នាពេលនេះវិទ្យុសំឡេងសហរដ្ឋអាមេរិក (VOA) ត្រៀមដំណើរការនៅកម្ពុជាហើយ ក្រោយក្រសួងព័ត៌មានអនុញ្ញាត
ភ្នំពេញ ៖ នាពេលនេះវិទ្យុសំឡេងសហរដ្ឋអាមេរិក (VOA) បានដំណើរការការផ្សាយរបស់ខ្លួននៅក្នុងប្រទេសកម្ពុជាបានហើយ ក្រោយពេលដែលក្រសួងព័ត៌មានបានចេញលិខិតជាផ្លូវការ ដោយសម្រេចឲ្យស្ថាប័ននេះមានការិយាល័យតំណាងស្របច្បាប់របស់ខ្លួនស្របច្បាប់។
តាមសេចក្តីសម្រេច, ការិយាល័យសំឡេងសហរដ្ឋអាមេរិក (VOA) ប្រចាំនៅព្រះរាជាណាចក្រកម្ពុជា មានទីតាំងស្ថិតនៅផ្ទះលេខ៣២០ ផ្លូវព្រះមុនីវង្ស សង្កាត់ចតុមុខ ខណ្ឌដូនពេញ រាជធានីភ្នំពេញ និងមាន លោក Christopher Service Dechard ជនជាតិអាមេរិក កាន់លិខិតឆ្លងដែនលេខ P822102789 ធ្វើនៅថ្ងៃទី០១ខែមិថុនា ឆ្នាំ២០១៩ ជាតំណាងស្របច្បាប់។
ការិយាល័យសំឡេងសហរដ្ឋអាមេរិក (VOA) និងអ្នកតំណាងស្របច្បាប់ ត្រូវគោរពតាមរដ្ឋធម្មនុញ្ញ ច្បាប់ស្តីពីរបបសារព័ត៌មាន ក្រមសីលធម៌អ្នកសារព័ត៌មាន បទបញ្ជា កិច្ចសន្យា នឹងសេចក្តីណែនាំនានាពាក់ព័ន្ធវិស័យព័ត៌មាន និងសោតទស្សន៍នៃព្រះរាជាណាចក្រកម្ពុជា។ ករណីប្រព្រឹត្តល្មើសត្រូវទទួលទោសតាមច្បាប់ជាធរមាន។ នេះបើតាមការបញ្ជាក់របស់ក្រសួងព័ត៌មាន ក្នុងប្រកា២ នៃសេចក្តីសម្រេចខាងលើនេះ។ មិនតែប៉ុណ្ណោះ ក្រសួងក៏បានតម្រូវឱ្យ ការិយាល័យវិទ្យុសំឡេងសហរដ្ឋអាមេរិក គឺរាល់ការផ្លាស់ប្តូរព័ត៌មានអំពីទីតាំងការិយាល័យ ឬ អ្នកតំណាងស្របច្បាប់ ត្រូវជូនដំណឹងមកក្រសួងព័ត៌មាន៥ (ប្រាំ) ថ្ងៃមុន។
វិទ្យុសំឡេងសហរដ្ឋអាមេរិក (VOA) ជាបណ្តាញផ្សាយពហុព័ត៌មានអន្តរជាតិធំបង្អស់របស់សហរដ្ឋអាមេរិក ដែលផ្តល់ព័ត៌មានជិត៥០ភាសា។ (VOA) ត្រូវបានបង្កើតឡើងនៅឆ្នាំ១៩៤២ ជាមួយនឹងការប្តេជ្ញារាយការណ៍ព័ត៌មានឯករាជ្យ និងទូលំទូលាយ ហើយនាំយកការពិតជូនដល់អ្នកស្តាប់ និងទស្សនិកជន។ (VOA) ត្រូវបានឧបត្ថម្ភថវិកាដោយពលរដ្ឋអាមេរិកាំងដែលបង់ពន្ធហើយ (VOA) ជាផ្នែកមួយនៃទីភ្នាក់ងារសហរដ្ឋអាមេរិកសម្រាប់បណ្តាញផ្សាយព័ត៌មានសាកល។ នេះបើតាមការប្រកាសរបស់ (VOA)។
កាលពីកន្លងទៅរាជរដ្ឋាភិបាលកម្ពុជារងការចោទប្រកាន់ថា បានបិទសារព័ត៌មានបរទេស ដូចជា៖ អាស៊ីសេរី និង The Cambodia Daily ដែលមានវត្តមាននៅក្នុងប្រទេសកម្ពុជា។ ទោះជាយ៉ាងនេះក្តី តាមសេចក្តីថ្លែងការណ៍ កាលពីថ្ងៃទី០៣ ខែធ្នូ ឆ្នាំ២០១៨ រាជរដ្ឋាភិបាលកម្ពុជា បានបង្ហាញនូវការប្តេជ្ញាចិត្តយ៉ាងមោះមុត ក្នុងការលើកតម្កើងនូវសិទ្ធិសេរីភាពសារព័ត៌មាន សេរីភាពការបញ្ចេញមតិស្របតាមរដ្ឋធម្មនុញ្ញ និងច្បាប់ដែលមានជាធរមាន។
រាជរដ្ឋាភិបាល បានបញ្ជាក់យ៉ាងច្បាស់ថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិក បានផ្តួចផ្តើមគំនិតបិទការិយាល័យតំណាងរបស់ខ្លួនដោយខ្លួនឯង។ ដូច្នេះវិទ្យុទាំងពីរនេះ ក៏មានសេរីភាពបើកការិយាល័យតំណាងរបស់ខ្លួននៅកម្ពុជា ឡើងវិញបានដែរ។ ដោយឡែកកាសែត The Cambodia Daily បានបិទការិយាល័យ ដោយសារតែមិនមានលទ្ធភាពបង់ពន្ធជូនរដ្ឋ៕