Elon Musk ៖ នៅប៉ុន្មានឆ្នាំខាងមុខ បច្ចេកវិទ្យាថ្មីរថយន្តតាក់ស៊ីគ្មានមនុស្សបើកនឹងដំណើរការជាង១លានគ្រឿង
គ្រប់គ្នាប្រាកដជាស្គាល់ហើយពីមហាសេដ្ឋីសល់លុយពាន់លានដុល្លារ Elon Musk ដែលជាមនុស្សដែលមានទ្សនៈវិស័យប្លែកជាងគេ ហើយមើលឃើញឆ្ងាយ ដោយកាលពីខែមេសាកន្លងទៅ គាត់បានលើកឡើងពីគម្រោងរបស់ Tesla ថានឹងមានឡាន Tesla ដែលអាចបើកដោយខ្លួនឯង១លានគ្រឿងនៅលើផ្លូវនាឆ្នាំ២០២០ខាងមុខនេះ។
ចំពោះការលើកឡើងនេះ ក៏លេចចេញជាមតិរិះគន់មិនចេះតិចមកលើ Elon ផងដែរ ជាពិសេសចេញពីមាត់របស់អ្នកជំនាញខាង AI ឬបញ្ញាសុប្បនិម្មិតនេះតែម្ដង ដោយបាននិយាយថាអ្វីដែល Elon លើកឡើងនេះហាក់ដូចជាលើសពេក ពោលគឺ Tesla មិនអាចមានរថយន្តបើកបរដោយខ្លួនឯងបានរហូតដល់ទៅ១លានគ្រឿង ត្រឹមពេលតែមួយឆ្នាំទៀតនោះទេ។
ខាងក្រុមអ្នកជំនាញខាង AI បានលើកថា Elon ត្រូវការពេលច្រើនទៀតដើម្បីបង្វឹក AI ដែលអាចបើកបរថយន្តឆ្លាតវៃបើកដោយខ្លួនឯងនោះបាន ហើយឆ្នាំក្រោយនេះអាចបានត្រឹមតែមុខងារ Autopilot បន្តិចបន្តួចប៉ុណ្ណោះ។ ជាមួយគ្នានេះផងដែរ ខាងក្រុមហ៊ុនបច្ចេកវិទ្យាធំៗដ៏ទៃទៀតដូចជា Google, Uber ជាដើមសុទ្ធតែបានធ្វើការស្រាវជ្រាវរថយន្ត ដែលអាចបើកបរដោយខ្លួនឯងនេះអស់រយៈពេលច្រើនឆ្នាំមកហើយ នៅមិនទាន់បានដាក់ដំណើរការនៅលើដងវិថីបានស្រួលបួលផង។
នៅមានរឿងដែលបង្អាក់នូវពាក្យរបស់ Elon ទៀតនោះ គឺច្បាប់រដ្ឋរបស់សហរដ្ឋអាមេរិក ដែល Tesla ត្រូវធ្វើការសុំច្បាប់ឱ្យបានត្រឹមត្រូវសិនមុននឹងអាចឱ្យបច្ចេកវិទ្យាបើកបរដោយប្រើប្រាស់ AI របស់ខ្លួនមាននៅលើដងផ្លូវបាននោះ យ៉ាងណាក៏ដោយ គេក៏មិនអាចរំពឹងខ្ពស់ពី Elon ផងដែរ ដោយកន្លងមក អ្វីដែលគាត់និយាយគាត់ធ្វើមិនទាន់ពេលវេលាជាច្រើនលើក ប៉ុន្តែគាត់នៅតែធ្វើបាននូវអ្វីដែលគាត់និយាយ គ្រាន់តែប្រើប្រាស់រយៈពេលយូរ និងយឺត។
គូសបញ្ជាក់ថា Tesla អាចនឹងសម្រេចបាននូវបច្ចេកវិទ្យារថយន្តបើកបរដោយស្វ័យប្រវត្តិនៅលើដងផ្លូវមុនក្រុមហ៊ុនដ៏ទៃទៀត ដោយហេតុតែ Tesla ប្រើប្រាស់បច្ចេកវិទ្យាខុសពីគេ សូម្បីតែបន្ទះឈីបក៏ Tesla ផលិតខ្លួនឯងដែរ៕