តំបន់ព្រែកឯងត្រង់គាល់ស្ពានទន្លេងបាសាក់ ដីកំពុងមានសក្តានុពលនិងមានភាពទាក់ទាញខ្លាំង តម្លៃថ្លៃកប់ក្តោង
កំណាត់ផ្លូវលេខ១១៤ ដែលមនុស្សភាគច្រើនតែងនិយមហៅថា ផ្លូវរោងចក្រស្រាបៀរថៃហ្គ័រ ដែលធ្លាប់តែជាតំបន់ដីចម្ការ និងលិចទឹកជារៀងរាល់ឆ្នាំនោះ ពេលនេះបានប្រែរូបរាងមកជាតំបន់លំនៅដ្ឋានកម្រិតមធ្យម និងឃ្លាំង ក្រោមការវិនិយោគពីណាក់បណ្តាអ្នកអភិវឌ្ឍចម្រុះ ដែលជំរុញឱ្យដីនៅតំបន់មួយនេះកាន់តែមានសក្ដានុពល។
លោក វ៉ា វីរៈ អគ្គនាយកក្រុមហ៊ុនអចលនទ្រព្យ Centurya 21 Fortuna Investment បានប្រាប់ឲ្យដឹងថា បច្ចុប្បន្នមិនថាចំពោះតំបន់មួយណានោះទេ ឱ្យតែនៅជាប់ជាយក្រុងគឺសុទ្ធ តែមានសក្ដានុពល និងមានតម្រូវការខ្ពស់ក្នុងការប្រើប្រាស់ដីទាំងអស់។ លោកបានបន្តទៀតថា ដីដែលស្ថិតនៅជាប់កំណាត់ផ្លូវលេខ១១៤ ឬផ្លូវរោងចក្រស្រាបៀរថៃហ្គ័រ ដែលបំបែកចេញពីផ្លូវជាតិលេខ១ ស្ថិតក្នុងសង្កាត់ព្រែកឯងរហូតដល់រង្វង់មូល គល់ស្ពានគល់ស្ពានទន្លេបាសាក់ គឺកំពុងមានសក្ដានុពល និងភាពទាក់ទាញខ្លាំង ប៉ុន្តែក៏មានការបែងចែកជាតំបន់ដែរ។
ដោយឡែកចាប់ពីចំណុចរោងចក្រផលិតស្រាបៀរថៃហ្គ័រ រហូតដល់ចំណុចរង្វង់មូលស្ពានទន្លេបាសាក់ គឺនៅមានដីទំនេរច្រើន ប៉ុន្តែមិនមានទំហំធំៗដែលអាចធ្វើជាបុរីនោះទេ ហើយក៏មានតម្លៃថ្លៃផងដែរ។ ដីដែលនៅជាប់នឹងផ្លូវធំនេះ មានសក្ដានុពល និងអាចអភិវឌ្ឍជាបណ្តុំលំនៅដ្ឋាន ជាក់ស្ដែងដូចជានៅក្បែររង្វង់មូលគល់ស្ពាន បច្ចុប្បន្នបានអភិវឌ្ឍជាបណ្តុំលំនៅដ្ឋាន ភោជនីយដ្ឋាន និងឃ្លាំងកម្រិតតូចនិងមធ្យមរួចទៅហើយ ក្រៅពីនេះក៏មានដីដែលកំពុងពុះលក់រាយជាប្រភេទដីឡូតិ៍។
លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal ដែលជាអ្នកអភិវឌ្ឍវិស័យលំនៅដ្ឋានផងដែរនោះ មានប្រសាសន៍ប្រាប់ឱ្យដឹងថា ភាគច្រើនតំបន់នេះ ជាពិសេសដីដែលនៅជាប់ផ្លូវធំ គឺស័ក្ដិសមទៅនឹងបណ្តុំផ្ទះល្វែងជាងការធ្វើឃ្លាំង ដោយសារតែភាគច្រើនជាប្រភេទដីដែលមានទំហំតូច និងមានតម្លៃថ្លៃរួចទៅហើយ។ លោកឧកញ៉ាបន្តថា នៅតំបន់នេះមានគម្រោងអភិវឌ្ឍផ្លូវមួយខ្សែឆ្ពោះទៅទីលានវាយកូន ហ្គោលដ៏ធំមួយ ហើយក្រៅពីនេះក៏មានការអភិវឌ្ឍជាលំនៅដ្ឋាន របស់អ្នកវិនិយោគទៅតាមលទ្ធភាពរបស់ពួកគេ ដែលនៅមិនទាន់គម្រោងសំណង់ជាប្រភេទបុរីធំៗនៅឡើយនោះទេ។
លោកឧកញ៉ាបន្តទៀតថា “តំបន់នេះបច្ចុប្បន្នហាក់មានភាពលំបាក ក្នុងការអភិវឌ្ឍជាសំណង់បុរី ដោយសារតែតម្លៃដីបានឡើងខ្ពស់រួចទៅហើយ ដែលយ៉ាងហោចណាស់ដីដែលនៅជាប់ផ្លូវ១១៤នេះ មានតម្លៃក្នុងរង្វង់៣៥០-៤៥០ ដុល្លារក្នុងមួយម៉ែត្រការ៉េ ដែលវាក៏អាស្រ័យទៅតាមទ្រង់ទ្រាយ និងទំហំដី”។ លោកបន្តថា ដោយឡែកចំពោះដីដែលស្ថិតនៅឆ្ងាយពីផ្លូវធំមួយខ្សែនេះ ដែលស្ថិតនៅតំបន់បោះអង្គាញ់ មានតម្លៃចាប់ពី១៥០-២០០ដុល្លារ ក្នុងមួយម៉ែត្រការ៉េ ហើយនៅថ្ងៃខាងមុខតម្លៃនឹងបន្តឡើងថ្លៃជាងនេះ។
លោកឧកញ៉ា នួន រិទ្ធី បានបន្តថា “មិនថាចំពោះដីដែលស្ថិតជាប់ផ្លូវ ឬឆ្ងាយពីផ្លូវធំនោះទេដែលមានតម្លៃថ្លៃ សូម្បីតែដីលិចទឹកដែលស្ថិតនៅជុំវិញតំបន់នេះ ក៏មានតម្លៃថ្លៃគួរសមដែរ ពោលគឺក្នុងមួយម៉ែត្រការ៉េអាចតម្លៃប្រមាណ២០ដុល្លាររួចទៅហើយ ប៉ុន្តែបើគិតពីការវិនិយោគ ដើម្បីទទួលបានចំណេញពីវិស័យដីធ្លីនៅតំបន់នេះ គិតចាប់ពីបច្ចុប្បន្នទៅរយៈពេល៥ឆ្នាំខាងមុខអាចនៅមានឱកាសនៅឡើយ”៕