ចូរប្រយ័ត្នទាំងអស់គ្នា!! បញ្ហាធំហើយអ្នកដែលប្រើឧបករណ៍ FaceApp កែមុខក្មេងទៅចាស់ជាការស្រង់ទិន្នន័យចេញពីប្រភពមិនច្បាស់លាស់
ប៉ុន្មានថ្ងៃនេះមានរូបភាពវ័យចាស់ជាច្រើនបានផុសពេញ Facebook ទូទាំងប្រទេស ជាពិសេសយុវវ័យតែម្ដង នាំគ្នាលេងកម្មវិធី App កែមុខក្មេងទៅវ័យចាស់ស្ទើគ្រប់ៗដៃ។
App នេះត្រូវបានបង្កើតឡើងតាំងពីខែ មករា ឆ្នាំ២០១៧ មកម្លេះ ដែលអភិវឌ្ឍន៍ដោយ Wireless Lab ហើយមានមូលដ្ឋានកើតចេញពី ក្រុមហ៊ុន Wireless Lap ស្ថិតនៅប្រទេសរុស្សី ដែលគេហៅវាថា FaceApp ។
មិនត្រឹមតែប៉ុណ្ណោះអ្នកអភិវឌ្ឍន៍ ក៏បានប្រើប្រាស់បច្ចេកវិទ្យា neural Network ជាបច្ចេកវិទ្យាមួយដែលអាចភ្ជាប់បណ្ដាញទំនាក់ទំនងពីមួយទៅ មួយ ធ្វើការដោយបណ្តាញសិប្បនិម្មិត (AI) ដែលវាអាចគណនារូបភាពពីមួយចំណុច ទៅមួយចំណុច ដើម្បីចេញលទ្ធផលដែលយើងចង់បាន។ កម្មវិធី App នេះដែរវា គឺជាកម្មវិធីកែរូបភាពធម្មតាប៉ុណ្ណោះ ដែលបើកឲ្យប្រើប្រាស់ទូទាំងពិភពលោក ហើយប្រើប្រាស់បានទាំងប្រព័ន្ធប្រតិបត្តិការ Android និង iOS ។
ទន្ទឹមនឹងនេះដែរ រឿងរ៉ាវក៏បានកើតឡើងបន្ទាប់ពីល្បីល្បាញមួយរយៈនេះមក ព្រោះមានប្រជាជននៅអាមេរិក និង បណ្ដាប្រទេសផ្សេងៗទៀតលើពិភពលោក នាំគ្នាជ្រួលច្របល់ដោនឡូត App នេះលេងព្រោងព្រាត ជាពិសេសមកដល់ពេលនេះមាន User ជាង៨០លាននាក់ហើយ ជុំវិញពិភពលោក រួមទាំងអាមេរិក។ មូលហេតុដែលអាមេរិកឲ្យក្រុម FBI សើបអង្កេតលើ App មួយនេះព្រោះតែមានរឿងជាប់សង្ស័យជាច្រើនថា App មួយនេះអាចនឹងស្រង់ទិន្នន័យពីអ្នកប្រើប្រាស់ជុំវិញពិភពលោក បូករួមមានមូលដ្ឋានអភិវឌ្ឍន៍នៅរុស្សីទៀតនោះ គឺរឹតតែធ្វើអាមេរិកព្រួយបារម្មណ៍ជាខ្លាំង។
ក្នុងនោះដែរគេឃើញលោក Chuck Schumer ដែលជា សមាជិកព្រឹទ្ធសភារបស់សហរដ្ឋអាមេរិក បានបង្ហោះលើគណនី Twitter លោកថា ទិន្នន័យភាគច្រើន ដែលជនជាតិអាមេរិកប្រើប្រាស់ App នេះគឺអាចធ្លាក់ចូលដៃជនបរទេស ហើយអាចយកទៅធ្វើការងារក្នុងរូបភាពណាមួយ ជាពិសេសគឺ App ដែលចេញពីរុស្សីតែម្ដង។
ទោះបីជាយ៉ាងនេះក្ដី ក្រុមអ្នកអភិវឌ្ឍន៍កម្មវិធី FaceApp បានធ្វើការរុញច្រានពាក្យសម្ដីចោទប្រកាន់នេះចោល ហើយលើកឡើងថា ទោះបីកម្មវិធីនេះ អភិវឌ្ឍន៍នៅរុស្សីក៏ដោយ ក៏ប៉ុន្ដែទិន្នន័យកែរូបគឺរក្សាទុកបានយ៉ាងសំងាត់ និងមិនបានបញ្ជូនទៅរុស្សីឡើយ ហើយ App នេះគឺកែរូបភាពធម្មតាតែប៉ុណ្ណោះ។
គួរបញ្ជាក់ផងដែរថា គិតមកទាល់ពេលនេះ FaceApp កំពុងល្បីខ្លាំងណាស់ សូម្បីតែកម្ពុជាយើងក៏មានអ្នកលេងច្រើនដែរ ហើយគេឃើញរូបភាពពេញ Facebook បង្ហោះរូបភាពពេលចាស់ទៅព្រោងព្រាតទៀតផង៕
