ខន គង្គា ៖ យើងផ្លាស់ប្តូរយុទ្ធសាស្ត្របាន ប៉ុន្តែគោលដៅជីវិតរបស់យើងមិនអាចផ្លាស់ប្តូរបានទេ នោះទើបជោគជ័យ
មនុស្សយើងម្នាក់មានគោលដៅនៃជីវិតរបស់យើងរៀងៗខ្លួន តួរយ៉ាងដូចជាលោ ខន គង្គា ដែលមានប្រវត្តិតស៊ូខ្លាំងបំផុតពីក្មេងស្រុកស្រែចំការ នឹងខិតខំប្រឹងប្រែងរហូតបានក្លាយជាអ្នកដែលមានភាពជោគជ័យខ្លាំងបំផុតលើផ្នែកអចចលនទ្រព្យមានប្រាក់រាប់លានដុល្លារនៅក្នុងដៃរ នាពេលបច្ចុប្បន្ននេះ។
ភាពជោគជ័យរបស់លោក មិនមែនជារឿងចៃដន្យនោះទេ ដែលសហគ្រិនវ័យ២៩ឆ្នាំ រូបនេះអាចធ្វើបាន ដោយសារតែខ្លួនមានគោលដៅ និងទស្សនៈវិស័យច្បាស់ណាស់ បូកផ្សំនឹងការខំប្រឹងធ្វើការដាច់យប់ អត់បាយ ទឹកក៏មាន មិនមែនទោរទន់តាមខ្យល់ ហើយបានជោគជ័យនោះទេ។
បើតាមលោក ខន គង្គា បានថ្លែងប្រាប់ឲ្យដឹងថា សម្រាប់កត្តារួមចំណែកកាន់តែខ្លាំងមួយទៀត គឺមានគោលដៅច្បាស់លាស់ មិនផ្លាស់ប្តូរទេ ទោះស្ថិតក្នុងកាលៈទេសៈណាក៏ដោយ។ យើងអាចផ្លាស់ប្តូរយុទ្ធសាស្ត្របាន តែគោលដៅជីវិតមិនអាចផ្លាស់ប្តូរបានទេ។ ត្រង់ចំណុចនេះ សំខាន់ណាស់ ដែលយុវជនជំនាន់់ក្រោយ ត្រូវយកចិត្តទុកដាក់ មិនអាចគ្រាន់តែគេមើលងាយ ហើយបែរជាបាក់ទឹកចិត្ត លែងខំប្រឹងប្រែងធ្វើការនោះទេ កុំរស់ដោយគ្មានគោលដៅ កុំរស់តាមទំនោរនៃខ្យល់។
បន្ថែមពីលើនេះ កត្តាជំរុញឲ្យមានអ្វីៗដូចសព្វថ្ងៃនេះ ព្រោះតែកត្តាជីវភាពក្រីក្រខ្លាំង ទើបធ្វើឲ្យលោកប្រឹងប្រែងធ្វើការ ហើយទទួលបានផ្លែផ្កាដូចថ្ងៃនេះ។ ដោយសារតែក្រ ព្រោះជួនកាល ខ្ញុំត្រូវបង្ខំចិត្តដេកនៅផ្លូវរថភ្លើង ដេកក្រោមតង់។ កាលរៀនឆ្នាំទី១ដំបូង ខ្ញុំផឹកតែទឹកទុយោរ គ្មានឱកាសផឹកទឹកសុទ្ធដូចគេទេ ហើយរស់នៅក្នុងតំបន់អនាធិបតេយ្យ គ្មានសុវត្ថិភាពហើយគ្មានភ្លើងអគ្គីសនីប្រើ បើចង់មើលសៀវភៅ ត្រូវមើលក្បែរចង្ក្រាន ឬចាំពេលខែរះឯណោះ។
សហគ្រិនរូបនេះបន្តថា ចំណុចសំខាន់មួយទៀត មានគេមើលងាយលោកច្រើនណាស់។ មនុស្សទូទៅអាចឆាប់បាក់ទឹកចិត្ត ដោយសារគេមើលងាយ តែចំណែកលោក កាន់តែមានកម្លាំងទឹកចិត្តខ្លាំង ក្នុងការជម្រះឧបសគ្គធំៗ។ ជាក់ស្តែងពេលនៅរៀនភាសាអង់គ្លេសយើងមកពីស្រែអត់ចេះដូចគេ តែដោយគេមើលងាយ កាន់តែជំរុញឲ្យយើងប្រឹងរៀន រហូតពូកែជាងគេ និងក្លាយជានាយកសាលាដែលលោកធ្លាប់រៀន។
ហើយមនុស្សភាគច្រើន ត្រូវបានគេមាកងាយតិច ឬច្រើន ជាពិសេសអ្នកក្រ ត្រូវបានគេមើលងាយច្រើន ដូច្នេះត្រូវយកចំណុចនឹង ថាគេគិតខុសហើយ មកជាកត្តាលើកទឹកចិត្ត ខិតខំប្រឹងប្រែងធ្វើឲ្យខ្លាំងជាងគេ។ បើគេធ្វើការ៨ម៉ោង ក្នុងមួយថ្ងៃ យើងអ្នកគេមើលងាយ ត្រូវធ្វើឲ្យបាន១៦ម៉ោង។ ធ្វើកិច្ចការអ្វីក៏ដោយ កុំជឿជាក់លើកភាពវៃឆ្លាតតែមួយជ្រុង ត្រូវឆ្លាតវៃធ្វើការងារហើយ ត្រូវខំប្រឹងប្រែងធ្វើឲ្យខ្លាំងផង ទើបទទួលបានជោគជ័យ៕