អគ្គិសនីកម្ពុជាបានដាក់ដំណើរការអគ្គិសនីចំនួន២០មេហ្គាវ៉ាត់ សម្រាប់ផ្គត់ផ្គង់ក្នុងប្រទេសកម្ពុជា
បើតាមការចេញផ្សាយរបស់អាជ្ញាធរអគ្គិសនីកម្ពុជា កាលពីពេលថ្មីនេះបានឲ្យដឹងថា ស្ថានីយអគ្គិសនីដើរដោយថាមពលពន្លឺព្រះអាទិត្យមានអានុភាព៦០MW នឹងបញ្ចេញថាមពលអគ្គិសនីមុនផែនការចំនួន២០MW ដើម្បីជួយបំពេញដល់ការខ្វះខាត់អគ្គិសនីប្រើប្រាស់នៅចុងរដូវប្រាំងឆ្នាំ២០១៩នេះ។
ដោយយោងតាមការសន្និដ្ឋានរបស់គណៈប្រតិភូក្រសួងរ៉ែ និងថាមពល និងគណៈប្រតិភូអគ្គិសនីកម្ពុជា ដែលបានចុះទៅពិនិត្យប្រព័ន្ធថាមពលពន្លឺព្រះអាទិត្យមានទីតាំងនៅត្មាតពង ខេត្តកំពង់ស្ពឺ ទំហំ៦០MW បន្ទាប់ពីបានធ្វើតេស្តសាកល្បងបញ្ជូនអគ្គិសនីចូលប្រព័ន្ធបណ្តាញជាតិបានដោយសុវត្ថិភាព និងជោគជ័យ។ ដូច្នេះ អ្នកបច្ចេកទេសជឿជាក់ថា ពួកគាត់អាចដាក់បញ្ចូលអគ្គិសនីចូលប្រព័ន្ធបណ្តាញជាតិ បានចំនួន២០មេហ្កាវ៉ាត់ទាំងស្រុងតែម្តង នៅដំណាក់កាលទី១ នៅថ្ងៃទី៤ ខែមេសា ឆ្នាំ២០១៩។
សូមជម្រាប់ជួនថា ស្ថានីយអគ្គិសនីដើរដោយពន្លឹព្រះអាទិត្យនេះ ត្រូវបានសាងសង់ដោយក្រុមហ៊ុនSchneitec Renewable Co., Ltd ដែលទទូលបានការយល់ព្រមពីក្រុមប្រឹក្សាអភិវឌ្ឍន៍កម្ពុជា កាលពីខែវិច្ឆិកា ឆ្នាំ២០១៨ ដែលមានទុនវិនិយោគប្រមាណ៥៨,២៣លានដុល្លារ នឹងមានទីតាំងស្ថិតនៅតាមបណ្តោយផ្លូវជាតិលេខ៥១ ក្បែរសាលានាយទាហានសកម្មត្មាតពង លើទំហំផ្ទៃដី៨០ហិកតា ក្នុងឃុំដំណាក់រាំង ស្រុកឧដុង្គ ខេត្តកំពង់ស្ពឺ៕
