តើដីនៅតំបន់ណាក្នុងរាជធានីភ្នំពេញដែលមានតម្លៃដីថ្លៃជាងគេ?
នៅទីក្រុងភ្នំពេញមានការអភិវឌ្ឍន៍ជារៀងរាល់ថ្ងៃ គម្រោងអភិវឌ្ឍន៍ធំៗបានដុះដាលឡើងគ្រប់ខណ្ឌមានខុនដូរ អគារពាណិជ្ជកម្ម ផ្សារទំនើប ហើយខណ្ឌនីមួយៗបានអភិវឌ្ឍន៍ទៅតាមសក្តានុពលរៀងៗខ្លួន ហើយតម្លៃដីនៅខណ្ឌទាំងនោះក៏ខុសគ្នាដែរ។
លោកស្រី តាំង ហួរ នាយិកាក្រុមហ៊ុនអចលនទ្រព្យ Amatak Property Service, Co.Ltd មានប្រសាសន៍ថា តំបន់ដែលដីធ្លីមានតម្លៃថ្លៃជាងគេក្នុងក្រុងភ្នំពេញមាន៖ ខណ្ឌចំការមន(បឹងកេងកង១, ទន្លេបាសាក់) ខណ្ឌដូនពេញ ខណ្ឌទួលគោក និងតំបន់ភ្នំពេញថ្មី។
អ្នកជំនាញអចលនទ្រព្យរូបនេះបន្តថា នៅបឹងកេងកង១ និងទន្លេបាសាក់នៅផ្លូវមេ ឬផ្លូវធំ និងផ្លូវកែងមានតម្លៃថ្លៃចាប់ពី៦០០០-៦៥០០ដុល្លារក្នុងមួយម៉ែត្រការ៉េ។ តែសម្រាប់តម្លៃទូទៅវិញចាប់ពី៤,០០០-៤,៥០០ដុល្លារ ក្នុងមួយម៉ែត្រការ៉េ។ សម្រាប់តំបន់ដូនពេញវិញ តម្លៃដីធ្លីមានការខុសគ្នាតិចតួចពីតំបន់ខាងលើ ចាប់ពី៣,៥០០-៤៥០០ដុល្លារក្នុងមួយម៉ែត្រការ៉េ។ ហើយបើដីធ្លីណាមានសំណង់អគារពីលើទៀត អាចមានតម្លៃថ្លៃជាងនេះ ទៅតាមស្ថានភាពជាក់ស្តែង។
លោកស្រីបន្តថា ចំពោះតំបន់ទួលគោក តម្លៃដីធ្លីចាប់១៥០០ ដល់ ៣០០០ដុល្លារ តែសម្រាប់ផ្លូវមេធំៗ ផ្លូវក្រៅ ឬផ្លូវកែង អាចឡើងដល់ពី ៣៥០០-៤០០០ដុល្លារក្នុងមួយម៉ែត្រការ៉េ។
លោកស្រីបានបញ្ជាក់ថា សម្រាប់តំបន់សែនសុខ តម្លៃដីធ្លីក៏ចាប់ផ្តើមឡើងថ្លៃផងដែរ ពោលតម្លៃទូទៅចាប់ពី៨០០-២,០០០ដុល្លារ អាស្រ័យលើទីតាំងដីបន្ថែមទៀត អាចដីនៅផ្លូវធំ ផ្លូវកែង ឬផ្លូវតូចជាដើម៕
