗអាចដើរទៅរកទិសដៅមួយអាស្រ័យលើមនុស្សដែលពួកគេសេពគប់។ មនុស្សដែលពួកគេសេពគប់ មានឥទ្ធិពលដល់ភាពជោគជ័យ ឬបរាជ័យរបស់ពួកគេ។ បើសេពគប់មនុស្ស ត្រូវឲ្យចេះមើលមនុស្សណាដែលនាំផលល្អមកឲ្យខ្លួនឯង។
៣. ជឿជាក់ថាពិភពលោកនឹងកាន់តែប្រសើរ និងអភិវឌ្ឍល្អជាងមុន
ថ្វីត្បិតតែពិភពលោកបានហែលឆ្លងឧបសគ្គជាច្រើនរាប់មិនអស់ដូចជាសង្គ្រាម ជំងឺកាចសាហាវ និងគ្រោះធម្មជាតិធំៗក៏ពិតមែន ប៉ុន្តែលោក Bill Gates ចង់ឲ្យយុវជនជានិស្សិតជំនាន់ក្រោយប្រកាន់ទស្សនៈវិជ្ជមានដោយជឿជាក់ថា ពិភពលោកមានស្ថានភាពល្អប្រសើរជាងមុន។ លោកសង្កត់ធ្ងន់ថា បើអ្នកគិតថា ពិភពលោកកាន់តែអភិវឌ្ឍ អ្នកបានចូលរួមចំណែកធ្វើឲ្យពិភពលោកកាន់តែល្អប្រសើរ។
៤.មានសុទិដ្ឋិនិយម ធ្វើឲ្យមនុស្សដើរកាន់តែឆ្ងាយ
សាររបស់លោក Bill Gates នៅទីនេះគឺថា ភាពសុទិដ្ឋិនិយមនាំឲ្យកើតចេញជាសកម្មភាព។ ថ្លែងនៅមុខសិស្សនិស្សិតរាប់ពាន់អ្នកនៅសាកលវិទ្យាល័យ Standford មហាសេដ្ឋីរូបនេះបានណែនាំទៅនិស្សិតថា សុទិដ្ឋិនិយមអាចជួយឲ្យមនុស្សមានភាពច្នៃប្រឌិត ចេះបង្កើតថ្មី និងអាចបង្កើតបានមធ្យោបាយថ្មីៗសម្រាប់លុបបំបាត់ចោលបញ្ហាដែលពិភពលោកប្រឈមមុខ។
៥.កុំខ្លាចបង្កើតកំហុស
លោក Bill Gates ចូលចិត្តអានសៀវភៅយ៉ាងហោចណាស់ ៥០ ក្បាលក្នុងមួយឆ្នាំ។ លោកថា មានពេលខ្លះទស្សនៈរបស់លោកផ្ទុយពីទស្សនៈសៀវភៅទាំងនោះ ហើយពេលខ្លះទៀតលោកបានព្យាករណ៍ខុសពីលទ្ធផលដែលកើតមានឡើង។ ប៉ុន្តែលោកថា លោកមិនខ្លាចនឹងបង្កើតកំហុសនោះទេ បើគ្រាន់តែលោកចង់ចេះចង់ដឹង។ យុវជនជំនាន់ក្រោយក៏ដូចគ្នាដែរ បើមានកំហុសត្រូវចាត់ទុកថា គឺជាមេរៀនរបស់ខ្លួន។ កំហុសធ្វើឲ្យអ្នករកឃើញវិធីត្រូវ ហើយអ្វីដែលសំខាន់តើអ្នកបានរៀនសូត្រពីវាកម្រិតណា?
៦.ចំណាយពេលគិតពីវិសមភាពសាកលលោក
ជារឿយៗនៅពេលដែលលោកថ្លែងនៅ ចំពោះមុខនិស្សិត លោកតែងលើកយកប្រធានបទដែលទាក់ទងទៅនឹង វិសមភាពរវាងប្រជាជនម្នាក់ទៅកាន់ប្រជាជនផ្សេងទៀតជុំវិញការគ្រប់គ្រងទ្រព្យសម្បត្តិ សុខភាព និងធនធាន។ លោកថា នេះគឺបន្ទុកដ៏ធំមួយសម្រាប់យុវជនជំនាន់ក្រោយ ដែលត្រូវដោះស្រាយយ៉ាងណាឲ្យវិសមភាពទាំងនេះត្រូវបានកាត់បន្ថយមកកាន់កម្រិតមួយទាបបំផុតតាមរយៈការបង្កើតថ្មីជាមួយនឹងប្រព័ន្ធបច្ចេកវិទ្យាទំនើបៗ៕
