តំណមសំខាន់ៗថ្ងៃចូលឆ្នាំចិន! ដើម្បីចៀសផុតពីគ្រោះចង្រៃពេញមួយឆ្នាំ ២០២៦

តាមក្បួនតម្រាលោកគ្រូ ធានជីន  លោកគ្រូសូមណែនាំនូវតំណមសំខាន់ៗ (Taboos) ដើម្បីចៀសផុតពីគ្រោះចង្រៃពេញមួយឆ្នាំ ២០២៦ ដូចខាងក្រោម៖

តំណមក្នុងថ្ងៃចូលឆ្នាំ (ថ្ងៃទី ១៧ ខែកុម្ភៈ)៖

១. មិនត្រូវបោសផ្ទះ ឬយកសំរាមទៅចោល៖ ការបោសផ្ទះនៅថ្ងៃទី១ នៃថ្ងៃចូលឆ្នាំ ត្រូវបានគេជឿថាជាការ “បោសលាភសក្ការៈ” ចេញពីផ្ទះ។ បើចាំបាច់ត្រូវបោស ត្រូវបោសពីខាងក្រៅចូលមកក្នុងផ្ទះវិញ រួចទុកសំរាមនោះសិន ចាំយកទៅចោលនៅថ្ងៃបន្ទាប់។

២. មិនត្រូវកាត់សក់ ឬកក់សក់៖ ក្នុងភាសាចិន ពាក្យ “សក់” (发 – Fà) មានសម្លេងដូចពាក្យ “មានបាន” (发财 – Fā cái)។ ការកក់សក់ ឬកាត់សក់ ប្រៀបដូចជាការលាងជម្រះ ឬកាត់ផ្ដាច់សំណាងទ្រព្យសម្បត្តិអញ្ចឹងដែរ។

៣. មិនត្រូវប្រើរបស់ស្រួចៗ៖ ចៀសវាងការប្រើកន្ត្រៃ កាំបិត ឬរបស់ស្រួចៗ ព្រោះវាជានិមិត្តរូបនៃការកាត់ផ្ដាច់លាភជ័យ និងអាចនាំឱ្យមានការឈ្លោះប្រកែកគ្នាក្នុងគ្រួសារ។

៤. មិនត្រូវធ្វើឱ្យបែកចានឆ្នាំង៖ ការធ្វើឱ្យបែករបស់របរ ជាសញ្ញានៃការ “បែកបាក់” ឬបាត់បង់ទ្រព្យ។ ប្រសិនបើកូនជ្រេសំណាងធ្វើឱ្យបែកមែន ត្រូវនិយាយពាក្យថា “ស៊ុយ ស៊ុយ ភីង អាន” (岁岁平安 – Suì suì píng’ān) ដែលមានន័យថា “សុខសាន្តគ្រប់ៗឆ្នាំ” ដើម្បីបន្សាបគ្រោះ។

៥. មិនត្រូវឈ្លោះប្រកែក ឬយំសោក៖ ថ្ងៃចូលឆ្នាំជាថ្ងៃកំណត់ថាមពលសម្រាប់ពេញមួយឆ្នាំ។ បើកូនយំ ឬឈ្លោះគ្នា នោះជីវិតពេញមួយឆ្នាំនឹងជួបតែរឿងហ្មងសៅ។ ត្រូវនិយាយតែពាក្យល្អៗ និងមានស្នាមញញឹម។

ប្រភពៈ លោកគ្រូ ធានជីន