បើជម្នះការលំបាក ៤យ៉ាងនេះបាន អ្នកនឹងជោគជ័យ ក្នុងអាជីវកម្ម
ពាក្យថា បោះបង់ គឺតែងមាននៅក្នុងវចនានុក្រមរបស់មនុស្សបរាជ័យ។ សម្រាប់បុគ្គលជោគជ័យវិញ តែងតែព្យាយាម និង តស៊ូរហូតដល់ដំណាក់កាលចុងក្រោយ។ ការបោះបង់នឹងបំផ្លាញអ្វីៗគ្រប់យ៉ាងរបស់មនុស្ស ដូច្នេះហើយ អ្នកមិនត្រូវបោះបង់នោះឡើយទោះបីជាលំបាកប៉ុណ្ណាក៏ដោយ។ ខាងក្រោមនេះ គឺជាចំណុចសំខាន់ៗដែលអ្នកមិនត្រូវបោះបង់នោះឡើយ៖
១) កុំបោះបង់ ព្រោះគិតថា វាលំបាកពេក៖ បើអ្នកព្យាយាមធ្វើទោះបីជាជួបរឿងលំបាកយ៉ាងណាក៏ដោយ វានឹងមានរឿងពីរកើតឡើង គឺជោគជ័យ និងបរាជ័យ។ ប៉ុន្តែបើបោះបង់វិញ គឺលទ្ធផលមានតែមួយប៉ុណ្ណោះ គឺស្មើនឹងបរាជ័យ។ បើព្យាយាមវិញ ទោះបីជាបរាជ័យក៏ដោយ តែអ្នកទទួលបានមេរៀនដ៏សំខាន់បំផុតក្នុងជីវិត ដែលមិនអាចរកបាននៅតាមសាលា ឬ សៀវភៅនោះឡើយ។ ដូច្នេះកុំបោះបង់។
២) កុំបោះបង់ដោយសារតែ ការរិះគន់ពីអ្នកដទៃ៖ ត្រូវចាំថា មនុស្សម្នាក់មានគំនិតមួយ ដូច្នេះហើយបើអ្នកក្នុងនាមជាមនុស្សម្នាក់ មិនហ៊ានធ្វើអ្វីដែលខ្លួនពេញចិត្ត នោះជីវិតរបស់អ្នកនឹងគ្មានន័យអ្វីឡើយ។ ដូច្នេះហើយ ត្រូវហ៊ានធ្វើអ្វីដែលខ្លួនពេញចិត្ត ទោះបីជាមានគេរិះគន់ក៏ដោយ។
៣) បោះបង់បង់ ព្រោះមនុស្សភាគច្រើនគិតថាមិនអាចទៅរួច៖ ទៅរួចឬ មិនរួចគឺអាស្រ័យលើសកម្មភាពរបស់អ្នក មិនមែនពាក្យសម្ដីរបស់អ្នកទាំងនោះឡើយ។ អ្វីដែលសំខាន់នោះ អ្នកត្រូវព្យាយាមឲ្យអស់ពីលទ្ធភាព ហើយធ្វើវារហូតបានជោគជ័យដើម្បីបញ្ជាក់ប្រាប់មនុស្សទាំងនោះថា អ្វីដែលអ្នកធ្វើនោះគឺពិតជាអស្ចារ្យ។
៤) កុំបោះបង់ ទោះបីជាអ្នកបរាជ័យក៏ដោយ៖ ដូចពាក្យមួយលើកឡើងថា«អ្នកដែលបរាជ័យ មិនមែនជាមនុស្សបរាជ័យ ប៉ុន្តែអ្នកដែលបោះបង់ទើបជាមនុស្សដែលបរាជ័យ»។ ដូច្នេះហើយទោះបីជាអ្នកបរាជ័យក៏ដោយ សូមកុំបោះបង់ឲ្យសោះព្រោះគ្មាននរណាម្នាក់ដែលមិនធ្លាប់បរាជ័យនោះទេ ដរាបណាគេមិនបោះបង់ មានន័យថា ឱកាសជោគជ័យនៅតែមាន៕