ពិតជារឿងគួរឱ្យលើកសរសើរខ្លាំងណាស់ ដោយគេបានឃើញលោកជំទាវជាភរិយាឯកឧត្តមអភិបាលខេត្តសៀមរាប គឺជាស្ត្រីម្នាក់បានចូលរួមលើកស្ទួយស្នាដៃខ្មែរដោយការប្រើកាបូបច្នៃពីកំប្លោកច្រើនជាងប្រើកាបូបដែលមានម៉ាកល្បីៗ ។
ដូចប្រិយមិត្តបានដឹងហើយថា ការប្រើប្រាស់កាបូបច្នៃចេញពីកំប្លោក និង កាបូបចាក់ ជាដើមនោះ ហាក់សូវមិនមានការពេញនិយមប្រើប្រាស់ទូលំទូលាយប៉ុន្មានឡើយក្នុងសម័យទំនើបនេះ ដោយជំនួសនូវការប្រើប្រាស់កាបូបស្បែកមានម៉ាកល្បីៗ និង មានតម្លៃខ្ពស់ ផលិតចេញពីក្រៅប្រទេសច្រើនជាង ។ យ៉ាងណាមិញថ្មីៗនេះ មានការភ្ញាក់ផ្អើលមួយបន្ទាប់ពីបានឃើញការចែករំលែកលើបណ្តាញសង្គម ដោយបានបង្ហាញនូវរូបភាពជាច្រើនសន្លឹករបស់លោកជំទាវ ទាង អេង ទៀ សីហា ដែលគេស្គាល់ជាភរិយាឯកឧត្តម ទៀ សីហា អភិបាលខេត្តសៀមរាប ដែលលោកជំទាវតែងតែបានប្រើប្រាស់កាបូបកំប្លោក និង កាបូបចាក់ម៉ូដប្លែកៗ ដែលសុទ្ធសឹងជាផលិតផលរបស់ខ្មែរ និង ធ្វើឡើងដោយស្នាដៃខ្មែរសុទ្ធសាធ ។
តាមរយៈរូបភាពដែលគេបានចែកចាយនោះ គេសង្កេតឃើញលោកជំទាវ ទាង អេង ទៀ សីហា បានប្រើកាបូបទាំងនោះចូលរួមកម្មវិធីធំៗនានា មិនថាក្នុងសកម្មភាពមនុស្សធម៌ ឬ កម្មវិធីអ្វីឡើយ ដោយគេកម្រឃើញលោកជំទាវប្រើប្រាស់កាបូបស្បែកម៉ាកល្បីៗណាស់ ។ បើងាកទៅមើលគណនីហ្វេសប៊ុកឈ្មោះ Rothkanha Play ដែលជាប្រភពចែកចាយរូបភាពរបស់លោកជំទាវនោះ បានលើកឡើងថា គាត់ស្រស់ស្អាតណាស់ ស្អាតទាំងរូបរាង ស្អាតទាំងទឹកចិត្ត សំខាន់គាត់គាំទ្ររបស់ខ្មែរ សូមសរសើរដោយស្មោះ លើកស្ទួយស្នាដៃខ្មែរ ។
ចំពោះមហាជនវិញ ក៏មានការលើកសរសើរដល់លោកជំទាវ ទាង អេង ទៀ សីហា យ៉ាងខ្លាំងផងដែរ ក្រោយបានឃើញលោកជំទាវប្រើប្រាស់នូវកាបូបបែបនេះ ដោយម្នាក់ៗបាននិយាយថា លោកជំទាវគឺជាស្ត្រី និង ជាភរិយាថ្នាក់ដឹកនាំគំរូម្នាក់ទៀត ដែលបានចូលរួមលើកស្ទួយស្នាដៃ ក៏ដូចជាផលិតផលខ្មែរ ដែលទង្វើនេះជាអ្វីដែលមហាជនចង់បានបំផុត ៕