Dan Lok ៖ អ្នកលក់ទាំងអស់ត្រូវដឹងតែ៣ចំណុចខាងក្រោមនេះសិនមុននឹងចេញលក់វាមិនធ្វើឲ្យបរាជ័យ
ខលទៅភ្ញៀវមុន មិនមែនជារឿងខុសទេ តែបើនៅសុខ២ ខលទូរស័ព្ទព្រាវទៅភ្ញៀវ ដើម្បីនិយាយប្រាប់ពីផលិតផលទើបជារឿងមួយ ដែលមិនត្រឹមត្រូវនោះទេ ព្រោះអ្នកនឹងខាតពេលកាន់តែច្រើន នៅក្នុងការលក់ ព្រោះអ្នកមិនស្គាល់ច្បាស់នោះទេថា អតិថិជនរបស់អ្នកជាអ្នកណាអោយប្រាកដនោះទេ ចេះតែខលទៅគេទិញឬមិនទិញមិនខ្វល់។
សេដ្ឋីកាណាដា Dan Lok ដែលជាអ្នកលក់ដ៏មានប្រជាប្រិយម្នាក់ បាននិយាយថា អ្នកលក់ដែលខលទៅភ្ញៀវផ្តេសផ្តាស វាខាតពេលវេលាខ្លាំងណាស់ ហើយវាជារឿងមួយរំខានអារម្មណ៍ភ្ញៀវខ្លំាងបំផុត ពេលខ្លះអតិថិជនអាចសម្លុតអ្នក ថាបានលេខទូរស័ព្ទគាត់មកពីណាក៏មានដែរ។ ពេលនេះលោកបានបង្ហាញពីគោលការណ៍៣ ដែលអ្នកគួរតែដឹងមុននឹងទាញទូរស័ព្ទខលទៅភ្ញៀវ៖
១.តើមនុស្សម្នាក់នោះជាអ្នកណា(Identify of Customer)
សេដ្ឋីកាណាដានិយាយថា មិនមែនមនុស្សគ្រប់គ្នាសុទ្ធតែជាអតិថិជនរបស់អ្នកនោះទេ កុំលក់របៀបផ្សងព្រេងបែបនេះមិនរីកចម្រើនទេ សុខចិត្តយកពេលវេលាមួយនេះ មកស្វែងរកអតិថិជនណា ដែលមានតម្រូវការពិតវិញទើបជាការប្រសើរ។ មុននឹងខលទៅភ្ញៀវអ្នកគួរច្បាស់ថា? គាត់ជាអ្នកណា? គាត់ត្រូវការអី? ឈ្មោះអី? យ៉ាងហោចណាស់ក៏ស្គាល់ពីពត៌មានមួយចំនួនជុំវិញអតិថិជនរបស់ខ្លួនដែរ ហើយអ្នកអាចចាប់ផ្តើមទំនាក់ទំនងសុំពេលនិយាយជាមួយពួកគាត់ នោះទើបការខលទៅភ្ញៀវរបស់អ្នកមិនសូវភ្លាវពេក។
២.ច្បាស់លាស់ហើយមានមនុស្សយោង(Reference)
សេដ្ឋីកាណាដា Dan Lok និយាយថាអ្នកលក់ឆ្លាតមុននឹងខលទៅភ្ញៀវត្រូវមានមនុស្សយោង ដើម្បីជាសម្អាងនៅក្នុងការជជែកជាមួយភ្ញៀវ ដែលវាគឺជាទំនុកចិត្តមួយនៅក្នងការទំនាក់ទំនងនិងពិធីការនៅក្នុងការលក់។ គាត់បានលើកឧទាហរណ៍ថា “ខ្ញុំឈ្មោះ Dan ខ្ញុំជាអ្នកលក់ ហើយខ្ញុំបានលេងទូរស័ព្ទរបស់លោក ពី…….ហើយខ្ញុំត្រូវជា….ជាមួយគាត់….ដែលឃ្លាទាំងនេះអាចយកមកប្រើការបាននៅក្នុងការលក់។ មនុស្សយោងមានឥទ្ធពលនៅក្នុងការចចារលក់តាមទូរស័ព្ទ ដែលអាចធ្វើអោយអតិថិជនមានទំនុកចិត្តខ្ពស់ជាងមុនក្នុងការនិយាយជាមួយអ្នក។
៣.គោលការណ៍២០ ក្នុង១០០ (20/100 Strategy)
គោលការណ៍២០ ក្នុង១០០ នេះជាគោលការណ៍បង្កើតអារម្មណ៍ជិតស្និតជុំវិញពត៌មានតិចតួចរបស់ភ្ញៀវ ដែលអ្នកទទួលបាន ដូចជាឈ្មោះអតិថិជន អាស័យដ្ឋានជាដើម ហើយធ្វើវាអោយដូចជារឿងពិតដែលអ្នកបានស្គាល់ជាយូរមកហើយ។ សេដ្ឋីកាណាដាបាននិយាយថា អ្នកគួរហៅឈ្មោះអតិថិជនអោយចំៗ ពេលខលទៅភ្ញៀវ។
ឧទាហរណ៍៖ ជំរាបសួរលោក Robert ….ដែលនេះជាសញ្ញាមួយបង្ហាញថា អ្នកយកចិត្តទុកដាក់លើការសន្ទនា មិនមែនចេះតែខលមកភ្ញៀវនោះទេ៕