តោះនាំគ្នាមកសិក្សាគំនិតរកស៊ី៥នៅអាស៊ីអាគ្នេយ៍ដែលលើសតម្លៃ១ពាន់លានដុល្លារមកដល់បច្ចុប្បន្ន
បើនិយាយពីបច្ចេកវិទ្យា គ្រប់គ្នាប្រាកដជាលើកសរសើរមិនដាច់ពីប្រទេសធំដូចជាអាមេរិក ចិន ជប៉ុន និងអឺរ៉ុបជាដើម ប៉ុន្តែនៅក្នុងរយៈកាលចុងក្រោយនេះ គេសង្កេតឃើញថាចក្ខុវិស័យនៃការវិនិយោគលុយខ្ទង់ពាន់ៗលានដុល្លារ បង្វែរមកកាន់ប៉ែកខាងអាស៊ីអាគ្នេយ៍ធ្វើឱ្យក្រុមហ៊ុននៅក្នុងតំបន់នេះភាគច្រើនមានតម្លៃឡើងគ្រើតៗរហូតដល់ខ្ទង់ពាន់លានដុល្លា។
ក្នុងអត្ថបទនេះ Business Cambodia សូមណែនាំលោកអ្នកនូវគំនិតរកស៊ីរបស់ក្រុមហ៊ុន៥ ដែលធ្វើឱ្យ ក្រុមហ៊ុនទាំងនោះក្លាយទៅជាក្រុមហ៊ុនមានតម្លៃខ្ទង់ពាន់ៗលានដុល្លា។
១.Go-Jek
បង្កើតឡើងនៅឆ្នាំ២០១០ Go-Jek ជាក្រុមហ៊ុននាំមុខគេនៅឥណ្ឌូនេស៊ីខាងផ្នែកហៅម៉ូតូឌុបតាមរយៈកម្មវិធីទូរស័ព្ទ ហើយថ្មីៗនេះ ទើបនឹងទទួលបានទុនវិនិយោគក្តៅៗ ១.៥ ពាន់លានដុល្លាពីក្រុមហ៊ុនយក្សចិន Tencent ធ្វើឱ្យក្រុមហ៊ុនមួយនេះមានតម្លៃលោតខ្ពស់រហូតដល់ទៅច្រើនជាង ៩ពាន់លានដុល្លា។ ក្រោយពីជោគជ័យលើសេវាកម្មហៅម៉ូតូឌុប Go-Jek បានពង្រីកខ្លួនទៅកាន់សេវាកម្មដ៏ទៃទៀតដូចជា សេវាកម្មដឹកជញ្ចូន កក់សំបុត្រ សេវាកម្មសម្អាត ប្រព័ន្ធទូរទាត់ប្រាក់ឌីជីថលជាដើម។
២.Grab
មិនខុសពី PassApp ខ្មែរយើងប៉ុន្មាននោះទេGrab ជាសេវាកម្មហៅតាក់ស៊ី មានស្ទើរគ្រប់បណ្ដាប្រទេសអាស៊ានរហូតដល់ទៅ៨ ប្រទេស១៦៨ទីក្រុង សូម្បីតែ Uber ក៏ប្រកាសដកខ្លួនចេញពីទីផ្សារអាស៊ានហើយលក់ភាគហ៊ុនឲ្យ Grab ដែរ។ តម្លៃក្រុមហ៊ុនអាស៊ីអាគ្នេយ៍មួយនេះបានលោតដល់ខ្ទង់ ៦ ពាន់លានដុល្លាក្រោយពី ទទួលបានការវិនិយោគ១ពាន់លានដុល្លា ពីក្រុមហ៊ុនToyota។
៣.Lazada
Lazada រកស៊ីខាងទីផ្សារនៅលើអីនធឺណេត (E-Commerce) ដែលមានអតិថិជនច្រើនលាននាក់មកពី មាឡេស៊ី ថៃ ភីលីពីន សិង្ហបុរី និងវៀតណាម។ កកើតដំបូងក្នុងឆ្នាំ២០១១ ក្រុមហ៊ុននេះត្រូវបានយក្សបច្ចេកវិទ្យាចិនមួយគឺ Alibaba ធ្វើការទិញយក ប៉ុន្តែមិនមានទិន្នន័យច្បាស់ការណាថាក្រុមហ៊ុននេះមានតម្លៃប៉ុន្មាននោះទេ គ្រាន់តែដឹងថាខ្ទង់ពាន់ៗលានដុល្លា ព្រោះថាគ្រាន់តែទំហំទឹកប្រាក់ ដែលគេវិនិយោគលើក្រុមហ៊ុននេះកន្លងមកគឺ៤.២ពាន់លានដុល្លារ នេះបើតាមទិន្នន័យពីCrunchbase។
៤. Tokopedia
ទីផ្សារឥណ្ឌូនេស៊ីធំ ធ្វើឱ្យលោក William Tanuwijaya ដែលមានបទពិសោធន៍ខាង IT ស្រាប់មានគំនិតបង្កើតផ្សារទំនិញអនឡាញមួយសម្រាប់ប្រជាជនឥណ្ឌូនេស៊ីដែលមានប្រមាណជាខ្ទង់ ២៦០លាននាក់ ដោយមានទស្សនៈវិស័យមួយជារួមចង់ជួយប្រជាជនឥណ្ឌូនេស៊ីឱ្យមានលទ្ធភាពអាចលក់ទំនិញឬសេវាកម្មរបស់ខ្លួនបាន។ ជាមួយនឹងការវិនិយោគពី Alibaba ក្នុងទឹកប្រាក់ប្រមាណជា១.១ពាន់លានដុល្លា មិនបាច់គិតច្រើនក៏យើងអាចដឹងថាក្រុមហ៊ុនមួយនេះមានតម្លៃលើស១ពាន់លានដុល្លារដែរ។
៥. Traveloka
នេះជាក្រុមហ៊ុនឥណ្ឌូនេស៊ីទៀតហើយ ក្រុមហ៊ុន Traveloka មានជំនាញរកស៊ីទៅលើសេវាកម្មកក់សំបុត្រយន្តហោះនិងបន្ទប់សណ្ឋាគារ និយាយឱ្យមែនទែនទៅ ឱ្យតែទាក់ទងនឹងរឿងធ្វើដំណើរនៅ មានតែកម្មវិធីនេះទៅលែងភ័យរឿងអត់អីជិះ អត់ផ្ទះស្នាក់ហើយ ស្រដៀងទៅនឹងTripadvisor ដែរ។ សម្រាប់ទស្សនៈវិស័យមួយដែលធ្វើឱ្យក្រុមហ៊ុននេះក្លាយទៅជាក្រុមហ៊ុនដែលមានតម្លៃច្រើនពាន់លានដុល្លានោះគឺជាឃ្លាមួយដែលនិយាយថា “ប្រសិនបើសេវាកម្មល្អ នឹងមានអ្នកប្រើ”៕
