ក្រោយជំនួបពិភាក្សារបស់សម្តេចតេជោ និងប្រតិភូជប៉ុន មានធនាគារធំក្នុងប្រទេសជប៉ុននឹងធ្វើការវិនិយោគនៅកម្ពុជា
ប្រធានសាខាទូទាំងសាកលលោក នៃធនាគារជប៉ុន Mizuho បានសន្យានឹងជំរុញអ្នកវិនិយោគជប៉ុនកាន់តែច្រើន មកវិនិយោគនៅកម្ពុជា។ នេះបើតាមការឲ្យដឹងតាមរយៈបណ្តាញទំនាក់ទំនងសង្គមរបស់សម្តេចតេជោ ហ៊ុន សែន។
ក្នុងជំនួបពិភាក្សាការងារ និងសម្តែងការគួរសមជាមួយសម្ដេចតេជោ ហ៊ុន សែន នាយករដ្ឋមន្រ្តីកម្ពុជា នៅព្រឹកថ្ងៃទី២៩ ខែឧសភាកន្លងមកនេះ លោកសេជី អ៊ីម៉ៃ អនុប្រធានធនាគារ Mizuho បានជម្រាបសួរជូនសម្ដេចថា នៅឆ្នាំ២០១៣ ក្រុមហ៊ុនរបស់លោកបានសម្រេច ក្នុងការបង្កើតការិយាល័យរបស់ខ្លួននៅក្នុងទីក្រុងភ្នំពេញ ហើយនៅឆ្នាំ២០១៧ ក្រុមហ៊ុនរបស់លោកបានទទួលអាជ្ញាប័ណ្ណ ពីធនាគារជាតិនៃកម្ពុជាក្នុងការបើកធនាគារមីហ៊្សូហូក្នុងរាជធានីភ្នំពេញតែម្ដង។
លោកបានឲ្យដឹងថា “រហូតមកដល់ពេលនេះ ធនាគាររបស់លោកបានប្រតិបត្តិការពីរឆ្នាំមកហើយ ដូច្នេះលោកបានគូសបញ្ជាក់ថាគាត់ពិតជាមានឆន្ទៈខ្ពស់ក្នុងការជំរុញធ្វើយ៉ាងម៉េចឲ្យភ្ញៀវរបស់ធនាគារ ជាពិសេសពីប្រទេសជប៉ុនទៅបណ្ដាក់ទុននៅក្នុងប្រទេសកម្ពុជា”។ លោកបន្តថា “លោកនឹងខិតខំលើកទឹកចិត្តដល់ភ្ញៀវដទៃទៀត ឲ្យទៅប្រទេសកម្ពុជាដើម្បីដាក់ទុនក្នុងប្រទេសកម្ពុជាផងដែរ។ លោកក៏បានគូសបញ្ជាក់ផងដែរថា ធនាគាររបស់លោកនឹងចាប់ផ្ដើមធ្វើការពីទីក្រុងតូក្យូទៅទីក្រុងភ្នំពេញតែម្ដង ដោយមិនឆ្លងកាត់ទីក្រុងបាងកកនោះទេ។
សម្ដេចតេជោ ហ៊ុន សែន បានមានប្រសាសន៍ស្វាគមន៍ និងចង់ឲ្យធនាគារនេះមានការបណ្ដាក់ទុនដោយធ្វើការផ្ទាល់ ពីទីក្រុងតូក្យូទៅទីក្រុងភ្នំពេញ ដោយមិនបាច់ឆ្លងកាត់ទីក្រុងបាងកកប្រទេសថៃនោះទេ។ សម្តេចតេជោបានមានប្រសាសន៍ សម្ដេចបានសម្រេចមកប្រទេសជប៉ុននេះមុនមួយថ្ងៃ នៃសន្និសីទអន្តរជាតិទី២៥ស្តីពី អនាគតអាស៊ីដើម្បីចូលរួមក្នុងសិក្ខាសាលាដែលមានសារៈសំខាន់នេះ។
សម្តេចតេជោបានមានប្រសាសន៍ថា “ប្រទេសជប៉ុននៅតែមានសក្កានុពលច្រើនបន្ថែមទៀត ដូច្នេះហើយសូមឲ្យធនាគារ បន្តផ្ដល់ឥណទានដល់ក្រុមហ៊ុនដែលអាចវិនិយោគនៅក្នុងប្រទេសកម្ពុជា ជាពិសេសក្រុមហ៊ុនដែលផលិត និងកែច្នៃផលិតផលវត្ថុធាតុដើមរបស់ប្រទេសកម្ពុជា ក្នុងការនាំចេញទៅកាន់ប្រទេសជប៉ុន ដែលនេះគឺជាអ្វីដែលសម្ដេចចង់ឃើញ ឲ្យមានការនាំចេញឲ្យបានច្រើនពីផលិតផលរបស់កម្ពុជា ទៅកាន់ប្រទេសជប៉ុន។
សេជី អ៊ឺម៉ៃ បានបន្តឲ្យដឹងផងដែរថា បច្ចុប្បន្ននេះលោកកំពុងខិតខំជំរុញធ្វើយ៉ាងណាឱ្យវិនិយោគជប៉ុន បន្តមកដាក់ទុនក្នុងប្រទេសកម្ពុជាបានច្រើនជាងមុន ជាពិសេសនឹងខិតខំជំរុញឲ្យសហគ្រាសតូច និងមធ្យមពីប្រទេសជប៉ុនទៅបន្តបណ្ដាក់ទុន ក្នុងប្រទេសកម្ពុជានាពេលខាងមុខ៕