ផ្នែកទាំង៣សំខាន់នៃ Website ដែលបានបង្កើតឡើងសម្រាប់កូនខ្មែរ ដើម្បីពង្រឹងសមត្ថភាព និងអក្សរសាស្ត្រជាតិ
ការរីកចម្រើនខាងប្រព័ន្ធព័ត៌មានវិទ្យា បានធ្វើឱ្យជីវិតរស់នៅមានការប្រែប្រួលយ៉ាងខ្លាំងលើគ្រប់ផ្នែក ការអប់រំក៏ទទួលផលប្រយោជន៍យ៉ាងច្រើនផងដែរ។ ការរៀន និងបង្រៀនលែងពឹងអាស្រ័យទាំងស្រុងទៅលើក្ដារខៀន សៀវភៅ និងគ្រូបង្រៀនទៀតហើយ។ កុមារអាចរៀនដោយខ្លួនឯង ជាពិសេស ខ្លឹមសារមុខវិជ្ជា ដោយប្រើឧបករណ៍អេឡិចត្រូនិក និងអ៊ីនធឺណិត។
គេហទំព័រសង្កប្បមានបីផ្នែកសំខាន់ៗ សម្រាប់ជួយឱ្យការបង្រៀននិងរៀនភាសាខ្មែរ ការតាមដានសកម្មភាពសិក្សា និងការវាយតម្លៃលទ្ធផលសិក្សា មានភាពងាយស្រួលសម្រាប់អ្នកគ្រូ លោកគ្រូ អាណាព្យាបាល និងកុមារ។
១.ផ្នែករៀន
នៅក្នុងផ្នែកនេះ ពាក្យសំខាន់ចំនួនជាង២០០០ពាក្យ ត្រូវបានដកស្រង់ចេញពីសៀវភៅពុម្ពភាសាខ្មែរថ្នាក់ទី១ ទី២ និងទី៣ របស់ក្រសួងអប់រំ យុវជន និងកីឡា មកបង្កើតសកម្មភាពសិក្សាចំនួនជាង២០០០០ សកម្មភាពសិក្សា។ សកម្មភាពសិក្សាទាំងនេះត្រូវបានបែងចែកជា៤ក្រុមធំៗ សម្រាប់ជួយកុមារឱ្យមានចំណេះដឹងច្បាស់លាស់ក្នុង ១.ការអានពាក្យ ២.ការសរសេរពាក្យ ៣.ការយល់អត្ថន័យពាក្យ និង៤.ការប្រើពាក្យបានត្រឹមត្រូវតាមបរិបទ។
២.ផ្នែកវិភាគ
ផ្នែកនេះកត់ទុករាល់សកម្មភាពសិក្សាទាំងអស់ ដែលកុមារបានធ្វើនៅក្នុងផ្នែករៀន អ្នកគ្រូលោកគ្រូ អាណាព្យាបាល និងកុមារអាចពិនិត្យមើល ១.រយៈពេលដែលកុមារបានប្រើគេហទំព័រសង្កប្បសម្រាប់រៀនភាសាប្រចាំថ្ងៃ ប្រចាំសប្ដាហ៍ ឬប្រចាំខែ ២.សកម្មភាពសិក្សាដែលកុមារធ្វើបានត្រឹមត្រូវ និងសកម្មភាពសិក្សាដែលកុមារធ្វើពុំបានត្រឹមត្រូវ និង៣.សកម្មភាពសិក្សាដែលកុមារត្រូវធ្វើឡើងវិញ ដើម្បីបំពេញចំណុចខ្វះខាតរបស់ខ្លួន។
៣. ផ្នែកវាយតម្លៃ
ពាក្យនៅក្នុងផ្នែករៀនត្រូវបានយកមកប្រើ ដើម្បីបង្កើតសំណួរវាយតម្លៃចំនួនជិត២០០០០សំណួរ។ សំណួរទាំងនេះត្រូវបានបែងចែកជាវិញ្ញាសាវាយតម្លៃលទ្ធផលសិក្សារបស់កុមារតាមដំណាក់កាល មានពី១០សំណួរសម្រាប់វាយតម្លៃលទ្ធផលសិក្សាតាមមេរៀននីមួយៗ រហូតដល់៥០សំណួរសម្រាប់វាយតម្លៃលទ្ធផលសិក្សានៅឆមាសទី២។
អ្នកគ្រូ លោកគ្រូ និងអាណាព្យាបាលអាចពិនិត្យមើលលទ្ធផលប្រឡង ជាពិសេស ប្រឡងឆមាសទី១ និងទី២ ដើម្បីដឹងថា កុមារមានចំណេះដឹងភាសា ដូចការរំពឹងទុកនៅក្នុងសៀភៅរៀនភាសាខ្មែរ ឬលទ្ធផលសិក្សារំពឹងទុកក្នុងកម្មវិធីសិក្សាលម្អិតរបស់ក្រសួងអប់រំ យុវជន និងកីឡា ឬមិនទាន់មាននៅឡើយ៕
