ជែកម៉ា ៖ ពេលលក់ទំនិញឲ្យសាច់ញាតិ ទោះបីតម្លៃថោក ឬខាតយ៉ាងណា គេនៅតែគិតថាយើងបានចំណេញលើគេ
លោក Jack Ma ធ្លាប់និយាយថា៖ “ពេលលក់ទំនិញអ្វីមួយទៅឲ្យមិត្តឬសាច់ញាតិ ទោះបីជាយើងលក់ថោកឬខាតដើមយ៉ាងណាក៏ដោយ ពួកគេនៅតែគិតថាយើងស៊ីចំណេញលើគេដដែល! ហើយពួកគេនឹងមិនទទួលស្គាល់ទៅលើសណ្តានចិត្តរបស់យើងថែមទៀត”។
ជាការពិតណាស់ នៅលើលោកនេះ តែងតែមានមនុស្សដែលមិនទទួលស្គាល់ និងគោរពទៅលើកំលាំងកាយចិត្តនិងពេលវេលារបស់អ្នក ហើយផ្ទុយទៅវិញ ពួកគេនឹងសុខចិត្តឲ្យអ្នកដទៃបោកប្រាស់ និងយកចំណេញទៅលើគេ ជាជាងចំណាយនិងជួយដល់ញាតិមិត្តដែលស្គាល់គ្នា។ ពីព្រោះក្នុងចិត្តរបស់ពួកគាត់តែងតែគិតថា៖ “តើម្នាក់ហ្នឹងស៊ីចំណេញលើខ្ញុំបានប៉ុន្មានដែរ?” ដោយមិនបានគិតថា “ម្នាក់ហ្នឹងបានជួយឬទំលាក់តម្លៃទំនិញសម្រាប់លក់ឲ្យខ្ញុំបានប៉ុន្មានដែរ?”
នេះហើយជាគតិគំណិតរបស់អ្នកក្រីក្រ!
ហើយចុះ «អ្នកមាន» ធ្វើដូចម្តេចបានជាគេមាន? ហេតុផលធំជាងគេគឺថា «អ្នកមាន» តែងតែជួយនិងគាំទ្រភាគីអាជីវកម្មរបស់ពួកគេ ដោយបានផ្តល់ជំនួយទៅលើផលប្រយោជន៍រួម។ ទង្វើបែបនេះហើយ ដែលជួយគ្នាទៅវិញទៅមក បានធ្វើឲ្យអាជីវកម្មរបស់ពួកគាត់កាន់តែរីកចំរើន និងចំណេញទាំងសងខាង។
លោក Jack Ma បន្តទៀតថា៖ «ពេលចាប់ផ្តើមអាជីវកម្មដំបូង អ្នកដែលទុកចិត្តអ្នកជាងគេគឺ “មនុស្សដទៃដែលមិនស្គាល់អ្នក”។ មិត្តរបស់អ្នកវិញ គេនឹងមិនសូវទុកចិត្តអ្នក។ មិត្តជិតស្និតរបស់អ្នក គេនឹងដើរចេញ ចំណែកក្រុមគ្រួសាររបស់អ្នកវិញ គេអាចមើលងាយអ្នកទៀតផង»
លុះដល់ថ្ងៃដែលអ្នកជោគជ័យវិញ ហើយនៅពេលដែលអ្នកអាចចំណាយលុយយ៉ាងច្រើន ដើម្បីរៀបចំពិធីជប់លៀងដ៏ធំធេងមួយ អ្នកនឹងដឹងថា មនុស្សដែលអ្នកស្គាល់ទាំងអស់នឹងចូលរួមពិធីជប់លៀងនេះ ប៉ុន្តែមនុស្សដែលទុកចិត្តអ្នកជាងគេនឹងមិនបានចូលរួមវិញ។ មនុស្សដែលទុកចិត្តអ្នកជាងគេនោះគឺ “មនុស្សដទៃដែលមិនស្គាល់អ្នក”។
តើអ្នកយល់អំពីអ្វីដែលបានរៀបរាប់ខាងលើនេះទេ?
យើងត្រូវគោរពនិងរាក់ទាក់ “មនុស្សដទៃដែលមិនស្គាល់យើងនេះ” ឲ្យបានល្អ! ព្រោះពួកគេគឺជាអ្នកដែលអាចជួយអាជីវកម្មរបស់យើងកាន់រីកចំរើន និងល្អប្រសើរ៕