ទិដ្ឋភាពនៃប្រាង្គប្រាសាទអង្គរវត្ត ដែលជាតំបន់បេតិកភណ្ឌពិភពលោក កាន់តែទាក់ទាញភ្ញៀវទេសចរកាន់តែច្រើន
សៀមរាប ៖ ថ្មីៗនេះសារព័ត៌មាន CGTN បានធ្វើការផ្សព្វផ្សាយអំពីតំបន់ប្រាសាទអង្គរវត្ត ដែលជាបេតិកភណ្ឌពិភពលោកដ៏អច្ឆរិយរបស់កម្ពុជា ដោយបង្ហាញពីភាពរឹងមាំ ស្រស់ស្អាតនៃសំណង់បុរាណក្នុងរមណីយដ្ឋានអង្គរ។
ក្នុងនោះ CGTN បានធ្វើការចុះផ្សាយថា រាល់បេតិកភណ្ឌពិភពលោកនីមួយៗនៅតំបន់អាស៊ី គឺបានបង្ហាញ និងឆ្លុះបញ្ចាំងអំពីវប្បធម៌ អរិយធម៌របស់ប្រទេសនោះ។ ជាក់ស្តែង ដូចជាប្រាសាទអង្គរវត្តរបស់កម្ពុជា ដែលជាបេតិកភណ្ឌពិភពលោកមួយនៅអាស៊ី ដែលសិក្សាពីប្រវត្តិសាស្ត្រឬសគល់តាំងពីអតីតកាល និងបច្ចុប្បន្នវិញ គឺបានបង្ហាញពីទំនាក់ទំនងយ៉ាងជិតស្និទ្ធរវាងវប្បធម៌ អរិយធម៌ និងការរស់នៅរបស់ប្រជាជន។
ប្រាសាទអង្គរវត្ត គឺជាសំណង់ប្រវត្តិសាស្ត្រដ៏ធំមួយនៅលើពិភពលោក ដែលរំលេចនូវសម្រស់ដ៏អស្ចារ្យដល់ភ្ញៀវទេសចរ ជាមួយការបង្កប់នូវអាថ៌កំបាំងជាច្រើនក្នុងនោះ។ ទោះបីជាយ៉ាងណា គ្រប់គ្នាប្រហែលជាមិនបានកត់ត្រាទុកនោះទេ អំពីការខូចខាតសម្រស់ប្រាសាទខ្លះៗ ដោយសារគ្រោះធម្មជាតិ។
គួរជម្រាបថា រមណីយដ្ឋានអង្គរចូលជាបេតិកភណ្ឌពិភពលោក របស់អង្គការយូណេស្កូ នៅថ្ងៃទី១៤ ខែធ្នូ ឆ្នាំ១៩៩២ ដែលបានក្លាយជាគោលដៅទេសចរណ៍លេខ១លើពិភពលោក និងធ្វើឱ្យភ្ញៀវទេសចរគ្រប់ជាតិសាសន៍បានស្គាល់ និងមកទស្សនាអង្គរកើនឡើងជាប្រចាំ ជាប្រភពចំណូលសេដ្ឋកិច្ចដល់ជាតិគួរឱ្យកត់សម្គាល់៕
