អ្នកជំនាញអចលនទ្រព្យ ៖ ដីធ្លីដែលស្ថិតនៅក្នុងខណ្ឌមានជ័យ បច្ចុប្បន្នកំពុងតែមានសក្តានុពលខ្លាំងក្លាបំផុត
ក្រុមអ្នកជំនាញបាននិយាយថា មានជ័យ ជាខណ្ឌមួយដែលមានសក្ដានុពល និងភាពទាក់ទាញខ្លាំងមិនចាញ់ខណ្ឌដង្កោ និងខណ្ឌមួយចំនួនទៀតដែលមានព្រំប្រទល់ជាប់គ្នានោះឡើយ ហើយកំពុងមានសក្តានុពលក្នុងការអភិវឌ្ឍ។
អគ្គនាយកក្រុមហ៊ុន Century21 Imperial Realty លោក Ken Lo បានមានប្រសាសន៍ប្រាប់តាមទូរស័ព្ទកាលពីល្ងាចថ្ងៃទី៧ ខែមិថុនា ឆ្នាំ២០១៩ កន្លងមកថា ពេលនេះតំបន់មួយចំនួន ដែលស្ថិតនៅក្នុងខណ្ឌមានជ័យ បានបង្ហាញពីភាពទាក់ទាញកាន់តែខ្លាំង ជាពិសេសដីដែលស្ថិតនៅក្បែរមហាវិថីសម្តេចតេជោ ដែលមានទំហំ៦០ម៉ែត្រតែម្ដង។ លោកបន្តថា ភាពទាក់ទាញរបស់ខណ្ឌមានជ័យ គឺមានប្រហាក់ប្រហែលគ្នាទៅនឹងខណ្ឌដទៃទៀតដែលស្ថិតនៅជាប់គ្នា ដូចជាខណ្ឌដង្កោ និងខណ្ឌច្បារអំពៅជាដើម។
លោកបន្តទៀតថា “ទីផ្សារអចលនទ្រព្យនៅក្នុងខណ្ឌមួយនេះគឺមានស្ថានភាពមិនដូចគ្នានោះទេ ដែលវាអស្រ័យទៅតាមតំបន់ដែលមានការអភិវឌ្ឍរួចរាល់ និងតំបន់ដែលទើបតែមានគម្រោងអភិវឌ្ឍនៅថ្ងៃអនាគត”។ លោកបានបន្តទៀតថា “បច្ចុប្បន្នតំបន់ដែលកំពុងតែទទួលបានចំណាត់ថ្នាក់ខ្ពស់ និងទាក់ទាញបំផុតនៃខណ្ឌមួយនេះ គឺតំបន់ដែលស្ថិតនៅក្បែរមហាវិថី សម្ដេចតេជោមហាវិថី៥០ម៉ែត្រ ដែលជាតំបន់ប្រមូលផ្តុំទៅមជ្ឈមណ្ឌលពាណិជ្ជកម្មចំរុះ និងទំនើប និងបណ្តុំលំនៅដ្ឋានកម្រិតខ្ពស់នៅពេលខាងមុខនេះ”។
លោកបានបញ្ជាក់ទៀតថា នៅតំបន់នេះ តម្លៃដីនៅលើទីផ្សារអាចមានចន្លោះចាប់ពី ៦០០-ដល់៣០០០ដុល្លារក្នុងមួយម៉ែត្រការ៉េ ខណៈដែលកាលពីឆ្នាំកន្លងទៅ ឬ២ឆ្នាំមុន មានតម្លៃត្រឹមតែ៣០០ដុល្លារក្នុងមួយម៉ែត្រការ៉េ។
លើកឡើងស្រដៀងគ្នានេះ នាយិកាក្រុមហ៊ុនអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ប្រាប់ទូរស័ព្ទនៅល្ងាចថ្ងៃដដែលនេះថា វិស័យដីធ្លីនៅតំបន់ខាងលើនេះ ពិតជាមានការប្រែប្រួលខ្លាំងមែន។ ជាក់ស្តែងកាលពីប្រមាណ៥ឆ្នាំមុន តំបន់បឹងទំពុនគឺគ្រាន់តែតំបន់ទឹកបឹង ដែលពោរទៅដោយត្រកួន កំប្លោក និងទឹកស្អុយតែប៉ុណ្ណោះ ប៉ុន្តែបច្ចុប្បន្នក្រោមគោលនយោបាយ និងការអភិវឌ្ឍរបស់រាជរដ្ឋាភិបាល ពេលនេះបឹងទំពុនប្រៀបបានទៅកូនក្រមុំក្នុងភ្នែកអ្នកវិនិយោគ។
លោកស្រីបានបន្តទៀតថា “បឹងទំពុនមានសន្ទុះអភិវឌ្ឍយ៉ាងលឿន ជាពិសេសបន្ទាប់ពីលេចចេញនូវមហាវិថីសម្ដេចតេជោ”។ ផ្អែកតាមសន្ទះ និងសកម្មភាពជាក់ស្ដែង តំបន់ដ៏ទាក់ទាញមួយនេះ នឹងក្លាយទៅជាមណ្ឌលពាណិជ្ជកម្មទំនើបយ៉ាងសកម្ម ព្រោះក្រៅពីមានគម្រោងផ្សារទំនើបរបស់ក្រុមហ៊ុន ប៉េង ហួត គម្រោងផ្សារទំនើប AEON3 គម្រោងរបស់ក្រុមហ៊ុន ជីប ម៉ុង គម្រោងរបស់ក្រុមហ៊ុនអចលនទ្រព្យដ៏ធំរបស់ចិន R&F ជាដើម”។
លោកស្រី តាំង ហួរបានបញ្ជាក់ថា មិនលើសរយៈពេល ៥ឆ្នាំទៀតនោះទេ តំបន់មួយនេះអាចនឹងក្លាយទៅជាក្រុងដ៏ឆើតឆាយ និងស្រស់ស្អាតប្រកបដោយភាពទាក់ទាញបំផុត ខណៈដែលគម្រោងខុនដូ បុរី និងសំណង់លំនៅដ្ឋានកម្រិតខ្ពស់ នឹងត្រូវបានលេចចេញជារូបរាង៕